Gaur eratuko da Kongresua, eta ikusteko dago Vox Mahaian izango den ala ez

Demokraziako XIV. legegintzaldia abiatuko da gaur, asteartea, Espainiako Gorteetan, eta diputatuek Kongresuko Mahaia osatuko duten kideak aukeratuko dituzte. Ildo horretatik, ikusteko dago Vox alderdiak Behe Ganberako zuzendaritza-organoan eserlekuren bat izango duen edo ez, eta alderdi horretako ordezkariek kargua hartzeko orduan Konstituzioari men egiteko zer formula erabiltzen duten.

Kongresua eta Senatua eratzeko saioak aldi berean egingo dira, 10:00etan, eta azaroaren 10eko hauteskunde orokorretan aukeratutako ordezkariak bertan izango dira.

Behe Ganberan, diputatu hautetsi zaharrena izango da bilkura zuzentzeko arduraduna: Agustin Javier Zamarron Moreno, PSOEkoa (73 urte). Eta bi ordezkari gazteenak izango dira harekin batera, idazkari lanetan: Marta Rosique, ERCkoa (23 urte) eta Lucia Muñoz Dalda, Unidas Podemosekoa (26 urte).

Ondoren, ganbera horretako gobernu-organoa osatuko duten bederatzi kideak aukeratuko dituzte, bozketa bidez. Hala, diputatuak euren eserlekuetatik jaitsiko dira, eta Presidentetza Mahaian jarriko duten hautetsontzian emango dute botoa.

Lehenik eta behin, Kongresuaren Mahaiko presidentea aukeratuko dute, eta, horretarako, gutxienez bi hautagai aurreikusten dira: Meritxell Batet (PSC) eta Ana Pastor (PP). Gehiengo osoa lortzen duena izendatuko dute presidente, eta, Bateten kasuan, PSOEren eta Unidas Podemosen akordioari esker ziurtatuta dituen botoez gain, beste 21 boto gehiago beharko ditu. Lehen bozketan inork ez baditu 176 boto lortzen, babes gehien lortu duten bi hautagaien arteko bozketa errepikatuko da, eta boto gehien lortzen dituena izendatuko dute presidente, gehiengo sinplearekin.

Ondoren, gobernu-organo horretako lau presidenteordeak aukeratuko dituzte. Horretarako, diputatuek izen bakarra idatzi ahalko dute boto-paperean, eta babes gehien jasotzen dituzten lau diputatuek beteko dituzte postu horiek. Gauza bera egingo dute lau idazkariak aukeratzeko.

Bozketa horiei begira, PSOE eta Unidas Podemos gainerako taldeen babesa lortzen ahalegindu dira azken orduetan, Voxek Kongresuko gobernu-organoan ordezkaririk izan ez dezan. Alabaina, oraindik ez dago argi zer geratuko den.

PPk, Kongresuan dituen ordezkarien arabera, gutxienez bi ordezkari izango ditu, eta uko egin dio sozialistek proposatutako "beto" horri. Hala, akordio bat proposatu die Voxi eta Ciudadanosi, PPk bi ordezkari eta beste biek bana izateko.

Alabaina, Voxek ez du Ciudadanosek ordezkaririk izatea nahi, eta bi postu dagozkiela azpimarratu du. Testuinguru horretan, bi alderdi horiek Kongresuko Mahaian ordezkari bana izateko ahalegina egingo dute PPko kideek, baina Voxek akordio horri uko egiten badio, ez dute baztertu PSOEren babesa bilatzea hiru eserleku bereganatzeko.

Gainera, Voxen jarrera horren aurrean, baliteke Ciudadanos sozialisten babesa bilatzen saiatzea, eta ez soilik PPrena.

Bozketak amaituta, aukeratutako bederatzi diputatuek dagozkien tokiak hartuko dituzte Kongresuko Mahaian, eta Mahaiko presidenteak Konstituzioa beteko dutela zin egiteko edo hitzemateko eskatuko die gainerako diputatuei, karguaren jabe egiteko.

Talde politikoek adierazpen edo "formula" ezberdinak erabiliko dituzte Konstituzioari men egiteko. Aurrekoetan, ERC, EH Bildu eta CUPeko diputatu independentistek "legeak hala aginduta" egin dute.

Ondoren, Ganberako presidenteak hitzaldia emango du, eta Kongresua eratutzat emango du.

Behe Ganberako Mahaia bilkura amaitutakoan bilduko da lehenengoz, talde parlamentarioen eraketa prestatzen hasteko (bost egun ditu horretarako). Abenduaren 12an amaituko da taldeak eratzeko epea, eta ordurako talderen batera batzen ez diren diputatuak Talde Mistoko kide izango dira.

Urtarrilera arte atzeratu daiteke Sanchezen inbestidura

Bestalde, Pedro Sanchez Espainiako Gobernuko jarduneko presidenteak ez du baztertu inbestidura-saioa urtarrilean egitea, eta ez die erantzun ERCrekin zer negoziatzen ari den galdetu dioten kazetariei. Ildo horretatik, arduraz jokatzeko eskatu die PP eta Ciudadanosi, egoera desblokeatu eta gobernua lehenbailehen osatu ahal izateko.

Hala, Sanchezek ez du aurreratu noiz osatuko den gobernua, baina "hauteskundeak ezin dira eta ez dira errepikatuko", azpimarratu du. Testuinguru horretan, gehiengo osoarekin (176 boto) presidente inbestitu ahal izatetik "oso gertu" daudela nabarmendu du.

"Lehenbailehen gobernu bat egotea nahi dugu. Ez dut datarik jarri nahi, ez dakit abenduaren 12an, 20an edo urtarrilaren 8an izango den. Argi dagoena da Espainiak gobernu bat behar duela jada", esan du Sanchezek.