Ortuzar: 'Herritarrei galdetu aurretik, akordioa lortu behar da'

Andoni Ortuzar EAJko presidenteak ETB2ko ‘Euskadi pregunta’ saioan parte hartu du eta herritarrek egindako galderei erantzun die. Ortuzarrek erabakitzeko eskubidea defendatu du “lehenik, ordea, akordioa lortu behar da, Gernikako Estatutua baino zabalagoa”.

EAJko presidenteak Eusko Legebiltzarrean aurrera eramaten ari diren autogobernuaren lantaldea izan du hizpide, “elkarrizketari aukera emango diogu eta akordioa lortzeko lan egingo dugu”. “Herritarrei galdetzea azken pausoa izango litzateke eta 2015ean edo 2016an izatea espero dugu”.

Erabakitzeko eskubideari PPk eta PSOEk erakusten dioten ezezkoaren inguruan ere hitz egin du Ortuzarrek. “Ezezkoa emateko arrazoiak amaitzen ari zaizkie, gero eta zailagoa da guztiari ezetz esatea”, esan du. “Herriari entzuteko beldurra duenak, demokraziari beldurra dio”, azpimarratu du.

Parte hartzaileetako batek Gipuzkoan EAJk EH Bildurekiko duen “jarreraren” inguruan galdegin dio. Andoni Ortuzarrek esan duenez, “oposizioa egiten ari gara, gauzak argi eta garbi esaten”. “Nire aburuz, EH Bilduk ez du proba gainditu".

Euskal gatazkaren kontakizun bakarra egiterik ez dagoela adierazi du Ortuzarrek, eta kontzeptuarekin oso kritiko azaldu da. Kontakizunaren kontzeptuan sinesten ez duela esan du buruzagi jeltzaleak: "Bakoitzak oso era partikularrean bizi du gatazka; bakoitzak ulertzeko modu bat du".

"XXI. mendeari begiratzeko zauriak itxi behar ditugu. Hori bai, biktimarioen alboan izan direnak gehiago mugitu behar dira", erantsi du. "Indarkeriak dioptria ugariko betaurrekoak jarri dizkigu", kritikatu du. "Bakea ez da bakarrik indarkeriaren gabezia, elkarbizitza baizik, eta hori lortzeko biktimen eta presoen eskubideak aintzat hartu behar dituzte", azpimarratu du.

Kutxabank eta subordinatuak

"Ni ez nago Kutxabanken pribatizazioaren alde", aitortu du Ortuzarrek. "Teknikoki konplexua da, baina Kutxabankek aurrezki-kutxen eskuetan jarraituko du fundazioen bidez", azaldu du. Gainera, erakundeetan EAJren jarrera "koherentea" izan dela goraipatu du jeltzaleak.

Finantza-ekarpen subordinatuen kalteduneei elkartasuna adierazi die Ortuzarrek, baina Kontsumobiden lortutako akordioa defendatu du. Hala ere, Kontsumobidek akordioa "inori inposatzeko gaitasunik ez du", gaineratu du. Konponbidea "aurrerapauso" bat izan dela esan du EAJko presidenteak. "Kontsumobiden adostutakoarekin bat egin dute kaltedun askok", gogorarazi du.

Bankuen laguntzak

Bestalde, Espainiako bankuetan dirua nola sartu duten gogor kritikatu du EAJko agintariak: "Lardaskeria biribila izan da". "Merezi ez zuenari dirua eman diote, gauzak gaizki egin dutenei", salatu du.

"Orain laguntza jaso duten bankuek pertsonak erreskatatu behar dituzte", eskatu du. "Espainiaren zorra ikaragarria da, eta Espainiako banketxeek zorra dute, baina Alemaniako, Italiako, Frantziako... bankuek zor horri bermea eman diote, eta horregatik EBk Espainiari lagundu dio. Hala eta guztiz ere, benetako lardaskeria izan da", adierazi du.

Enplegua

Langabeziaren aurkako borrokan Urkulluren Exekutiboak egindako lana defendatu du Ortuzarrek: "Ahal duguna egiten ari gara, baina lehendakariak ez du makila magikorik". "Lanpostuak sortzea garrantzitsua da, baina enpleguaren deuseztapenari oztopoak jarri behar dizkiogu. Industriako hainbat lanpostu deuseztatzen ari dira, kezkagarria da. Pazientzia pixka bat eskatu nahi dut", azaldu du.

"Euskal langilearen label bat sortzea ideia txarra ez da, baina EBko araudiak pertsonei lan egiteko askatasuna ematen die estatu kideetan. Zaila da, obra publikoak enpresa multinazional erraldoien eskuetan geratzen dira, eskaintza merkeagoak egiten dituztelako. Hanka-sartze bat da, EBri demostratu behar diogu", gaineratu du.

Lana lortzeko hezkuntzaren garrantzia goraipatu du EAJko presidenteak, baina Lanbide tresna eraginkorra izan behar dela erantsi du: "Legealdiko erronka nagusia Lanbideri txinpartak ateratzea da. INEM eredugarri bat izan behar da, eta ez paperak betetzeko makineria burokratiko bat".

Lomce

Hezkuntzaren erreforma berriro kritikatu du Ortuzarrek: "Lomce legearekin 20 urte atzera egin dugu Euskadin". "Hezkuntza sistema egonkorra izan behar da", erantsi du. "Lomce onartu, baina ez dugu bete behar", ohartarazi du. "Muzin egitea zaila izango da, baina asko eta ongi lan egiten ari dira", esan du. Gainera, legea atzera botatzeko berriz eskatu dio EAJko presidenteak Werti. "Astakeria bat da, hezkuntzarekin ez dago jokatzerik", adierazi du.

Otegi eta Azkuna

Saioaren hasieran Africa Baeta aurkezleak gaur arratsaldean Auzitegi Konstituzionalak Bateragune auziaren inguruan hartu duen erabakiari buruz galdetu dio Andoni Ortuzarri. EAJko presidenteak adierazi duenez, “erabakiak atsekabea sortu dit”. “Arnaldo Otegik ez zuen espetxean egon beharko Bateragune auziarengatik eta ahalik eta lasterren irtetea nahiko nuke”, baieztatu du.

Iñaki Azkuna goraipatu du buruzagi jeltzaleak: "Alkate bikaina izan zen". "Iñakik beste askok egindako lanaren ordaina jaso du, besteak beste, Ibon Aresok egindako lan isilarena", gaineratu du. Datozen udal-hauteskundeetan EAJk aurkeztu beharreko hautagaiaz ez du xehetasunik eman: "EAJk pertsonarik onena jarriko du, jarrera irekia izan beharko du. Bilbotarren konfiantza izaten jarraitu nahi dugu".