24. Korrikak euskara komunitatea dela aldarrikatu, eta aurrera egiteko deia egin du amaierako mezuan

24. Korrikaren leloa (Euskara gara) abiapuntu, elkarlanean idatzi dute Korrikaren mezua Euskal Herriko zazpi gaztek. Bilboko azken kilometroa elkarrekin oinez osatu, eta hunkituta egin dute udaletxe plazan paratutako eszenatokirainoko bidea Oierrek, Oihanak, Elene Mengyuk, Beñatek, Aitzolek, Xalbatek eta Leirek. 

Lepo zegoen udaletxe plaza eta Areatza zituzten zain, 10 egunez sekretua izan den mezua entzuteko irrikaz. Eguraldia euskaltzalea balitz bezala, mezua irakurtzeko unean eguzkia atera da Bizkaiko hiriburuan.

Komunitatea, taldea, kolektiboa aldarrikatzeko mezua izan da aurtengoa, eta gazteen ahotsen eskutik heldu denez, orainari eta etorkizunari heltzeko dei etengabeak egin ditu. 

Euskarak egindako gorputz bat direla nabarmendu dute zazpi gazteek, "asaldatu, nekatu, hunkitu egiten dena", baina "beti aurrerantz doana". Hizkuntzaren dualismoaz ere mintzatu dira: "Pauso sendoz dabilela dirudi, baina zalantzatia ere bada gure gorputza. Birpentsatu zalea, beharrezkoa denean iritzia aldatzen duena".

"Gure gorputzak esan nahi duen dena euskaraz da, baina ez du esan nahi bakarrik euskara. Egin nahi du berba nekeaz, pozaz; botereaz, minaz. Egin nahi die orro batzuei eta irri besteei", erantsi dute.

"Euskara gara"

Gure hizkuntza zerbait bada, komunitatea dela adierazi dute zazpi gazteek. "Zenbat gara? galdetzen genuenok nortzuk garen ere jakin nahi dugu orain. Nondik garen, zergatik egiten dugun hau guztia, zerk sortzen duen gutasuna. Euskara gara diogu, ez euskara naiz. Komunitateaz ari gara. Beso zabalik dagoen gorputzaz, zeinak leihoak dituen begietan".

Euskarak aurrera egiteko, mugiarazteko duten ahalmena ere aldarrikatu dute: "Hizkuntzak eraldaketarako tresnak dira, leku bat ematen digute bizi gaitezen. Euskarak herri hau eman digu. Horregatik mintzo gara izateaz, egiteaz".

Ideia hori indartu nahi izan dute mezuaren amaieran: "Urrats bat eta bestea, aurrekoei jasoa dakargu ahots berrietan. Honaino heldu gara, bai, baina ez gara iritsi. Oraina berehala amaitzen da. Azalberrituta datoz munstro zaharrak, baina gorputz bat sortu dugu. Askotarikoa, konprometitua, indartsua. Eta gaur hemen badago, egongo da bihar ere. Euskara gara eta hemen gaude. Hemen gara eta euskaraz gaude. Aurrera goaz, bazatoz?". Galdera hori eginez bukatu dute, hain justu, 24. Korrikaren mezua.

Ondoren, Lurdes Etxezarreta AEKren Nazio Kontseiluko kideak hartu du hitza, eta Euskal Herriko gazte euskaldun eta euskaltzale guztiak lekukoa hartzera deitu ditu. “Bagoaz zuekin Pizkunde berri batera!”, aldarrikatu du. Era berean, euskaltegietako ateak zabalik dituztela gogorarazi die “gazte baina ez horren gazte” direnei.

Lau orduz, Bilbon barrena

Mezuaren zazpi egileek AEKko arduradunen eskutik jaso dute lekukoa. Betiko moduan, Korrikaren antolatzaileek egin dute azken-aurreko kilometroa. 

Aurrez, ehunka herritar xehek, elkarteetako kideek eta erakundeetako ordezkariek eraman dute, eskuz esku, lekukoa. ORAINek zuzenean jarraitu du ibilbide osoa. 

Zirraragarriak izan dira ibilbideko hainbat kilometro. San Mames inguruan izan da une horietako bat: Jose Angel Iribar atezain zuri-gorriari omenaldia egin nahi izan dio AEKk. Hark eraman du lekukoa estadioko harmailetan barrena.

Lehendakariak ere eraman du lekukoa, 25 urtean lehen aldiz

Indautxu auzoan, Montevideo etorbidean, Imanol Pradales lehendakariak jaso du lekukoa, eta 3.371. kilometroa egin du, Ibone Bengoetxea lehendakariordea ondoan zuela. 

2001ean Juan Jose Ibarretxek hartu zuenetik, lehenengoz eraman du lehendakari batek Korrikaren lekukoa.

Korrika helmugara helduta eta mezua zabalduta, festa lehertu da Bilbon. AEKk egitarau oparoa prestatu du egun osorako: kontzertuak, umeentzako jarduerak, herri bazkaria eta kaleko animazioa izan dira 6 gunetan banatuta.