Lehendakaria: “Tentsioa ezagutu gabeko mugetaraino areagotuko da; kezkatzen nau Madrilek arreta galtzea eta adostutako konpromisoei ez heltzea”

Imanol Pradales lehendakaria Radio Euskadiko "Boulevard" saioan egon da gaur, eta Madrilen sortzen ari den giroaz ohartarazi du, bereziki Jose Luis Rodriguez Zapatero presidente ohiaren inputazioaren ondoren.

“Madrilgo giroa lehenagotik ere nahasia bazen, tentsioa inoiz ezagutu gabeko mugetaraino areagotuko da. Kezkatzen nau Madrilek arreta galtzea eta Euskadirekin adostutako konpromisoei ez erantzutea”, adierazi du.

Horrela, lehendakariak azpimarratu du Espainiako Gobernuak herritarren eguneroko arazoetan jarri behar duela arreta, hala nola osasunean, medikuen grebak eragindako ondorioak direla eta. Horren esanetan, badira “herritarrentzat garrantzitsuak diren gaiak”, eta gobernuak horiei heldu behar die.

“Herritarrei benetan axola zaiena lehenetsiko duen gobernu bat behar dugu, eta Euskadiri dagokionez, adostutako gaiak lantzen jarraituko duena”, nabarmendu du.

Zapatero auziaz

Era berean, Zapatero auziak politikaren sinesgarritasunean izan dezakeen eraginaz ere mintzatu da. “Herritarrek politikan duten konfiantzari eragiten dion auzia da. Atxikimendu falta eta urruntzea handitu ditzake”, esan du.

Horren harira, lehendakariak "zuhurtziaz" jokatzeko deia egin du. "Oso gertakari larria da: Espainiako Gobernuko presidente ohi bat epailearen aurrean eseriko da inputatu gisa (...) Nolanahi ere, zuhurtzia irizpideari eutsi behar zaio, errugabetasun presuntzioa errespetatuz eta epaileei beren lana egiten utziz", adierazi du.

Halaber, lehendakariaren iritzian, autoa "irmoa" da eta "ondo arrazoitua" dago: "Azken egunotan joera askotako aditu juridikoek esan dutena nahiko bat dator. Auto irmoa eta ondo arrazoitua da, baina instrukzio fasean gaude oraindik, zehazki ikerketa fasean".

Estatus berria eta Gernikako Estatutua

Ildo horretan, lehendakariak autogobernuaren estatus berriari buruzko negoziazioaz ere hitz egin du, "aurrerapausoak" eman direla adierazi du, baina ohartarazi du San Ignazio egunera arte geratzen den denbora "gakoa" izan daitekeela.

Pradalesek, era berean, nabarmendu du "erabat murgilduta" dagoela Gernikako Estatutua osorik betetzeko lanean. "Helburu hori betetzeko hamar pauso falta dira", esan du. Horren arabera, datozen asteak erabakigarriak izan daitezke negoziazio horretan, eta "uda aurretik transferentzien aldebiko batzordea" egin beharko litzateke.

PSE-EErekiko harremana

EAEko erakunde nagusietan bazkide diren EAJren eta PSE-EEren arteko harremanez galdetuta, Pradales lehendakariak bere gobernuko kontseiluan dagoen "konfiantza eta errespetu giroa" goraipatu, eta honakoa erantsi du: "Horri esker, euskal gizarteari kezka eragiten dioten gaietan jar dezakegu arreta: etxebizitza, osasuna, segurtasuna...".

PSE-EEk sare sozialetan zabaldutako memeaz ere mintzatu da, EAJren EBBko presidente Aitor Esteban igerileku batera jauzi egiten erakusten zuen irudiaz. Horren harira esan duenez, "politikan garrantzitsua da pertsonak errespetatzea".

Nolanahi ere, sozialistekiko harremanak onak direla azpimarratu du: "Urruntzen gaituena baino gehiago da batzen gaituena. Eta batzen gaituen hori zaindu egin behar da".

Euskara

Azken hilabeteetan EAJ eta PSE-EE aldendu dituen gaietako bat euskararen kudeaketa administrazio publikoan izan da. Lehendakariak azaldu du PSE-EErekin akordioa lortzen saiatu zirela, baina ez zutela adostasunik erdietsi, eta orain EH Bildurekin elkarrizketan ari direla, baina ez dakiela akordioa lortuko duten.

Edonola ere, euskararen inguruko adostasunak zabaltzeko deia egin du, eta azken hamarkadetan eraikitako adostasunei esker euskararen ezagutza eta erabilera handitu izana nabarmendu du. "Euskarak zubi gehiago eta harresi gutxiago behar ditu", esan du.

Gainera, "fokua ez galtzeko" eskatu du. Horren esanetan, arazoa ez da euskarak administrazioan duen pisua, baizik eta "migrazio fenomenoak" euskal "identitatean" eta hizkuntzan izan dezakeen eragina, edota euskarak pantailetan eta mundu digitalean duen presentzia.

Medikuen greba

Bestalde, lehendakariaren esanetan, Osasun ministro Monica Garcia “arazo bat” da, “duela bi hilabete baino gehiago ez duelako medikuen grebaren inguruan ezer jakin nahi”. Horren ustez, Estatutu Markoaren harira piztutako gatazka ministroak berak eragin du.

Horregatik, auzian “neurriak hartzeko” eskatu dio, eta  konponbiderik eman “ezin badu edo nahi ez badu”, eskumenak Euskadiri eskualdatzeko galdegin du, “irtenbide bat bilatzeko”.

Pradalesek deitoratu duenez, Osakidetzako batez besteko itxaron-zerrendak hobetzeko “urrats handiak” eginak zituzten, baina estatutu markoaren kontrako medikuen grebak, “Espainiako Osasun Ministerioaren erabaki baten ondorio etorri denak”, egoera “nahasi” du. Arazoari “Euskaditik eta dagozkion eskumenen barruan” erantzuten saiatzen ari direla gaineratu du.

Munduko Txapelketa Bilbon eta Donostian

2030eko Munduko Txapelketaren egoitzen inguruko eztabaidaz galdetuta —Bilbo eta Donostia egoitza izan behar ote diren—, lehendakariak adierazi du FIFAk “baldintza leoninoak” eskatu dituela, eta egoeraren “azterketa pausatua” egitea galdegin duela, auziak sektore askori eragiten dielako. “FIFAk datorren urteko urtarrilean hartuko du erabakia; denbora badago”, nabarmendu du.

UPNren polemika

Halaber, lehendakariak “babesa eta elkartasuna” adierazi dizkio Athletici, UPNk taldearen elastiko berria erabiltzea debekatzeko egin duen eskaeraren harira. Izan ere, kamisetaren diseinuan Euskal Herriko mapa ikus daiteke, ikurrinaren koloreekin.

Pradalesek gogorarazi du Nafarroako Gobernuak berak “argi eta garbi” esan duela “lege aldetik ez dagoela ezer zalantzan jartzeko modukorik”. Haren hitzetan, “UPNk liskarra eta zatiketa eragiteko baliatu nahi duen polemika erabat antzua da”.

Lehendakariak ohartarazi du “oso arriskutsua” dela “sinboloekin eta identitateekin zatiketaren eta enfrentamenduaren jokoan aritzea”, eta polemika hori “ez hauspotzeko” eskatu du.