'Mundu musulmanari buruzko mapa' lantzen ari da Ertzaintza

Ertzaintza “mundu musulmanaren egoerari eta islamismo erradikalari buruzko mapa” lantzen ari da, “atentatuak eragin ditzakeen prozesu erradikalak ekiditeko asmoz”.

Gervasio Gabirondo Ertzaintzako zuzendariak eta Estefania Beltran de Heredia Segurtasun sailburuak agerraldia egin dute Legebiltzarreko segurtasun batzordean aipatu planaren xehetasunak emateko.

Indarkeria islamiarrari errotik aurre egitea da egitasmoaren helburua, etorkizunean atentatu arriskurik ez izateko. Helburua lortzeko ikerketarako ahalmena indartu, talde horiek desegiteko baliabideak hobetu eta balizko atentatu baten ondorioak kudeatzeko bitartekoak zorroztu nahi dituzte.

“Geoestrategikoki nahiz geopolitikoki Euskadi ez dago atentatu jihadistak izateko arriskutik kanpo, baina azpimarratu behar dugu oraingoz ez dugula erasoak izateko zantzurik antzeman”, azaldu du Beltran de Herediak.

Euskal Autonomia Erkidegoa laugarren arrisku mailan dago, Estatuko gainerako erkidegoak bezala. Segurtasun sailburuaren iritzian, baina, arrisku maila sektoreka ezarri beharko litzateke, “atentatuak izateko aukera ez baita bera autonomia edo hiri guztietan”.

Balizko prozesu erradikalei “aurre hartzea” ezinbestekoa dela jo du eta, ondorioz, Ertzaintza Euskadin bizi den komunitate musulmanarekin elkarlanean ari da, “euren errealitatea ezagutzeko”.

Gauzak horrela, Gabirondok esan du beharrezkoa dela “mapa” bat lantzea, “pertsona musulmanak biltzen diren meskitak eta elkarteak non dauden zehaztuz”.

Trebakuntza eta koordinazioa

Bestalde, Derrigorrezko Bigarren Hezkuntzako eta Batxilergoko ikasleei zuzendutako neurriak ere hartuko dituzte; izan ere, Internet bidez “gazteak errekrutatzen dituzte atentatuak egiteko”.

Ertzainak ere trebatuko dituzte, adituek emandako hitzaldi eta bideoen bidez.

Amaitzeko, Beltran de Herediak gogora ekarri du polizia ezberdinen arteko “koordinazioa” eta “informazio-trukaketa” ezinbestekoa dela, balizko atentatuak saihesteko. Beraz, ezinbestekotzat jo du Ertzaintzak gisa honetako gaia eztabaidatzen diren organoetan parte hartzea.

Ildo horretan, onartu du Ertzaintzak Schenguen eremuko datu baseetan sartzeko mekanismoak azkenaldian hobetu egin direla.