"Tardes de soledad" Albert Serraren dokumentalak irabazi du Urrezko Maskorra
Tardes de soledad Albert Serra kataluniar zinema zuzendariak (Banyoles, 1975) zezenketei buruz filmatutako dokumentalak irabazi du Donostiako 72. Zinemaldiko Urrezko Maskorra, film onenarentzako saria.
Jaione Camborda iaz Urrezko Maskorra irabazi zuen O corno filmaren zuzendaria buru izan duen epaimahaiak Serraren pelikularen "indar artistikoa" azpimarratu du, eta gaineratu du Andres Roca Rey perutar toreatzailearen jarduna pantailaratzen duen filmak aukera ematen digula "sormen artistikoaren mugei buruz hausnartzeko, beldurrari eta basakeriari buruz, tradizioari eta maskulinitateari buruz, besteak beste".
Saria jasotzeko orduan, Serrak esker ona agertu dio toreatzaileari eta horren lantaldeari, oso une intimoetara gerturatzeko baimena emateagatik. "Beraiei esker existitzen da pelikula, eta horregatik du beste pelikula batzuetan aurkitu ezin den benetakotasuna", adierazi du zuzendariak, eta "apur bat ausarta den autore zinema" aldarrikatu du, "edozein gairen funtsera iristera ausartzeko".
Dokumentalak hautsak harrotu zituen zinema jaialdiaren atarian eta bertan pantailaratu zutenean, animalien eskubideen aldeko hainbat elkartek Zinemalditik kanpo uzteko eskatu baitzuten.
Gainera, epaimahaiak sari berezia eman die The last showgirl Gia Coppolak zuzendu duen filmeko aktore guztiei, Pamela Anderson protagonista buru dela, "interpretatzeko gaitasun handiagatik eta galzorian den lanbide bat, bukatzen ari den mundu bat, gerturatzeagatik".
Patricia Lopez Arnaiz gasteiztar aktorearen (Ane, 20.000 especies de abejas…) eskutik iritsi zaio euskal zinemagintzari gaueko sari handietako bat: interpretazio onenaren Zilarrezko Maskorra ekarri dio Lopez Arnaizi Los destellos Pilar Palomerok Eider Rodriguezen narrazio batean oinarrituta zuzendu duen filmean egindako lanak.
Lopez Arnaiz Isabel da Los destellosen, Madalen alabak hala eskatuta Ramon gaixotasun larria duen senar ohia zaintzen hasten den emakumea.
Antzeztaldeko interpretazio onenaren Zilarrezko Maskorra, bestalde, Pierre Lottinentzat izan da When Fall Is Coming filmean egindako lanarengatik, eta zuzendari onenaren Zilarrezko Maskorra ex aequo irabazi dute Laura Carreira portugaldarrak On falling prekarietatearen, turbokapitalismoaren eta inkomunikazioaren inguruko film txalotuagatik eta Pedro Martin Calerok El llanto beldurrezko filmagatik. Bi zuzendariok beren lehen film luzearekin iritsi dira Zinemaldiko Sail Ofizialera.
Philippe Piazzo eta François Ozon eta Piao Songri ere saritu ditu epaimahai ofizialak, lehen biak When Fall Is Coming pelikularen gidoiagatik eta bestea Bound in Heavenen argazkigintzagatik.
Euskal zinema
Itziar Lazkano buru izan duen epaimahaiak hala erabakita, Euskal Zinemaren Irizar saria, Zinemaldiaren edozein sailetan munduko estreinaldia egin duen euskal film onenaren golardoa, Chaplin | espíritu gitano pelikularentzat izan da. Carmen Chaplinek zuzendu du Charles Chaplinen iragan erromaniari buruzko dokumentala, Basque Films euskal etxeak ekoitzi du eta Julia Juaniz arduratu da editatzeaz.
Horrez gain, epaimahaiak aipamen berezia egin dio Erreplika Pello Gutierrezek absentziaren inguruan egindako pelikulari.
Gainerako sailak
Cullinary Zinema sailean, Mugaritz. Sin pan ni postre (Paco Plaza) Andoni Luis Adurizek gidatzen duen jatetxeari buruzko lanarentzat izan da saria; Zabaltegi Tabakaleran, Aprilentzat izan da saria (Dea Kulumbegashvilli, Beginning 2020ko Urrezko Maskorra irabazi zuen filmaren zuzendaria) eta Monólogo selectivorentzat (Jessica Sarah Rinland) aipamen berezia; Horizontes Latinosen, El jockeyrentzat (Luis Ortega); eta Kutxabank-New Directorsen, Bagger dramarentzat izan da saria (Piet Baumgartner) eta La guitarra flamenca de Yerai Cortésentzat (Anton Alvarez) epaimahaiaren aipamen berezia.
We live in time John Crowley zuzendariaren filmaren proiekzioak itxi du gala, zuzendariak berak aurkeztuta.
Albiste gehiago zinema
“Frankenstein” izango da Zinemaldiaren film sorpresa
Antzoki Zaharrean eta Victoria Eugenia antzokian proiektatuko da bihar Guillermo del Torok zuzendutako filma eta, larunbatean, hirugarrenez, Belodromoko pantaila erraldoian. Oscar Isaac, Jacob Elordi, Christoph Waltz eta Mia Goth dira protagonistak.
Milaka jarraitzaileren aurrean estreinatu da "Go!azen" telesailaren 12. denboraldia Zinemaldian
Arrakastaz hasi du EITBko telesailak denboraldi berriaren ibilbidea. Zinemaldiaren barruan, Anoetako belodromoan egin da lehen aurrestreinaldia. Aurten, gainera, bigarren pase bat ere izango da hurrengo ostiralean.
Jendetza batu da Donostian Palestinaren alde, zinema munduak bultzatutako manifestazioan
Euskal Herriko komunitate palestinarrak deituta eta zinemako profesionalek babestuta, milaka herritarrek manifestazioa egin dute Donostian, Israel Gazan egiten ari den genozidioa salatzeko. Bertan izan da "The Voice of Hind Rajab" pelikulako lantaldea.
Victoria Eugenia Antzokiak txalo artean hartu ditu "The Voice of Hind Rajab" filmeko protagonistak, Gazako genozidioaren aurkako manifestazioaren atarian
"The Voice of Hind Rajab" filma proiektatu dute Donostiako Victoria Eugenia Antzokian, eta bertaratutakoek zazpi minutuko txalo zaparrada eskaini diete haren protagonistei, Palestinaren aldeko adierazpenen artean. Filmak sei urteko neskato baten istorioa kontatzen du. Neskato horrek laguntza eskatu zuen, Israelgo armadak erasotako ibilgailu batean harrapatuta geratu ondoren. Motaz Malhees eta Saja Kilani aktoreak, hunkituta, kalera atera dira, Gazako genozidioaren aurkako manifestazioa hastear zegoela, eta eskainitako elkartasun keinuak eskertu dituzte.
Zinemaren mundua, bat eginda Donostian Gazako genozidioaren kontra
Zinemako profesionalek eta herritarrek "The Voice of Hind Rajab" filmaren proiekzioa aprobetxatu dute Victoria Eugenia antzokitik abiatuta Palestinaren alde agertzeko. Pelikulako protagonistek eraman dute pankarta, Genozidioa STOP. Free Palestine leloarekin.
Colin Farrellek denbora laburra eskaini die jarraitzaileei Donostiara iristean
Aktore irlandarrak Sail Ofizialeko pelikula batekin heldu da Zinemaldira: Edward Bergerrek zuzendutako "Ballad of a Small Player".
"The Voice of Hind Rajab" filmeko aktoreak, hunkituta eta eskertuta Donostiako gizartearen erantzunarekin
Motaz Malheesek eta Saja Kilanik, Gazako neskatoari buruzko pelikulako protagonistek, Palestinako genozidioaren kontrako manifestazioan parte hartuko dute, proiekzioaren ostean.
Rebordinosek euskal zinemaren eta jaialdiaren balantzea egin du: "Inoiz ez dugu hain zinematografia ona izan"
Jose Luis Rebordinos Donostia Zinemaldiko zuzendaria pozik dago euskal zinemaren osasun onagatik, ez baita egun bateko kontua, eta azpimarratu du bermatuta dagoela datozen urteetan euskal ikus-entzunezkoak munduko zineman presentzia izango duela.
Nondik dator “Maspalomas” filma?
Aitor Arregi eta Jose Mari Goenaga zuzendariek Donostiako Zinemaldiko publikoa aho bete hortz utzi duen filmaz hitz egin digute. Irailaren 26an iritsiko da zinema aretoetara Moriarti hirukotearen azken filma.
Ramon Bareak Gure Zinema saria jaso du
Gure Zinema sariak Ramón Barea aktore, zinema zuzendari, antzerkigile eta antzerki zuzendariaren ibilbidea goraipatu du hirugarren edizioan. Bilbotarrak hunkituta jaso du saria Kursaalen, Zinemaldian.