Gure Esku Dagok Euskal Herria zeharkatuko du gaur eskutik helduta

Gaur, igandea, Gure Esku Dago plataformak Durango (Bizkaia) eta Iruñea (Nafarroa) erabakitzeko eskubidearen alde lotuko dituen giza-katea gauzatuko du, 100.000 pertsona baino gehiagoren parte-hartzearen bidez.

Urtebete baino gehiago igaro da Gure Esku Dago ekimena aurkeztu zutenetik, iazko maiatzaren 25ean, antolatzaileek Gure Esku Dago giza-katea egiteko arrazoiak eman zituzten: "ekimen ugari sortu izan dira erabakitzeko eskubidearen inguruan. Horren harira, 'Gure Esku Dago' dinamikak horien guztien topaleku izan nahi du". Horretarako, honako hiru ardatz hauek oinarri hartuko zituztela azaldu zuten: "Euskal Herria nazioa da, erabakitzeko eskubidea du, eta herritarrak protagonistak dira".

123 kilometroko luzera izango du kateak, eta Gure Esku Dago plataformak iragarri moduan, katearen bukaera Iruñeko Antoniutti parkean izango da, eta Durangoko Landako Gunean hasi (edo bukatu). 12:00etan ekingo diote kateari, baina bi ordu lehenago parte hartzaile guztiek euren tokian prest egotea eskatu dute antolatzaileek.

Angel Oiarbide Gure Esku Dagoren bozeramaileak festarekin bat egitera deitu ditu herritarrak. Hala, oraindik metroa erosi ez dutenei festa-guneetara jotzera deitu ditu, alegia, Iruñera, Etxarrira, Lazkaora, Bergarara edo Durangora, garraio publikoa erabilita.

Asko dira bat egin dutenak

Angel Oiarbide erabakitzeko eskubidearen aldeko mugimenduko ordezkariak Euskadi Irratian azaldu zionez, ez dute alderdi politikoen inplikazioa nahi izan ekimenean, "norbanakoena" baizik, horrela mugiaraziko baitituzte erakundeak eta alderdi politikoak, Oiarbideren esanetan.

Idiazabaldarrak argi utzi nahi izan du Gure Esku Dago ekimenean sentsibilitate desberdinak dituzten pertsonak daudela. Horren harira, Ezkerraldeko adibidea jarri du, bertan "PSE-EEko eta CCOOko jendea parte hartzen" ari baita ekimenean, zeren erabakitzeko eskubidearena "ez da aldarrikapen abertzalea, demokratikoa baizik".

Antolatzaileen arabera, honako hauek dira partehartzaileetako batzuk: Xabier Euzkitze (kazetaria); Jose Luis Uriz (PSC); Anjel Alkain (aktorea eta umorista); Kirmen Uribe (idazlea); Andoni Ortuzar (politikaria); Pirritx, Porrotx, Marimotots (pailazoak); Onintza Enbeita (bertsolaria); Pello Urizar (politikaria); Joseba Egibar (politikaria); Gemma Zabaleta (politikaria); Beñat Gaztelumendi (bertsolaria); Maddalen Iriarte (kazetaria); Garbiñe Espejo (CCOOko kidea); Amets Arzallus (bertsolaria); Adolfo Muñoz (ELAko idazkari nagusia); Arbizu Amaia Muñoa (ELAko kidea) eta Pantxoa Karrere (abeslaria).

Eusko Jaurlaritzak ez du giza-katean parte hartuko, baina "begi onez" ikusi du alderdietako ordezkariek norbanako gisa parte hartzea, Josu Erkoreka bozeramailearen esanetan. Jeltzaleak ekimena goraipatu zuen, "gizartetik" ateratzen delako, eta "adierazpen eta manifestazio askatasuna era kolektiboan bideratzen duelako".

Diasporako euskal herritarrek ere ekimenarekin bat egin dutela adierazi du Oiarbidek, eta, ildo horretan, munduko hainbat hiritan Gure Esku Dago mugimenduak sortu direla azaldu du. Gaur giza kateak egingo dituzte hainbat tokitan, tartean Mexikon, Sydney hirian, La Platan, Buenos Airesen, Boisen eta New Yorken. ''Batek baino gehiagok esan digu 'basque connecting' eguna izango dela'', gaineratu du.

Garraio publikoa

Garraio publikoko zenbait zerbitzuk baliabideak areagotu dituzte espero den jende oldea erraztasunez mugitzeko. Ildo horretan, Pesak, Renfek, EuskoTrenek eta Villavesak zerbitzuak indartu dituztela nabarmendu du.

Gainera, Gure Esku Dagok 900 autobus jarri dituzte martxan eta 2.500 boluntario izango da dira 123 kilometroko ekitaldian.