'Proces' auzian zigortutakoei indultua ematearen aurka agertu da Auzitegi Gorena

Sedizioa, diru publikoa bidegabe erabiltzea eta desobedientzia egotzita zigortutako hamabi buruzagi independentistei indultua ematearen aurka agertu da Auzitegi Gorena.

Zigor Arloko Aretoak egin du txostena (ez da loteslea Exekutiboarentzat), eta ez du graziazko neurria onartu nahi izan. Gobernuaren esku dago orain erabaki hori, eta Gorenaren eta Fiskaltzaren irizpenak (biak aurkakoak) aztertu ondoren hartuko du erabakia, udan.

Epaileen ustez, ez da zigorren proportzionaltasun printzipioa urratu, ez baitago frogarik ezta damu zantzurik ere.

Era berean, hirugarrenek egindako indultu-eskaeren oinarrian dauden argudioek indultuaren zentzua desenfokatzen dutela azpimarratu dute, erantzukizun penal kolektiboa marrazten dutelako eta, gainera, Gobernuak Auzitegi Gorenak emandako epaia zuzentzea nahi dutelako.

Epaiak azpimarratzen duenez, ezarritako zigorraren iraungitze osoa edo partziala babesteko arrazoiek edozein justifikazio galtzen dute "preso politiko gisa aurkezten direnean ordena konstituzionala alde bakarretik iraultzeko, erakundeen ohiko funtzionamendua iraultzeko eta, azken batean, gainerako herritarren sinesmenen aurrean norberaren kontzientzia inposatzeko mobilizazioa egin dutenak".

Txostenean jaso dutenez, zigorra ezartzea legitimatzen duen helburua betetzen duenean bakarrik ez da beharrezkoa izango. Horrela, "prebentzio bereziko helburuek porrot egin dutela egiaztatzeak, ahalegin gehiago egin beharrik gabe antzeman daitekeenak, zigortuen alde eskatutako indultuaren aurka egitea eskatzen du".

Bizikidetza demokratikoa hautsi zuten

Magistratuek uste dute zigortuak bergizarteratzeko helburua zaharkituta dagoela, "baina ideia hori ez da bateraezina honako hau onartzearekin: balio demokratikoetan oinarritutako gizarte pluralista batek, zigor bat ezarriz, eska dezake bizikidetzaren oinarriak haustea inoiz ez dadila izan aldebakarreko erabaki baten emaitza".

Bertan jaso dutenez, "sustatzaileen irudimenean soilik existitzen den estatu berri bat eraikitzera arduragabeki bultzatzen duen herritarren mobilizazio engainagarrian oinarrituta dago".

Txostenaren arabera, damuaren baldintza legala malgututa ere, epaileek ez dute ikusten "urratutako ordena juridikoarekin berriz elkartzeko borondaterik".

"Azken hitza erabiltzeko eskubidean eta ondorengo adierazpen publikoetan kondenatuek helarazitako mezuak bizikidetza demokratikoaren zutabeen aurkako erasoan berriro eragiteko borondatea adierazten du, eta onartzen du, halaber, beren ideal politikoen aldeko borrokak herritarren mobilizazioa baimenduko lukeela".

Jordi Cuixart Omnium Culturaleko buru eta sedizioagatik zigortutakoa aipatzen du txostenak, eta harek aretoari emandako erantzuna dela adibiderik garbiena; izan ere,  egin zuen guztia berriro egingo zuela esan zuen, ez zuelako deliturik egin.