Abiadura handiko trena Abandotik iritsiko da Bilbora, behin-behinean, epeak aurreratzeko

Abiadura handiko trenaren jarraipen batzordea osatzen duten erakundeek adostu dutenez, AHTa Bilbora Abandoko geltokitik iritsiko da behin-behinean, azpiegitura martxan jartzeko epeak bizkortzeko.

Gaur, astelehenarekin, hartu dute erabakia aipatu batzordea osatzen duten Garraio Ministrioak, Adifek, Eusko Jaurlaritzak eta Bilboko Udalak. Gainera, Bizkaiko Foru Aldundia batu da gaurkoan jarraipen batzordera.

Erakunde horietako ordezkariek agerraldia egin dute Bilbon. Bertan, Garraio eta Mugikortasun Jasangarriko Estatu idazkariak esan du "akordio historikoa" dela Bilborentzat, behin-behineko konponbidea emango baitio AHTari, Abandoko geltokia lurperatzeko lanak bukatuta egon ez arren. Horrela, behin-behinean bada ere, pentsa baino arinago —ez dute datarik eman— zabalduko dute geltoki berria.

Onartutako, baina, konponbidea aldi baterako izango da, eta, inplikatutako administrazioek azpimarratu dutenez, ez du eragotziko trena Bizkaiko hiriburura lurpetik iristea, proiektuaren behin betiko planek aurreikusten duten bezala.

Akordioak, gainera, mantenimendu basea Basaurira lekualdatzea jasotzen du. Erabaki horri esker, 40.000 metro karratu inguruko azalera kendu ahal izango da Abandoko ingurunean, eta espazio horretan AHTaren zerbitzuak ezartzea aurreikusten dute.

Kostu ekonomikoaz hitz egin ez badute ere, hasiera batean aurreikusitako proiektua baino "merkeagoa" izango da.

Horrez gain, gorabehera gutxiago eragingo ditu Renfe aldirietako lineetan, lurperatze lanak aurrera doazenean.

Erakundeen ustez, formula horrek bateragarri egingo ditu abiadura handia lehenago iristea eta Bilbon lurperatutako trenbidea etorkizunean integratzea, hori baita Bizkaiko hiriburuan egiteke dagoen hirigintza- eta mugikortasun-proiektu nagusietako bat.

"Zehaztu gabeko" proiektua dela kritikatu du EH Bilduk

EH Bilduren zinegotzi Karlos Renedo "kezkatuta" azaldu da "proiektua zehaztu gabe" dagoela eta.

Horren esanetan, AHTa iristeak ezin du Abando auzoaren bilakera baldintzatu.

"EAJ eta PSE inprobisatzen ari dira beste behin ere", eta "ez dakite ez nola, ez noiz helduko den AHTa Bilbora, ezta horrek zer kostu izango duen ere". "Inprobiazio horrek 4.800 milioi euroko gainkostua eragin du dagoeneko", erantsi du.

PPk ez du begi onez ikusi AHTaren iritsiera data zehatzik gabe iragartzea

Ohar baten bidez, PPk Bilboko Udalean duen bozeramaile Esther Martinezek iritzio dio gaur goizean egin duten ekitaldia "propaganda erakustaldia" izan dela, "oraindik datarik, finantziazio bermerik eta aurrera eramateko benetako konpromisorik ez duen proiektu bat iragartzeko".

Espainiako Gobernuaren konpromisoa

Estatu idazkaria, bestalde, esan du ezin dela Espainiako Gobernuaren konpromisoa zalantzan jarri, eta inolaz ere ez dagoela arriskuan, "aurrekontu orokorrak gorabehera".

Horiek horrela, lanak arintzeko bidean, erakundeen arteko elkarlana nabarmendu dute ordezkariek.

Esan bezala, Bizkaiko Aldundiak bat egin du proiektuarekin, nahiz eta oraindik ez duen argitu zein izango den bere lana.

Horri buruz, Bizkaiko ahaldun nagusi Elixabete Etxanobek argudiatu du egitasmoak abanatilak ekarriko dituela mugikortasunean, hiri berroneratzean, etxebizitzan eta jarduera ekonomikoan.

Bilboko alkate Juan Mari Aburtok ere hartu du hitza, eta adierazi du 130.000 metro koadro irabaziko dituela hiriak, eta parke handi bat, etxebizitzak eta kulturgune berri bat eraikiko direla esparru horretan.

Horren hitzetan, proiektuari esker loturak indartuko ditu Bilbok, eta mugarri izango da hirian.