Gasteizko Udalak hiru urtean babestutako 3.000 etxebizitza eraikitzeko plana iragarri du

Gasteizko Udalak datozen hiru urteotan babestutako 3.000 etxebizitza eraikitzeko plana iragarri du. Horietatik % 53 alokairura bideratzea da asmoa. Maider Etxebarria hiriko alkateak egin du iragarpena, Politika Orokorreko Bilkuraren lehen saioan (gaur eta bihar egingo da). 

PSE-EEk eta EAJk osatzen duten Udal Gobernuak Arabako hiriburuko hainbat gune tentsio handiko eremu izendatzeko eskaera onartu duen egun berean jakinarazi du alkateak etxebizitza babestuak eraikitzeko plana. Zehazki, alde zahar osoa, Abetxuku, Aretxabaleta, Armentia, Betoño, Ali eta Gardelegi izendatu nahi dituzte tentsio handiko gune: denera,  256.000 herritar bizi dira hor, biztanleria osoaren % 97,9. 

Bere hitzartzean —politika orokorreko bilkura batean hitz egiten duen lehen aldia izan da—, alkateak azpimarratu du etxebizitzarena dela hiritarren kezka eta arazo nagusienetakoa. Datuak ere eman ditu: batez beste, herritarrek euren errentaren % 30,6 bideratzen dute alokairura eta oinarrizko beharrizanak ordaintzera. Azken bost urteotan, etxebizitzen prezioa % 27,5 hazi da, eta alokairuak, berriz, % 21,3 egin du gora. 

Babestutako 3.000 etxebizitzak "lankidetza publiko-pribatuaren emaitza" direla ere nabarmendu du buruzagi sozialistak. Azaldu duenez, Eusko Jaurlaritzarekin akordio bat itxiko dute Zabalganan, Salburuan, Ibaiondon eta Abetxukun 950 etxebizitza eraikitzeko. 1.383, berriz, ekimen pribatuko etxebizitza sozialak eta tasatuak izango dira, eta 642 iaz  izenpetutako akordio baten barruan eraikiko dira, Salburuan. 

 "Mugikortasun agenteak"

Segurtasunaz ere hitz egin du alkateak, eta gai hori ere kokatu du herritarren kezka nagusien artean. Salatu du hainbat alderdi politikok “segurtasun ezaren narratiba” ezarri nahi dutela, etekin politikoa ateratzeko. “Beldurra erabiltzen dute, botoak lortzeko”.

Gasteiz “Euskadiko hiriburu seguruena” eta “Espainiako seguruenetakoa” dela esan ondoren, erantsi du neurri gehiago hartuko dituztela, segurtasun hori areagotzeko. Hala, “mugikortasun agentearen figura” sortuko da. Orain arte Udaltzainak aritu dira segurtasuna bermatzeko lanetan, baina aurrerantzean poliziak ez diren beste langile batzuen esku egongo da ardura hori. Arkautiko Akademian jasoko dute formakuntza.

“Greba karrusela”

Bestalde, bere ezinegona agertu du azken hilabeteotan Gasteizko hainbat udal-zerbitzutan izandako “greba karrusel amaigabea” dela eta. Zentzu horretan, kritikatu du hainbat sindikatuk mobilizazioen “erabilera politikoa” egiten dutela, eta gobernuaren aurkako “higatze estrategia” baten barruan kokatu ditu protestak.