Lehendakariak konpromisoa hartu du hurrengo sei hilabeteetan Osakidetzako itxaronaldiak murrizteko

Iñigo Urkullu lehendakariak autokritika egin du, osasun arloko profesionalen defizita eta itxaron-zerrenda luzeak aitortu ditu, eta, horren aurrean, datozen sei hilabeteetan Osakidetzako itxaron-zerrendak murrizteko konpromisoa hartu du, eta datozen zortzi urteetan 1.200 milioiko inbertsioa egingo dutela iragarri du.

Eusko Legebiltzarrean egiten ari den Politika Orokorrari buruzko Eztabaidan, lehendakariak Jaurlaritzaren 2012az geroztiko jardunaren errepasoa egin du, legegintzaldiaren balantzea egin du eta legegintzaldiaren amaierarako konpromiso batzuk proposatu ditu.

Zehazki, Osakidetzako itxaron-zerrendei dagokienez, lehendakariak konpromiso hauek planteatu ditu:

- Ebakuntza kirurgikoetan batez beste 65 eguneko atzerapena berreskuratzea.

- Gaixo onkologikoentzako 30 eguneko itxaronalditik jaistea.

- Bihotzeko kirurgietarako 90 egunetatik jaistea.

Lehen Mailako Arretari dagokionez, "datozen sei hilabeteetan 48 orduko itxaronalditik jaisteko eta presentzialtasuna egungo % 61etik % 70era igotzeko" konpromisoa hartu dutela iragarri du, "telefono bidezko eta aurrez aurreko hitzorduen arteko oreka handiagoa lortuz". Helburu horiek lortzeko, Urkulluk 1200 milioi euroko inbertsioa aurreratu du zortzi urtetan, "osasun-zentroak berritzeko eta ekipamendu mediko berriak erosteko".

Autogobernua eta Estatuaren lurralde-eredua

Gainera, lehendakariak iragarri du, Bitariko Batzordea aktibatzea proposatu ondoren, lau transferentzia-proposamen berri eskatuko dizkiotela Espainiako Gobernuari: Pasaiako Portua, Fogasa, Paradores eta Osasun Eraikinen Titulartasuna.

Bestalde, autogobernuan aurrera egiten jarraitzeko intentzioa berretsi du, eta, horretarako, "autogobernu estatus berri baterako adostasunak" sustatuko ditu. Iñigo Urkulluk aitortu duenez, "legegintzaldia amaitu arteko hilabeteak ez dira akordio bat lortzeko garai aproposak, baina bai akordioa prestatzeko garaia".

Lehendakariaren iritziz, "Espainiako Gobernuak, Estatuko indar politikoek eta Erkidego Historikoetako erakunde eta indar politikoek erronka bera dugu", lehendakariaren ustez: "Espainiako Estatuaren nazio aniztasuna aitortzea".

Hori garatzeko, berriz ere mahai gainean jarri du Konstituzio Konbentzio baten proposamena, "Itunaren bidez esparru instituzionalaren funtzionamendua modernizatu eta hobetzeko gonbidapena". "Konstituzio Konbentzioa lan-metodologia bat da, eta nazioarteko aurrekari egiaztatuak ditu".

Etxebizitza

Etxebizitzaren arloan, lehendakariak iragarri du Europako Funtsek izapidetze prozesuan dauden baina betetzeko geratu diren dirulaguntza eskaerak Euskadiko aurrekontuarekin ordainduko direla, 60 milioi euroko diru-partida bideratuta.

"Hiru urterako konpromisoa da Euskadiko etxebizitza guztien % 10 kudeatzea. Hau da, 88.500 etxebizitza baino gehiagoko etxebizitza babestuak izatea, alokairuan % 4 izanik. Helburua argia da: prezioen eta alokairuen igoerak modu erreal eta eraginkorrean arintzea ", azaldu du.

Hala, ziurtatu du aurten 90 milioi euro bideratuko dituztela alokairu sozialeko programetara, Alokabideren eta Biziguneren bitartez, eta Gaztelagun Programa zuzenduko dutela, gazteei etxebizitza eskuratzen laguntzeko, 19 milioiko inbertsioarekin. Eraikinak birgaitzeko laguntzak ere bere horretan dirau.

Euskara

Euskararen alorrean, biziberritze prozesuak 40 urte bete dituen honetan, lehendakariak "gure nahiaren eta eskubidearen defentsa" egin du, "baina baita legearen defentsa ere. Euskara, euskaldunon hizkuntza propioa izateaz gainera, hizkuntza ofiziala da gure Erkidegoan, gaztelaniarekin batera". Horren ildotik, Iñigo Urkulluk esan du arlo askotan euskara gutxietsia dagoela, edo zuzenean ez dagoela. "Hemen gauden askok, herritar askok, gure bizitzan euskarak toki gehiago edukitzea nahi dugu".

Hori dela eta, euskararekiko konpromiso zehatza hartu du, "legealdia amaitu aurretik onartuko dugu hurrengo 10 urteetan hizkuntza politikak hartu behar duen norabidea zehazten duen dokumentua". "Jaurlaritzaren nahia da Hezkuntzaren Legea onartzea Legebiltzar honetan".

"Orain, datozen berrogei urteetako norabidea finkatzea dagokigu Legebiltzar honetan gaudenoi, malgutasunez jokatuz baina helburuak argi edukita. Eta ahalik eta atxikimendu eta adostasun mailarik altuenarekin", gaineratu du.

Lehendakariak garrantzitsutzat jo du Europar Batasunean euskara, katalanera eta galizierari estatus ofiziala onartzeari. "Uste dut erabaki horrek bermea eta babesa emango dizkigula euskal hiztun bezala dagozkigun hizkuntza eskubideetan, eta bultzada emango diola gure hizkuntzaren estatusari Espainiar estatuan".