Krisiaren kontrako neurrien dekretua onartu du Diputatuen Kongresuak

Ukrainako gerrak eragindako krisia arintzeko neurrien dekretua aurrera atera da azkenean Diputatuen Kongresuan, nahiz eta ERCk kontrako botoa eman, EH Bildu, EAJ eta PDeCAT alderdien babesari esker, besteak beste.

Espainiako Gobernuak arriskuan ikusi du bere dekretua, Pegasusen espioitza politikoa dela eta. Izan ere, bere babes parlamentarioak kolokan jarri ditu, baina, azkenean, ERCk kontrako botoarekin Sanchezi "lehen abisua" eman dion arren, EH Bilduk alde bozkatu du, neurriak arriskuan ez jartzeko "erantzukizuna" aukeratuta, eta onartzea ahalbidetu du.

Exekutiboko taldeez gain —PSOE eta Unidas Podemos—, EAJk, EH Bilduk, PDeCATek, Mas Paisek, Compromisek, PRCk, Nueva Canariasek eta Teruel Existek ere babestu dute dekretua. Coalicion Canaria abstenitu egin da, eta kontra bozkatu dute, ERC eta CUPez aparte, PPk, Voxek, Ciudadanosek eta Foro Asturiasek.

Dekretuaren alde bozkatuko zuela iragarri duenean, EH Bilduk "ardura" aipatu du. Mertxe Aizpurua bozeramaile abertzaleak azaldu duenez, neurriak babestu dituzte krisiaren ondorioei aurre egiteko "onak" direlako, baina faltan bota dituzte "kausetan" eragina izango luketen egiturazko neurriak. Koalizioak "arduraz" jokatzea erabaki du, "jendearekin duen konpromisoari erantzuteko, ez Gobernu honekin duen konpromisoari".

"Herritarrek ezin dituzte ordaindu gobernu honen akats larriak", esan du Aizpuruak, eta baztertu egin du Pegasusen espioitza politikoagatik dekretuari ezezko botoa ematea. Zentzu horretan, EH Bilduk "erantzukizun eta errespetu bera" eskatu dio Exekutiboari ezkerreko independentistek "herritarrei eskubideak zabaltzea ahalbidetu dietelako" Gobernuari legegintzaldi osoan emandako babesarekin.

"Gobernu honek aurrera egitea ahalbidetzen dugunoi espiatzea ez da errespetua izatea, ezta erantzukizuna erakustea ere", esan dio Felix Bolaños Presidentetza, Gorteekiko Harreman eta Memoria Demokratikorako ministroari.

EAJk ere neurrien alde bozkatu du, baina omnibus dekretu baten barruan banaka babestuko ez lituzketen neurriak sartzea kritikatu du. Idoia Sagastizabal diputatu jeltzaleak bere babesa defendatu du herritarrei neurri horiek ez kentzeagatik, baina espioitzaren gatazka "larriaren" zein elkarrizketa faltaren aurka egin du. "Ezin da etengabe soka ahula zeharkatzen ibili, azkenean erori egiten zarelako", ohartarazi du.

Kataluniako alderdi independentisten artean, PDeCATek baino ez ditu babestu Pedro Sanchezen neurriak.

ERCk dekretuaren aurka bozkatu du, Gobernuari egindako "lehen abisu" gisa, espioitza kasuan erantzukizunak bere gain har ditzan. "Esquerra Republicanak eskua luzatuta jarraituko du jendeari laguntzeko neurriak bultzatzeko, baina inoiz ez oinarrizko eskubideen defentsari uko eginez", adierazi dute. CUPek ere Pegasus auzia aipatuta iragarri du bere ezezko botoa.

Unidas Podemosen esker ona

Unidas Podemosek eskerrak eman dizkie espioitzaren biktima izan baina dekretuaren alde bozkatu duten alderdiei. "Errege Lege Dekretua babestuko ez dutenei ere eskerrak ematen dizkiegu, jakin baitakit aurrerapenak eta negoziazioak egon balira aldeko botoa pentsatu dutela", gaineratu du Pablo Echeniquek.

Halaber, PSOErekin batera parte hartzen duen Gobernuari espioitza kasua, "lotsa demokratiko bat", argitzeko eskatu dio.

Eskuinaren ezetza

Jaime de Olano PPko diputatuak kritikatu du Gobernuak ez duela lege-dekretuan sartu "beste talde batek proposatutako neurririk": "Ez dute hitzik, baina PPk badu. Feijoo jaunak badu ", esan du. Bolaños ministroari berriz hitz egiteko eskatu dio, "PPrekin konpromisoa hartzeko", eta, hala egiten ez badu, "bere babesa" nahi izan ez dutela ulertuko duela gaineratu du, aspaldi aukeratu dituztelako bazkideak".

Bere hitzaldian, Ivan Espinosa de los Monteros Voxen bozeramaileak esan du bere alderdiak ez duela onartzen Gobernuak lege-dekretuarekin Ganberaren esku uzten duen "xantaia", eta Edmundo Bal Ciudadanoseko kideak bere taldeari "barre egitea" leporatu dio Gobernuari.

Gobernuak herritarrei kalte egitea leporatu dio oposizioari, "Gobernuari kalte egiteko helburu bakarrarekin"

Aurretik, Felix Bolaños ministroak dekretua defendatu du bozketa hori "ez delako Gobernuaren ingurukoa, herritarrei laguntzearen ingurukoa baizik". Besteak beste, erregai-litroko 20 zentimoko hobaria eta gutxieneko bizi-sarreraren igoera nabarmendu ditu.

"Gaur egun errege lege-dekretu honi ezetz esaten diotenak herritarrei kalte egiten ari dira, Gobernuari kalte egiteko helburu bakarrarekin", gaineratu du, eta "konponbide garaia" dela gaineratu du. Diputatuei "aukeratu zituzten pertsonek bozkatuko luketen bezala bozkatzeko" eskatu die.