"Gaua" eta "Decorado" euskal ekoizpenak Sitgeseko zinema jaialdian lehiatuko dira

Gaua Paul Urkijoren hirugarren film luzea eta Decorado Uniko bilbotar ekoiztetxearen lana, Alberto Vazquez galiziarraren animazioko pelikula, Sitgesen lehiatuko dira, fantasiazko zinemaren nazioarteko Kataluniako jaialdiaren 58. edizioan.

Bi filmok EITBren parte-hartzea dute, eta gaur iragarri dute bertan proiektatuko direla urriaren 9tik 19ra egingo dute jaialdiaren antolatzaileek, prentsaurrekoan. 

Urkijoren (Errementari, Irati) hirugarren film luzearen, zinemetara azaroaren 14an iritsiko den istorioaren, protagonistak Yune Nogueiras, Ane Gabarain, Elena Irureta eta Iñake Irastorza dira, eta euskal mitologia du ardatz pelikulak: "Sorgin ehiza betean, Kattalin, senarrarengandik ihesi, bere baserritik aterako da gauaren erdian. Baso beltzean galduko da eta bere atzetik segika duen presentzia bat sentituko du. Ihesean dabilela, hiru emakume maitagarrirekin topo egingo du. Horiek, arropa garbitu bitartean, beldurrezko ipuinak eta herriko esamesak kontatzen dizkiete elkarri. Kattalinen harridurarako, bera izango da istorio horien protagonista", dio sinopsiak.

Decorado Albert Vazquez galiziarraren (Unicorn Wars, Psiconautas…) film luzeak izen bereko film laburra du oinarri, 2016ko animaziozko film labur onenaren Goya sariaren irabazlea.

Harreman baten gainbehera eta horrek inguruko munduan duen eragina hartzen ditu hizpide Uniko bilbotar etxeak ekoitzitako lanak. Umore satirikoko alegia existentzialista da.

Lan horiez gain, Alpha Julia Ducournauren filmak irekiko du jaialdia, eta Peter Chan zuzendari eta ekoizlea, Gale Ann Hurd estatubatuar ekoizlea, Dominique Pinon frantses aktorea eta Hugo Stiglitz mexikar aktorea sarituko dituzte.

Gainera, bere lana aurkeztuko dute Johanna Moder, Mary Bronstein, Eduardo Casanova, Rose Byrne, Dylan Southern, Ben Leonberg eta John Mclean zinemagileek, besteak beste.