Espainiako Gobernuak "errespetatzen du" Konstituzionalaren epaia, "baina ez dago ados", dio Llopek

Pilar Llop Espainiako Justizia ministroak asteazken honetan adierazi duenez, Espainiako Gobernuak "errespetatzen du" Auzitegi Konstituzionalaren epaia, baina ez dago horrekin ados; hain zuzen ere, Konstituzionalak konstituzioaren aurkakoak jo ditu pertsonen eta ibilgailuen mugikortasuna mugatzeko koronabirusaren pandemiako lehen alarma-egoeraren dekretuak ezarritako murriztapenak. Horrez gain, Llopek ziurtatu du konfinamenduak milaka eta milaka bizitza salbatu zituela; agerraldi batean, aurreratu du espainiar Gobernuak "sakonean" aztertuko duela epaia; pertsonen zirkulazio librea salbuespen-egoeratan soilik galarazi daitekeela azpimarratu du epaimahaiak.

Gainera, Justizia ministroak nabarmendu du berme-auzitegian zatiketa izan dela; Llopen arabera, bere Gobernuak epaiaren alde egin duten sei epaileen irizpidea errespetatzen du, baina argi utzi nahi izan du Espainiako Gobernuak konstituzio-parametroak kontuan izan zituela, Auzitegi Konstituzionaleko beste bost epailek aldeztu dutenez.

Llopek gogora ekarri du Auzitegi Gorenak eta Auzitegi Konstituzionalak berak, aurreko epai batzuetan, abala eman ziotela alarma-egoerari.

Justizia ministroak, halaber, azpimarratu du "espainiar demokraziak" legean jasota dagoelako baliatu zuela alarma-egoera; esan duenez, gauza bera egin zuten Europako beste hainbat herrialdek, Munduko Osasun Erakundeak egoera pandemiatzat jo zuenean, "gaixotasunaren hedapena eta larritasuna oso kezkagarriak zirela".

"Une hartan, Gobernuaren betebeharra premiazko neurri egokiak segituan hartzea zen; izan ere, ezagutzen ez genuen birus bat hedatzen ari zen, eta milioika herritarren bizitza babestu behar zen", berretsi du.

Darias: "Txertorik onena izan zen"

Carolina Darias Osasun ministroak ere egin du lehen alarma-egoerako etxeko konfinamenduaren alde; izan ere, garai hartako "txertorik onena" izan zen, artean txertaketa-gutunik ez zegoenean.

Prentsaurrekoan, Dariasek ziurtatu du pandemiaren hasieran konfinamendua izan zela arma bakarra, koronabirusari aurre egiteko.

"Pandemia madarikatu honetan sartu ginenean, 2020ko hasieran, arma bakarra genuen, txerto bakarra: konfinamendua. Une hartan, txertorik onena izan zen. Gaur egun, urtebete eta erdi joan denean, egoera erabat bestelakoa da", txertaketari esker, nabarmendu du Osasun ministroak.  

Erreakzio gehiago

Testuinguru honetan, alderdi batzuek ere eman dute Konstituzionalaren erabakiaren gaineko euren iritzia; Espainiako Gobernuan PSOErekin batera dabilen Unidas Podemosen, Pablo Echenique Kongresuko bozeramaileak nabarmendu du egun berean, hau da, asteazken honetan, Auzitegiak "milaka bizitza salbatu zituen" alarma-egoeraren aurka egin duela eta Garcia Lorcaren hobia aurkitzea galarazi duela: "Auzitegi 'Voxtituzionala' izaten has daitezke, eta hauteskundeetara aurkez litezke", gehitu du.

PPko lider Pablo Casadok eskatu dio Pedro Sanchezen Gobernuari Pandemia Legea onartzeko; Casadoren ustez, epaiak erakusten du PPk arrazoia zuela, eta alderdi horren jokabidea "arduratsua" izan zela. Hori bai, argi utzi du ez duela ospatu Konstituzionalaren erabakia.

Santiago Abascal Voxeko liderraren iritziz, bestalde, alarma-egoeraren barnean herritarrei ezarritako isun guztiak bertan behera utzi beharko lituzkete.

Llopek agerraldia egin aurretik ere, Espainiako Gobernuak esana zuen alarma-egoera "legezkoa eta bizitzak salbatzeko nahitaezkoa" izan zela. Horrez gain, dekretua Espainiako Konstituzioa eta Alarma Egoeraren lege organikoa betez onartu zela ziurtatu du. Amaitzeko, gogorarazi du alarma-egoeraren kontrako helegitea Voxek jarri zuela; Espainiako Gobernuak gogora ekarri du eskuin muturreko alderdiak lehen alarma-egoera ezartzearen alde bozkatu zuela, Kongresuan egindako bozketan.