Krisiari aurre egiteko urtebete galdu dela deitoratu du oposizioak

Oposizioko talde guztiak bat etorri dira Iñigo Urkullu lehendakariaren Gobernuak krisiari aurre egiteko neurriak hartzeko bidean urtebete galdu duela esaterakoan.

Datorren astelehenean urtebete izango da EAJk EAEko hauteskunde autonomikoak irabazi zituela. EAJk gutxiengoan agintzen du, 75 legebiltzarkidetatik 27 baititu.

EH Bildu

Ezker abertzalea indartsu itzuli zen Legebiltzarrera, eta 21 eserleku eskuratuta bigarren indarra da.

Testuinguru horretan, EH Bilduk eta EAJk subiranotasunari lotutako gaietan bat egingo zutela eta bide horretan urratsak emango zituztela zabaldu zen, baita bestelako gai ekonomiko eta sozialetan ere, ETAk jarduera armatua betirako utzi ostean ireki zen egoera politiko berriaren ondorioz.

Alabaina, EH Bilduk horrelakorik gertatu ez izana deitoratu du. "EAJk autonomismoaren aldeko apustu argi egin du eta bere jarduera politiko guztia PSEri eta PPri zuzenduta dago; horren erakusgarri da hiru alderdi horien artean adostutako itun fiskala", azaldu dute.

Gauzak horrela, koalizio soberanistak esan du urtebete galdu dela "Madrildik egindako erasoei(LOMCE legea, koordainketa, administrazio publikoetako murrizketak eta lan-erreforma) aurre egiteko".

Ildo berean, gatazka politikoari behin betiko konponbidea emateko Rajoyren Gobernua urratsak ematera behartzeko aukera galdu dela ere kritikatu dute.

PSE

Idoia Mendia PSEko zuzendaritzaren bozeramaileak ere ildo berean hitz egin du egoera ekonomikoari dagokionean. "Euskadi ez dago duela urtebete baino hobeto, Jaurlaritza geldi egon delako". Bere esanetan Urkulluren legegintzaldia orain hasi da, "PSErekin adostutako, eta ondoren PPk ere sinatutako, itun fiskalarekin".

Fagorren krisia Jaurlaritzari leporatzea gehiegizkoa litzatekeela iritzi arren, Mendiak adierazi du Urkulluren Gobernuak ez duela lagundu "arazoak arintzen".

"Boterea berreskuratu duenetik EAJk agerian utzi du ez duela ideiarik eta egitasmorik krisi ekonomikoari aurre egiteko, eta Patxi Lopezen Gobernuak lortutakoak desegiten galdu du denbora", salatu du.

PP

Borja Semper Alderdi Popularraren Legebiltzarreko bozeramaileak esan du EAJk duen "kudeatzaile onaren irudia" ezerezean geratu dela, bizi duen krisi ekonomiko honetan erabaki garrantzitsurik hartzeko gai izan ez delako.

"Azken urtean ez dute ezer egin eta erabakitze-eskubidearen inguruko iragarpenak eginez ezkutatu nahi dute gabezia hori", kritikatu du.

"Erabakitzeko eskubidea bezalako gaiez gero eta gehiago hitzegiten du lehendakariak, baina ez dira ohartzen mundua gero eta konplexuagoa dela, zabalagoa eta lehiakorragoa, eta bakarrik ez garela inora joango", erantsi du.

UPyD

Gainerako taldeek bezala, UPyDk ere uste du EAJren Jaurlaritzak ez duela behar beste egin krisi ekonomikoari aurre egiteko bidean. Egoera okerragoa izan daitekeela ere esan du Gorka Maneirok, "EAJren keinu soberanistak ikusita eta EH Bilduren presioaren ondorioz".

"Jaurlaritzak ez dio krisiari aurre egin, instituzioak murrizteko egitasmoa gelditu du eta Euskadin gatazka politiko bat dagoela dioen teoria faltsua ezartzen saiatu da", nabarmendu du.

"Urkulluren Gobernua une honetan inoiz baino bakarrago ez badago, PSEren interes alderdikoien eta PPren beharrizan mediatikoen ondorio baino ez da", kritikatu du.