Alderdiek "onartezintzat" jo dituzte Gasteizko istiluak, eta Erne sindikatuak Ertzaintzako buruak "berehala kargugabetzeko" eskatu du

Gasteizen izandako istiluen harira, EAEko alderdi politikoek gaitzetsi egin dute atzo gertatutakoa. Falange Españolaren elkarretaratzean eta kontramanifestazioan parte hartu zutenen arteko liskarrak izan ziren igande honetan. Istilu bortitz horietan 20 ertzain zauritu ziren eta 19 pertsona atxilotu zituzten, desordena publikoa eragitea egotzita.

EAJ

Arratsaldean zabaldutako ohar batean,  EAJren Euzkadi Buru Batzarrak esan du "onartezinak eta oso kezkagarriak" izan zirela atzoko gertakariak, eta "erantzule bakarrak" Gasteizko kaleetan indarkeria erabili zutenak direla gehitu du: "Falangea eta elkarretaratzeak deitu zituzten talde erradikalak". 

EH Bilduri ere zuzendu zaio EAJ, eta gogor kritikatu du koalizioaren jarrera. "Beste behin, begirada desbideratu nahian aritu da, Gasteizko kaleetan bizi izandako indarkeria gaitzesteari uko eginez", gaitzetsi dute jeltzaleek. "EBBk  jakin nahiko luke EH Bilduk atzo eta gaur goizean kaleratutako bi komunikatuetatik zeinek erantzuten dion bere jarrera ofizialari, batak eta besteak gertatutakoaren irakurketa bana eta elkarren artean ezberdina egiten dutela ikusita". 

EBBren hitzetan, Espainiako Falangearen "ideologia herri honen gehiengoaren borondate demokratikoaren aurkakoa" da, baina, era berean, uste du "kontrako muturretik eta indarkeriazko forma berberak erabiliz, indarkeriazko sorgin gurpila" baino ez dela elikatzen.

Azkenik, EAJk berretsi du "indarkeria bere forma guztietan, edonondik datorrela ere" gaitzesten duela, eta" politika egiteko eta jarrera desberdinak errespetutik eta modu eraikitzailean adierazteko modu bat" aldarrikatu du.

PSE-EE

Jose Ignacio Asensio Gipuzkoako PSEren idazkari nagusiak esan duenez, istiluak "onartezinak" dira eta horrelako manifestazioak "kontrolatu" egin behar dira. Euskadi Irratian elkarrizketatu dute, eta adierazi du hori dela "ultraeskuinaren mezuek dakartena".

Gipuzkoako sozialisten burua kezkatuta agertu da Ertzaintza "hainbat unetan gehiago egin ezinean" ikusi zuelako, eta "egoera kontrolaezina" zelako.

"Ez dakit akatsik izan den, baina hausnarketa egin egin behar da, manifestariak makilekin joan baitziren Gasteizera, borroka bila, eta bazirudien bi talderen artean geratu zela, baina atzokoa ez zen futbol partida bat, beste zerbait baizik", adierazi du.

EH Bildu

Bestalde, EH Bildu kezkatuta agertu da gertakariak direla eta, eta erantzukizunak eskatu dizkio Eusko Jaurlaritzari. Ohar batean, alderdi soberanistak adierazi du Falangearen ekitaldia "inoiz ez zela onartu behar izan, ultraeskuinaren mehatxuak elkarbizitza eta segurtasuna arriskuan jartzen dituen testuinguru batean".

Era berean, Oskar Matute EH Bilduk Kongresuan duen bozeramailea Radio Euskadin izan da, eta nabarmendu du ez zela baimendu behar izan Falangeren ekitaldia.

"Turismo faxista egin nahi zuen jende horrek beste leku batean egin beharko zukeen"; izan ere, "frankismoaren aurkako sentimendu handia eta antifaxista duen lurraldea da, ziurrenik Gernikako seme-alabak garelako", eta "ez dut ulertzen hona horrelakoak egitera etortzea horren erraza" izatea, gaineratu du.

Sumar

Sumarrek galdera sorta erregistratu du Eusko Legebiltzarrean, Segurtasun Sailak igandean Gasteizen gertaturiko istiluen inguruko informazioa eman dezan. 

Jon Hernandez Sumarreko legebiltzarkideak kontzentrazioaren jatorriari eta arduradunei buruzko datuak eskatu ditu, baita polizia dispositiboari buruzkoak ere. Horrez gain, Memoria Demokratikoaren legea aintzat hartuta, uneren batean Falange Españolari elkarretaratzea egiteko baimenik ez emateko aukera aztertu al zuten galdetu du. 

Halaber, espazio publikoan ideologia faxista duten erakundeen presentziaren "irakurketa politikoa" ere eskatu diote Bingen Zupiria Segurtasun sailburuari. 

Erne

Bestetik, Erne sindikatuak Josu Bujanda Ertzaintzaren burua eta Alfonso Garaikoetxea Herritarren Babeserako Dibisioko burua "berehala " kargutik kentzeko eskatu du, atzoko dispositiboa "eskasa" izan zelakoan, "gazte erradikalekin borroka zakarra" eragin zuelako.

Haren ustez, atzoko operatiboaren planteamendua "negargarria izan zen, eta herritarren segurtasunaren defentsan oinarritutako Polizia-jarduera eraginkorra gidatu behar duten estandarretatik erabat aldendua".

Sindikatuaren aburuz, "herritarrei emandako irudia eta eragileek eta herritarrek eurek beren gain hartutako alferrikako arriskua plangintza operatiboaren buru direnen erantzukizun zuzena dira".

Esan

Esan sindikatuaren arabera, Gasteizen izandako istiluek agerian uzten dute berriro ere "Ertzaintzak ez duela langile nahikorik tentsio eta arrisku handiko egoerei bermeekin aurre egiteko".

Sindikatu horrek ohar batean salatu duenez, "talde erradikal batzuek kaosa eragiten eta agenteen eta herritarren segurtasuna arriskuan jartzen duten bitartean, Eusko Jaurlaritzak beste aldera begiratzen jarraitzen du, eta Ertzaintzaren ehunka plaza bete gabe daude". Ildo horretan, Ertzaintzako plazak "berehala" betetzea eskatu du.