EH Bilduk eta ELAk euskararen normalizazioaren aurkako oldarraldi judiziala salatu dute

Euskal Autonomia Erkidegoko Auzitegi Nagusiak euskararen erabilera normalizatzeko dekretuaren inguruan hartutako erabakiak harrabotsa sortu du alderdi eta sindikatuen artean. EH Bilduko legebiltzarkide eta Hizkuntza Normalizaziorako idazkari Josu Aztiria izan da gaiari heldu dion politikarietako bat. Berretsi duenez, euskarak "estatus juridiko berri bat" behar du.

"Kontu formalak tarteko, gure hizkuntzaren arkitektura legala eraitsi nahi dute. Horregatik, PPren eta Voxen erasoei erantzuteko "ausardiaz, arduraz eta herri ikuspegiaz jokatu behar dugu", nabarmendu du. 

ELAren iritziz, "oso larria" da dekretua baliogabetzea

ELA sindikatuak "oso larritzat" jo du EAEko Justizia Auzitegiaren erabakia. ELAren ustez, erabaki judizial hori Administrazio Publikoan euskararen normalizazioak jasandako oldarraldi judizialaren "adibide bat gehiago" da. 

"Balorazio juridiko zehatza" egiteko epai osoa sakon aztertzeko zain, ebazpena "oso larria" dela esan dute sindikatuko ordezkeriek, eta salatu dute "horrelako prozesu eta ebazpenen atzean euskararen normalizazioa oztopatu nahi duten sektore judizial, politiko eta sindikal batzuen bultzada euskarafobikoa" dagoela, "gaztelaniaren nagusitasunari eusteko eta euskararen erabilera mugatzeko".

Eusko Jaurlaritzak euskararen "inposizioaren aldeko apustua" egin izana salatu du Voxek 

Bestalde, Voxek salatu du Eusko Jaurlaritza euskara inposatu nahian dabilela, horrek dakarren "diru publikoaren kostua" zehaztu gabe.