Katalunia erregimen komunetik ateratzea eta zergen % 100 biltzea adostu du ERCk PSCrekin aurreakordio batean

ERCko zuzendaritzak Salvador Illa buruzagi sozialista Generalitateko presidente izendatzeko PSCrekin itxitako aurreakordioa babestu du gaur, ia 10 orduko bileraren ostean.

Hala azaldu dute kontsultatutako iturriek, alderdiak aurreakordioaren inguruko azken erabakia 8.700 militanteren esku uzteko zain. Militanteek galdeketa baten bidez baliozkotuko dute erabakia, ala ez.

Batzarrean agerian geratu da proposamenaren inguruko barne eztabaida, sozialistek arratsaldean ere deitu duten zuzendaritza bilerako egun berean.

Horrela, ERCk Bartzelonako Calabria kalean egindako bilerarekin batera, PSCko zuzendaritzak batzar laburragoa egin du arratsaldeko lehen orduan Pallars kalean duen egoitzan.

ERCk uztailaren amaiera ezarri zuen aurreakordio bat lortzeko epemuga gisa (gero oinarriek baliozkotu beharko luketena), nahiz eta hauteskundeak errepikatzea saihesteko legezko epea abuztuaren 26an amaitu.

Zehazki, aurreakordioak aurreikusten du Katalunia erregimen komunetik ateratzea eta Kataluniako Zerga Agentziak zerga guztiak kudeatu, likidatu, bildu eta ikuskatzea (PFEZtik hasita), baita Generalitatean Hizkuntza Politikako Departamentu bat sortzea ere.

Raquel Sans ERCko bozeramaileak prentsaurrekoan azaldu duenez, alderdiko militanteek ostiral honetan bertan bozkatuko dute aurreakordioa, eta emaitza "loteslea" izango da.

"Kutxaren giltza izatea, subiranotasun fiskal hori izatea eta zergen % 100 biltzea funtsezko osagaia zen, eta modu estrukturalean bermatu behar genuen", eta gaineratu du finantzaketa hori indarrean egon dadin beharrezkoak diren lege-aldaketak egingo direla bermatzen dutela, Estatuan gobernatzen duen alderdia edozein dela ere.

PSOEren zuzendaritza batzorde federala Ferraz kaleko sozialisten egoitzan bilduko da astearte honetan, 13:00etan, ERCrekin lortutako aurreakordioaren ostean, iturri sozsialistek jakitera eman dutenez. Halaber, astearte honetan, 11:00etan, Juntsek bere zuzendaritza nazionala deitu du aurreakordioa aztertzeko eta bere balorazioa egiteko, alderdi independentistak ohar batean jakinarazi duenez.

Bestalde, Lluis Llach ANCko presidenteak aurreakordioaren aurka bozkatzeko deia egin dio ERCko militantziari. "Akordio honen alde bozkatzea zuen 100 urteko alderdia independentismoaren zakarrontzira bidaltzea da. Kataluniaren alde, ez!", idatzi du X sare sozialean.

Ignacio Garriga Vox eskuin muturreko alderdiko idazkari nagusiak esan du aurreakordioak egiaztatzen duela "PSC beti izan dela alderdi separatista bat gehiago". "Akordio honek aspaldi salatu duguna egiaztatzen du: PSCren estrategia separatismoarena bezalakoa dela", idatzi du sare sozial berdinean.

Espainiako Gobernuko iturriek adierazi dutenez, hasieratik lortu nahi izan den helburua Illaren inbestidura da, eta, beraz, horretarako aurreakordioa "albiste ona" da, baina oraindik itxaron behar dela nabarmendu dute. Bestalde, PSOEko zuzendaritzako iturriek epeak eta ERCren oinarriak errespetatu behar direla azpimarratu dute.