Generalitateko presidente izateko gehiengoa duela jakinarazi dio Salvador Illak Rulli
Salvador Illa PSCko lehen idazkari eta Kataluniako Generalitateko presidentegaiak larunbat honetan iragarri duenez, presidente izateko beharrezkoa den gehiengoa duela jakinarazi dio Josep Rull Kataluniako Parlamentuko presidenteari, PSCk ERCrekin eta Comunsekin akordioa lortu ostean.
Presidente egiteko prozesua legearen arabera baina "ahalik eta azkarren" egiteko eskatu dio Illak, Kataluniak lehenbailehen izan dezan gobernu berria. PSCren Zuzendaritza Batzordeak gaur Bartzelonan egin duen bileran eman du Illak horren berri. Izan ere, PSCrekin adostutako akordioa asteazkenean onartu zuten "komunek" (bozketan parte hartu zuten kideen % 98,4ren babesarekin) eta ostiralean onartu dute ERCko kideek.
Illa "oso pozik eta itxaropentsu" azaldu da. "Politika onak irabazi du, eskuzabaltasun ariketa bat da, ez egoismoa", azpimarratu du.
Hautagai sozialistak ERCrekin eta Comunsekoekin hitzartutakoa "osorik betetzeko" konpromisoa hartu du. Alderdi horiekin "desadostasunak" ditu PSCk, baina "aurrera egiteko balioak" partekatzen dituela gaineratu du.
Presidentegai sozialistaren hitzetan, katalanek "politikarik onena" merezi dute, eta horren adierazle dira inbestidurarako lortutako akordioak. "Politika ona erantzukizuna, zorroztasuna eta zerbitzu publikoa da", esan du. Dena dela, itunak zabaltzean "eragozpenak eta zailtasunak" izan daitezkeela aitortu du.
Illaren ustez, sozialisten bakarkako gobernua ahalbidetuko duen hiruko aliantza horrek "itxaropenerako etorkizun kolektiboa" ekarri du, "blokeotik" ihes eginda eta "zortzi milioi katalanei aukerak" eskainiz.
Akordio horiek "Kataluniari bikaintasuna erakusten jarraitzeko aukera eman behar dute", Illaren aburuz. "Lan egiteko eta gobernatzeko garaia da", erantsi du.
Horrekin lotuta, Kataluniako Parlamentuko Presidentetzako iturriek jakinarazi dute datozen orduetan Rull talde parlamentarioekin harremanetan jarriko dela astelehenetik aurrera alderdiekin bilera-sorta abiatzeko.
Lehenengo bilera Illarekin berarekin egingo du, eta ERCko ordezkariekin eta Comunsekoekin bilduko da ondoren.
Akordioa arratsaldean sinatu dute
Bestalde, Illa Generalitateko presidente izendatzeko akordioa larunbat arratsaldean sinatu dute PSC eta Comuns alderdiek. San Ildefonso liburutegian elkartu dira, Cornella de Llobregaten (Bartzelona), 17:00etan, eta Salvador Illa PSCko lehen idazkariak eta Jessica Albiach Comunseko presidenteak sinatu dute.
Illaren inbestiduraren aurkako manifestazioak deitu dituzte ANCk eta CDRek astelehenerako Kataluniako Parlamentuaren aurrean.
Puigdemontek ziurtzat jo du atxilotu egingo dutela
Carles Puigdemont Kataluniako presidente ohiak ziurtzat jo du atxilotu egingo dutela Kataluniako Parlamentuan izango den inbestidura saiorako Espainiara itzultzen denean. "Bere asmoa aurrera ateratzen badute, badakit zer espero dudan eta zer egin behar dudan", esan du X sare sozialean zabaldutako gutunean.
Diru publikoa ustez bidegabe erabiltzeagatik atxilotzeko agindua indarrean dago Puigdemonten aurka, eta atxilotuz gero, kartzelan luze egon daitekeela aitortu du presidente ohiak.
"Badakit nire itzulerak atxiloketa eta espetxeratzea ekar ditzakeela, auskalo zenbat denborarako", adierazi du Puigdemontek. Dena dela, ohartarazi du ez duela utziko "negoziazio-gai" gisa erabil dezaten, ezta "Kataluniaren independentziaren aldeko borrokari uko egiten dion erabaki politiko bat ordaintzeko" ere.
Junts
Bestalde, Junts per Catalunyako Zuzendaritza Batzordea gaur bildu da, ezohiko bilera batean, eta Puigdemonten hitzak bere egin ditu.
"ERCk alternatibarik txarrenaren alde egin izana deitoratzen dugu, Illak historiako PSC espainolistena ordezkatzen duelako", azpimarratu du Carles Puigdemont presidente ohiaren alderdiak. "Gure botoak baliaraziko ditugu independentziarantz aurrera egiten jarraitzeko", ohartarazi du.
CUP
Bestalde, Laia Estrada CUPeko diputatuak prentsaurrekoan azaldu duenez, Illaren inbestidurak "eredu turistiko bortitzena defendatzen duen alderdi baten esku uzten du Katalunia; etxebizitzaren espekulazioa, aldaketa klimatikoa ukatzen duena, zerbitzu publikoak desegitearen konplize da, eta ustelkeria kasuekin lotuta dago". "Akordio horrek Kataluniako prozesuaren heriotza egiaztatzen du", gaineratu du.
Illaren inbestidura zalantzan egon liteke
Illaren inbestidura zalantzan egon liteke, Mar Besses ERCko diputatu eta Jovent Republica gazte erakundearen kidea Illari ezezko botoa ematea aztertzen ari baita.
"Gazteen esparruan erreferente den ERCko erakunde politikoa" da Jovent Republica, baina bien arteko harremanen protokoloak ez du zehazten gazte horiek ERCko gainerako parlamentarien boto bera eman behar duten.
Hala ere, Jovent Republicak "ERCren ildo politiko orokorraren eta hauteskunde dinamikaren menpe" jardun beharko du. Bessesen botoari buruzko erabakia Jovent Republicaren batzar nazionalean hartuko dute, eta horretarako ezohiko bilera egingo dute astelehen arratsaldean.
Albiste gehiago politika
Sare eta Etxerat elkarteek Bizkaiko eta Gipuzkoako 11 hondartzatan egin dute mobilizazioa
Urteroko ekimena izan dute gaur, Sare eta Etxerat elkarteek deituta, Gipuzkoako eta Bizkaiko 11 hondartzatan. Elkarbizitzarako jauzia egin ahal izateko, ETAko preso, iheslari eta deportatuen auziari behin betiko konponbidea ematea ezinbestekotzat jotzen dute. Biktimek horrenbeste merezi eta behar duten egia, aitortza eta erreparazioaren garrantzia ere azpimarratu dute.
Maider Etxebarria Gasteizko alkatea: "Asko poztuko ninduke jaien amaieran zero erasoren balantzea egin ahal izateak"
2025eko Andre Maria Zuriaren jaien atarian, festak "bizikidetzatik eta errespetutik, alaitasun eta ilusio handiz bizitzeko" deia egin die Gasteizko alkateak herritarrei eta bisitariei.
EAEko Justizia Auzitegi Nagusiko presidentea: "Zenbait sektorek ez diote modu argi batean indarkeria politikoari zilegitasunik kendu"
Hainbat gazteen eta ertzainen artean azken asteetan izandako istiluei buruz, Iñaki Subijana EAEKo Justizia Auzitegi Nagusiko presidenteak adierazi du "lehia bat" dagoela "Zuzenbide-Estatuaren eta Estatu beraren artean". "Biktima-justiziaren esparruan ezartzen ari garen neurrien inguruko hausnarketa egitera behartzen gaituzte", ondorioztatu du.
Bertan behera geratu da Puyko jaitsiera, bigarren urtez jarraian
Txosnek jai-eremu tradizionala aldarrikatu dute jaitsieraren kalean, udalaren debekuaren aurrean: "Jaiak herriarenak dira". Gogoratu beharra dago Udalak bigarren urtez jarraian debekatu duela hirigunean txosnen jai-esparrua jartzea, kanpoaldera mugituz.
AEBko Euskal Etxeetan euskararen irakaskuntza indartzeko hitzarmena sinatu dute
Etxepare Euskal Institutuak eta NABOk (North American Basque Organizations) sinatu dute lankidetza hitzarmena. Pradalesek adierazi duenez, "akordio hau konpromiso pedagogikoa baino gehiago da, urrats estrategikoa da euskararen nazioartekotzean".
Dobaranek eta Angulok Arkauti utziko dute urtebete eskas bete ondoren
Agur gutun batean, akademiaren eraldaketarako faseak abian jarri dituztela azaldu dute, baina ez dute irteeraren arrazoia zehaztu.
Eusko Jaurlaritzak Diasporaren Lege berri bat sustatuko du 2026an, egungo erronketara egokitzeko
Euskal herritarrek atzerrian duten presentzia aprobetxatzea da helburua, eta "Euskadi Globala" estrategian eragile diplomatiko gisa interesgarriak izan daitezkeen pertsona guztiak sare horretan sartzea.
Aukera berriak aprobetxatzeko AEBrekin harremanak estutzearen alde agertu da lehendakaria Boisen
Imanol Pradalesek esan du beharrezkoa dela zarata gainditzea eta AEBren eta EAEren arteko lankidetza "zubiak eraikitzen jarraitzea", enpresa aukera berriak aprobetxatzeko. "Ez gara hutsetik hasi. Bilera honekin jarraipena ematen diogu Estatu Batuen eta Euskadiren arteko harreman transatlantikoak sendotzeko helburuari", gaineratu du.
Cerdanen koinatu batek igeltsero gisa lan egin zuen Servinabar enpresan, eta 61.000 euro baino gehiago kobratu zituen
Antonio Muñoz Canok, zehazki, 3.363,36 euro jaso zituen 2019an, 16.255 euro 2020an, 21.233 euro 2021ean eta 20.818 euro 2022an. Igeltseroak bi alditan lan egin zuen eraikuntza konpainian, eta 61.669 euro jaso zituen guztira.
Ramiro González: "Talgoren egoitza sozialaren itzulera oso albiste ona da, sinbolismoz betea"
Ramiro Gonzalez Arabako ahaldun nagusiak Talgo enpresaren egoitza soziala Arabara itzultzea goraipatu du. Radio Euskadiko Boulevard saioan egindako elkarrizketan, Talgo erosteko operazioaren azken berriak izan ditu hizpide. Zalantzarik gabe esan du "oso albiste ona dela euskal industriarentzat eta bereziki Arabako industriarentzat", eta nabarmendu du Talgo aktibo garrantzitsua dela lurraldeko jarduera industriala berreskuratzeko.