PPk uste du "eboluzionatuko" duela balizko zentsura-mozio baten babesak

Borja Semper PPko bozeramaileak adierazi duenez, Gobernuko kideek popularren balizko zentsura-mozio bati emandako babesak "eboluzionatu" egingo du, euren "dolua" eta errealitatea "onartu" ahala, Santos Cerdan idazkariaren kasuaren ostean. Bien bitartean, PSOEk gertatutakoa barneratzen jarraitzen du, eta Podemosek Koldo auziari buruzko ikerketa batzorde bat sortzea proposatu du Kongresuan, Gobernuko presidentearen azalpenak nahikoak ez direla iritzita.

'RNE'-n egindako elkarrizketa batean, Semperrek azaldu Exekutiboko ohiko bazkideak "dolu prozesu" bat pasatzen ari direla eta kasuaren "errealitatea ulertzen eta onartzen" saiatzen ari direla.

Hori dela eta, popularrak azpimarratu du ez duela zalantzarik "Gobernuaren alde egin dutenek" oraingoan ez dutela "ustelkeria kasu honen aurrean aurpegia ematen jarraituko". Beraz, balizko zentsura-mozio bati uko egiteak "eboluzionatu" egingo duela uste du bozeramaileak.

"Bazkide guztiek, neurri batean edo bestean, euren jarrera aldatuko dute, edozein alderdirentzat onartezina delako ustelkeria kasuek jazarritako gobernu bat defendatzea", azpimarratu du Borja Semperrek.

PSOE, 'stand by'-n

Alderdi Sozialistak Santos Cerdan idazkari ohiarekin gertatutakoa barneratzen jarraitzen du. Juan Francisco Serranok, Cerdenanen "bigarrenak", "triste eta min handiarekin" daudela adierazi du, idazkaria obra publikoengatik legez kanpoko komisioak kobratzearekin lotzen duten informazioak ezagutu ostean.

"PSOE pertsona guztien gainetik dago. Gure militantzia apala eta langilea da", azpimarratu du Serranok.

Bien bitartean, Cerdanek oraindik ez du Ganberan erregistratu 2023ko hauteskundeetan lortutako parlamentari aktari uko egin izana.

Podemos, gehiagoren bila

Bestalde, Podemosek Koldo auziari buruzko ikerketa batzorde bat sortzea proposatu du, Pedro Sanchezen gobernuaren azalpenak nahikoak ez direla iritzita. Javier Sanchez Serna diputatuak azaldu duenez, neurri horrekin Espainiako gobernuburuak "Kongresuan azalpen guztiak" ematea nahi dute.

"Pedro Sanchezek ez ditu eman behar dituen azalpen guztiak eman, eta, batez ere, ez du konpromiso publikorik hartu horrelakorik ez errepikatzeko, ezta PSOEk legez kanpoko komisio horietatik lapurtutako azken euroa arte itzultzeko", azpimarratu du Podemoseko diputatuak.

Junts, "premiazko" bilera

Jordi Turull Juntseko idazkari nagusiak jakinarazi duenez, alderdian premiazkotzat dute Pedro Sanchez Espainiako Gobernuko presidentearekin bilera bat egitea, Cerdanekin gertatutakoak "inbestidurako akordioak betetzean" eraginik izango duen argitzeko.

"Egoera berri honetan, alderdiak baloratu beharko ditu hartu beharreko erabakiak", azpimarratu du Turullek Juntsen Kontseilu Nazionalean.

Idazkari nagusiak azaldu duenez, "astindua" izan da albistea, eta ez du hasierako harridura ezkutatu gertatutakoaren atzean. Hala eta guztiz ere, "Junts per Catalunyarentzat interes guztia PSOEren eta, beraz, Pedro Sanchezen krisi honek bere akordioan eragina izango ote duen jakitea da", gaineratu du.

Gobernu ituna

Lara Hernandez Sumarreko koordinatzaileak ere bat egin du gobernu itunaren jarraipen batzordea deitzeko eskaerarekin, Santos Cerdanen kasuaren ostean.

Hernandezek "oso larritzat" jo ditu PSOEko Antolakuntza idazkari ohiak 'Koldo auzia'-ren testuinguruan izandako elkarrizketak.

Haren ustez, "koalizio-gobernu honek merezi du" eta, beraz, zaintzea ere merezi du. Gertatutakoa ikusita, PSOErekiko konfiantza "hautsi" egin denez, legegintzaldi honi geratzen zaionaren inguruan "sakoneko eztabaida bat irekitzea" eskatu du Sumarreko koordinatzaileak.