Usansolo udal independentea da jada, Bizkaiko 113. udala, hain zuzen

Usansolo udal independente bihurtu da ostegun honetan Espainiako Gobernuak Toki Erakundeen Erregistroan inskribatu baitu gaur goizea. Galdakaotik bereizteko prozesua amaituta, Bizkaiko 113. udal da, dagoeneko, Usansolo. 

Usansoloko Kudeaketa Batzordeko presidente Agustín Aizpuruk azaldu duenez, gaur goizean jaso dute Espainiako Gobernuaren oharra, erregistro horretan inskribatu dutela baieztatuz. Horrenbestez, Usansolo "eskubide osoko udalerri" bihurtu da.

Erregistro horren arabera, herria udalerri independentea da joan den abenduaren 22tik, Kudeaketa Batzordeak eskaera aurkeztu zuenetik; 4.520 biztanle ditu, 7,27 kilometro koadroko azalera eta 621,73 biztanleko dentsitatea kilometro bakoitzeko.

Kudeaketa batzordeko presidentea pozik agertu da Usansolo eskubide osoko udalerria delako jada, eta nabarmendu du, Estatuko erregistroan izena emanda, "banantze prozesua amaitzen" dela eta "herria egiteko garaia, Udala egiteko garaia hasten" dela, bai eta "zer udalerri eredu nahi dugun ikusteko garaia" ere. 

Usansolo Herria plataforma independenteko kide den Aizpuruk aitortu duenez, azken hilabeteetan prozesua bizkortu egin da, "astroak lerrokatu egin dira eta inoiz baino babestuago sentitu gara alderdi politikoekin eta erakundeekin", eta hori "oso polita" izan da.

Lau hamarkadako prozesu baten amaiera ospatzeko, Usansoloko Kudeaketa Batzordeak "festa txiki" bat antolatuko du gaur bizilagunekin, arratsaldeko zazpietan, Unkina plazan, eta, Gabonen ondoren, "Desanexioaren Eguna" ospatuko dute, hainbat ekitaldirekin.

Galdakaoko alkateak, Iñigo Hernandok (EH Bildu), ziurtatu du Galdakaoko tokiko arduradunek "lasaitasunez" jarraituko dutela lanean batzorde kudeatzailearekin eta Aldundiarekin batera, "prozesu mailakatu" batean lagundu eta "Usansolo ahalik eta modurik onenean sor dadin". 

Iazko abenduan, Estatuko Abokatutzak errekurtsoa aurkeztu zuen Bizkaiko Batzar Nagusiek, 2.500 biztanletik gorako udalerriei udalerriak eratzea ahalbidetzen dien foru-arauan oinarrituta, azaroan onartutako Usansoloren bereizketa-erabakiaren aurka. 

Joan den abenduaren 19an, Pedro Sanchezen inbestidurarako EAJrekin egindako akordioaren bidez, Espainiako Gobernuak 5.000 biztanletik 4000 biztanlera jaitsi zuen udalerri independente izateko biztanle-guneek bete behar duten gutxieneko populazio-atalasea.

Pasa den astean, Ministroen Kontseiluak errege dekretuz onartu zuen tokiko erakundeen legearen aldaketa hori, eta oraindik kongresuak onartu beharko duen arren, aldaketa bideratuta, estatuko abokatutzak uko egin dio helegitearekin jarraitzeari.

2027koak izango dira Usansolon lehen udal hauteskundeak. Bien bitartean batzorde batek kudeatuko du Udala, Usansoloko Batzorde Kudeatzaileak. 11 kidek osatzen dute batzorde hori, Usansolo Herria Elkarteko zortzi kidek, EAJ-PNVko bik eta EH Bilduko kide batek. Juan Agustin Aizpuru Izagirre (UH) izango Batzorde Kudeatzailearen presidentea.

Batzorde honek joan den ostiralean, abenduak 22an, egin zuen erregistrorako eskaera, eta gaur, hilak 28, eman du azken urratsa Espainiako Gobernuak.

Etxanobek Bizkaiko 113. udalaren eraketa txalotu du

Bizkaiko ahaldun nagusi Elixabete Etxanok txalotu egin du Usansolo Bizkaiko 113. udal gisa eratzea, eta azpimarratu prozesu "luze" bati bukaera eman diotela horrekin, Aldundiak, "berme guztiekin", "behar izan duen bultzada" eman diola gogora ekarrita.

Ohar batean, Etxanobek esan du "hasieratik" Usansoloko herritarren eskaeraren "berri eman" zuela, "udal bat gehiago izan zedin".

Bestalde, EH Bilduk Usansolon duen taldeak dei egin die Usansolo Herria plataformari eta EAJri udal berri bat osatzeko, orain arteko "konfiantzari eta lankidetzari" helduta, eta usansolatarren eskariak entzunda.