Estatutu berria eta transferentzien egutegia adostea dira Urkulluren erronka nagusiak
Eusko Jaurlaritzak gaur abiatu duen urte politiko berriari begira, bi erronka nagusi finkatu Iñigo Urkullu lehendakariak: batetik, estatutu berria adostea; bestetik, Gernikako Estatutuan jasota dauden eta oraindik transferitu ez diren eskumenak Euskadira eskualdatzeko egutegia hitzartzea Espainiako Gobernuarekin.
Tradizioari jarraituz, Eusko Jaurlaritzak Donostiako Miramar jauregian egin du uda osteko lehen gobernu bilera, eta sailburuekin batzarra egin ostean, Urkulluk agerraldia egin du kazetarien aurrean urte politiko berrirako helburuez eta erronkez hitz egiteko.
Autogobernuari dagokionez, Espainiako Gobernuarekin harreman bide berri bat ireki dela eta gai hori lantzeko aldebiko lantaldea osatu dela azpimarratu du lehendakariak. Urkulluren iritziz, Pedro Sanchez buru duen Espainiako Gobernu berriak "beste jarrera bat" hartu du eta horri esker posible izan da bi tren linearen transferentzia adostea eta Auzitegi Konstituzionaleko bi helegite atzera botatzea (polizia gehiegikerien legeari eta aurrekontu legeari erreferentzia eginez). Horri lotuta, bere erronka Gernikako Estatutua guztiz betetzeko Espainiako Gobernuarekin falta diren 37 eskumenak eskualdatzeko egutegia zehaztea dela nabarmendu du.
Estatutu berria ere hizpide izan du lehendakariak: "Gure helburua erakunde mailan bidea egingo duen eta Euskadiren autogobernuaren ahalmen politikoa indartzea eragingo duen estatutu berri bat lortzea da, Kontzertu Ekonomikoan eta autogobernuaren berezitasunaren aitorpenean oinarritua egongo dena". Ez hori bakarrik, estatutu berriaren inguruan EAJk eta EH Bilduk Autogobernu lantaldean lorturiko akordioa zabaltzearen alde mintzatu da. Ez du kinielarik egin nahi izan adostasun horretara batu daitezkeen alderdien inguruan, baina akordio hori zabaltzearen beharra berretsi du.
Elkarbizitzaren alorrean, Bertizeko adierazpenean jasotako bideari jarraituko diola adierazi du. Gauzak horrela eta ETAren behin betiko amaieraren ondotik, terrorismoak eragindako min bidegabearen aitortzeko eta espetxe politika berri baten alde lan egingo duela hitzeman du. Are gehiago, presoak gerturatzeko prozesua abian dela zehaztu du.
Datorren urteari begira, Urkulluren iritziz, ez litzateke inolaz ere "dramatikoa" izango Aurrekontuak luzatzea. Dena den, onartu du ez dela hori bere Gobernuaren lehen aukera eta talde parlamentario guztiekin hitz egingo duela aurreratu du. Iaz Jaurlaritzaren Aurrekontuak babestu zituen Alderdi Popularra kritikatu du eta bere arrazoiak azaldu beharko dituela esan dio.
Ekonomia gaiekin jarraituz, euskal ekonomiaren eboluzioa positiboa izaten jarraitzen duela iragarri du. Zentzu honetan, ekonomia % 2,8 haztea eta 17.800 enplegu sortzea aurreikusten du Jaurlaritzak.
Migrazioaren gaia ere hizpide izan du lehendakariak eta Eusko Jaurlaritzaren lana goraipatu du. Euskadin abian jarri den protokoloa hobetu eta aldatu daitekeela onartu arren, "aurkezten diren errealitate ezberdinei erantzuteko" aukera ematen duela aldarrikatu du. Ildo horretan, udan 3.200 pertsona baino gehiago artatu dituztela jakinarazi du.
Zure interesekoa izan daiteke
Ollo: "Demokraziaren aldeko borrokan ari zen alderdi karlista baten jarraitzaileak zituzten helburu"
Lizarrako Udaleko Memoria Batzordeak ekitaldia egin du 1976an Montejurran izan ziren gertakarien 50. urteurrenaren kariaz, eta bertan izan da Nafarroako Gobernuko bigarren lehendakariorde eta Memoria eta Bizikidetzako kontseilari Ana Ollo.
Gaur amaitu da Ernairen IV. kongresua
Ezker abertzaleko gazte antolakundeak, Ernaik, gaur amaitu du laugarren kongresua, Bergaran. Bi konpromiso berretsi dituzte bertan: gazteriarekiko konpromisoa eta Euskal Herriarekiko konpromisoa. Horren harian, gazteriaren behar eta kezkak politizatu eta askapen prozesuan txertatzeko ardura hartu dute.
Berdintasuna "betebehar demokratikoa" dela defendatu du EAJk emakume jeltzaleen lana omentzeko ekitaldian
Euzko Alderdi Jeltzaleak emakume jeltzaleen lana goraipatzeko ekitaldia egin du 1922an sortutako Emakume Abertzale Batzaren urteurrenean. Bertan azpimarratu duenez, berdintasuna "ez da aukera politikoa, betebehar demokratikoa baizik".
José Luis López de Lacalle kazetaria omendu dute haren hilketaren 26. urteurrenean
Andoaingo PSE-EEk antolatutako ekitaldian, frankismoaren aurkako militante sozialista historikoa omendu dute. Jose Luis Lopez de Lacalle 2000. urtean tirokatu zuen ETAk, etxeko atarian, egunkariak erostetik zetorrenean.
Pradalesek autoritarismoaren gorakadaz ohartarazi, eta Europa "arinago eta kohesionatuago" baten alde egin du
Lehendakariaren esanetan, nazioarteko zuzenbidea eta demokrazia liberalak mehatxupean daude mundu mailako populismoaren eta autoritarismoaren gorakadaren ondorioz. Euskadik Europa federal batean ahots propioa izatea aldarrikatu du.
50 urte Montejurrako gertakarietatik: karlisten arteko talka, italiar neofaxistak eta… Estatuaren konplizitatea?
Karlismoaren barne-gatazka bat ez ezik, Montejurrako hilketen atzean botere postfrankistek bultzatutako konspirazio izan zen, eskuin-muturreko beste elementu batzuekin batera.
Gurutze Gorriak 3.121 pertsona migratzaile artatu zituen Irunen 2025ean, aurreko urtean artatutakoen erdiak
Euskadik "iparraldeko muga" dela aldarrikatu du, eta "ziurtasuna" eskatu du Europako Migrazio eta Asilo Itunaren aurrean.
Maskaren epaiketa amaituta, epaiak argitu beharko ditu zalantzak
Jose Luis Abalosek, Koldo Garciak eta Victor de Aldamak pandemia garaian maskarak erosteko bi kontratu enpresa jakin bati eta akordio "itxi eta pribilegiatu" batekin esleitzeko erakunde kriminala osatu ote zuten argitu beharko du Auzitegi Gorenak. Zalantza hori eta beste batzuk argitzeko eperik ez du izango.
Polemikak gorabehera, Lander Martinezek ez du arriskuan ikusten EAJren eta PSE-EEren arteko koalizio gobernua
Lander Martinez Sumarreko diputatuak antzerkitzat jo du EAJren eta PSE-EEren arteko azken krisia. Horren arabera, jeltzaleek erabaki dute Moncloarekin harremana tenkatzea Eusko Jaurlaritzako edo aldundietako koalizio gobernuak zalantzan jarri beharrean. "Ez dute interesik gehiengo hori galtzeko", gaineratu du.
EAJk, PSE-EEk eta EH Bilduk zibersegurtasunari buruzko akordioa lortu dute, eta aliantzak PP haserrearazi du
Euskal Polizia modernizatzeko eskatu dio Eusko Legebiltzarrak Jaurlaritzari, ziberdelituen egungo hazkundeari eta ziberkrimenek etorkizunean ekarriko dituzten erronkei aurre egiteko.