Galindori agindua nork eman zion argitzea nahi du Pili Zabalak
Enrique Rodriguez Galindoren heriotzaren biharamunean, Pili Zabalak bere sentipenak azaldu dizkio EITB Mediari. Guardia Zibilaren jeneral ohia Joxean Lasa eta Joxi Zabala bahitzea eta hiltzeagatik zigortua izan zen. Joxi Zabala zenaren arrebak, gainera, Felipe Gonzalez Espainiako Gobernuaren presidente ohia epaitua izango denaren itxaropena duela azaldu digu.
Zabalak EITB Mediari azaldu dionez, atzo Galindoren heriotzaren berri izan zuenean "nire anaia etorri zitzaidan burura". Familiaren "tragediarekin" lotutako "oroitzapen triste asko" biziberritu ditu Zabalak. Lehenik, edozein kasutan, Galindoren familiari "doluminak" helarazi dizkio.
Intxaurrondoko kuartelaren arduraduna izan zen Galindo 15 urtez. "Militar bat zen, eta aginduak betetzen zituen", azaldu du Zabalak. Urte horietan, Joxean Lasa eta Joxi Zabalaren bahiketan eta hilketan parte hartu zuen, GAL taldeen Estatu terrorismoaren barruan.
Zabala familiaren egoera helarazteko eta hiltzaileari azaltzeko aukera bat emateko, Pilik bi eskutitz bidali zizkion guardia zibil ohiari. "Zaragozako etxean izan ditu nire eskutitzak, eta ez zituen irakurri nahi. Bueltan bidali zizkidan. Aukera izan zuen egindako delituez ardura edo kargu hartzeko; damua baldin bazuen, agertzeko, eta noski, familiari eragindako kalteagatik barkamena eskatzeko. Bi aukera izan zituen. Inoiz ez genuen erantzunik jaso", azaldu digu biktimaren arrebak.
Galindok 75 urteko kartzela zigorra jaso zuen Auzitegi Nazionalean, Lasa eta Zabala auzian. Lau urte eta lau hilabete eman zituen kartzelan. Osasun arrazoiengatik espetxetik atera zuten, eta handik urte batzuetara baldintzapeko askatasuna lortu zuen. Espetxe zigorraz gain, Guardia Zibiletik bota zuten. Pili Zabalaren arabera, "militar batentzako nahiko zigor handiak dira".
BIDEOA: Rodriguez Galindo, torturari lotutako gizona Euskal Herriko historian
Galindoren heriotzaren ondoren ere auziak nolabait irekita jarraitzen duela gogorarazi du Pilik. Urte askoren ondoren, oraindik egia ezagutzen ez dutela, aitortzarik ez dutela eta biktima gisa onartuta ez daudela salatu du Zabalak. "Gure hurrengo pausoa Felipe Gonzalez ikertzea da, eta jakitea nortzuk izan ziren benetan agindu horiek eman zituztenak", esan digu.
Zabalak uste du, Galindoren heriotzarekin, Espainiako Gobernuaren presidente ohiak "deskantsua" hartuko zuela. "Suposatzen dut Galindok bazekiela nork eman zion agindua, eta Gonzalezek orain badaki nork ezingo duen bera salatu", uste du.
Gonzalez ez dute inoiz epaitu Gobernuko presidentea zenean GALek egindako krimenengatik, horren inguruko "nahiko frogak eta ebidentziak" dauden arren. Zabalaren aburuz, "Gonzalez, noski, justizia baldin badago eta Estatu demokratiko batean bizi baldin bagara, epaitua izan beharko litzateke".
2021ak itxaropena ekar lezake Zabala familiarentzat. GALen atzean dagoen "erru politikoa eta morala" argitzeko Auzitegi Nazionalean aurrerapausoak eman daitezkeela uste du Pili Zabalak. "Fiskaltzatik erantzuna jaso dugu, eta argi uzten du jarraitu dezakegula esploratzen ari garen bide berri honetan, eta froga berriak agertuz gero, epaituak izan daitezkeela orain arte epaituak izan ez direnak", azaldu digu.
GALen atentatu, bahiketa eta hilketetatik lau hamarkada igaro direnean, Galindori agindua eman zioten "autore intelektualak" argitzea espero du Zabala familiak. "Felipe Gonzalez historiara pasa beharko litzateke benetan izan zenagatik. Presidentea, bai, baina talde terrorista baten arduradun nagusia ere bai", adierazi du Pili Zabalak.
Zure interesekoa izan daiteke
Otxandianok berdinen arteko negoziazioa eskatu du euskararen gaian eta Olanok erantzun du prozesuan lortu dezaketela adostasuna
EH Bilduk enplegu publikoaren lege proposamenak berdintasunean negoziatzea eskatu dio EAJri. Jeltzaleek, ordea, edukiei dagokionean oso urrun ikusten ditu bi proposamenak.
Uxue Barkosek ukatu egin du bere agintaldian ustelkeririk izan zenik, eta Cerdanekin inoiz ez duela negoziatu ziurtatu du
2015 eta 2019 artean Nafarroako Gobernuko presidente izan zenak hiru orduko agerraldia egin du Nafarroako Parlamentuko Ikerketa Batzordean.
Itxasok Otxandianori erantzun dio EH Bildu "hirigintza garapenaren eta eraikitzearen aurka" agertu dela udaletan orain arte
Etxebizitzaren arazoari aurre egiteari dagokionez, azken hamar urteak "galdutzat" jo ditu EH Bilduk. Baieztapen horren aurrean, Etxebizitza sailburuak "bakoitzak bere erantzukizuna bere gain hartzeko" deia egin du astearte honetan. Denis Itxasok "proposamen zehatzak" eskatu dizkie indar politikoei.
Euskadik "bakearekin, demokraziarekin eta giza duintasunarekin" duen konpromisoa defendatuko du Pradalesek aita santuarekin izango duen bileran
Maria Ubarretxena Eusko Jaurlaritzako bozeramaileak Gobernu Kontseiluaren osteko agerraldian azaldu duenez, Imanol Pradales lehendakaria Leon XIV.a aita santuarekin bilduko da asteazkenean Vatikanoan, eta, bertan, Euskadik "bakearekin, demokraziarekin, giza duintasunarekin eta justizia sozialarekin" duen konpromisoa defendatuko du.
Pello Otxandiano: “Orain arte ezagutu gabeko eskalan etxebizitza publikoa sustatzea proposatzen dugu”
EH Bilduk koalizioaren etxebizitza plana aurkeztu eta ordu gutxira, Pello Otxandiano, Eusko Legebiltzarreko koalizioaren bozeramailea, Radio Euskadiko Boulevard saioan izan da. Han, etxebizitza arloko bere alderdiaren proposamenak azaldu ditu, eta arreta berezia jarri du etxebizitza publikoko proposamenetan. “Badago ardatz bat bereziki garrantzitsua: herri honetan orain arte ezagutu gabeko eskalan etxebizitza publikoa sustatzea. Arazoari benetan heldu nahi bazaio, funtsezkoa da etxebizitza publikoaren parke handi bat sustatzea, azpiegitura sozial estrategiko gisa”, adierazi du.
Otxandiano: "Hemen ez da etxebizitza politikarik egin, politika inmobiliarioa egin da"
EH Bilduk "anbizio handiko" plan bat aurkeztu du, etxebizitza merkatuan esku-hartzearen aldeko apustua egiteko; Babes Ofizialeko Etxebizitzaren (BOE) "eskala handiko" sustapenaren alde egiteko, "ahalegin publikoa biderkatzeko"; eta etxebizitzaren "funtzio soziala babestearen" alde egiteko plana darabil koalizioak, beraien hitzetan.
Pedrosa: "Ikastetxeen integrazioak familiekin lan egitea eskatzen du; hausnartu egin behar da zergatik ari garen hori egiten, datuekin"
Begoña Pedrosa Hezkuntza sailburuak, Egun Onen, adierazi du Araban bost integrazio egin dituztela, eta "hamar ikastetxe" egon direla "inplikatuta". Bizkaian, ordea, ikastetxe batzuk beste batzuetan integratu direla jakinarazi du.
Ollo: "Demokraziaren aldeko borrokan ari zen alderdi karlista baten jarraitzaileak zituzten helburu"
Lizarrako Udaleko Memoria Batzordeak ekitaldia egin du 1976an Montejurran izan ziren gertakarien 50. urteurrenaren kariaz, eta bertan izan da Nafarroako Gobernuko bigarren lehendakariorde eta Memoria eta Bizikidetzako kontseilari Ana Ollo.
Gaur amaitu da Ernairen IV. kongresua
Ezker abertzaleko gazte antolakundeak, Ernaik, gaur amaitu du laugarren kongresua, Bergaran. Bi konpromiso berretsi dituzte bertan: gazteriarekiko konpromisoa eta Euskal Herriarekiko konpromisoa. Horren harian, gazteriaren behar eta kezkak politizatu eta askapen prozesuan txertatzeko ardura hartu dute.
Berdintasuna "betebehar demokratikoa" dela defendatu du EAJk emakume jeltzaleen lana omentzeko ekitaldian
Euzko Alderdi Jeltzaleak emakume jeltzaleen lana goraipatzeko ekitaldia egin du 1922an sortutako Emakume Abertzale Batzaren urteurrenean. Bertan azpimarratu duenez, berdintasuna "ez da aukera politikoa, betebehar demokratikoa baizik".