Ayusoren bikotekideak "publikoki hiltzea" egotzi dio Estatuko fiskal nagusiari

Isabel Diaz Ayuso Madrilgo presidentearen bikotekideak, Alberto Gonzalez Amadorrek, "publikoki hiltzea" egotzi dio Alvaro Garcia Ortiz Estatuko fiskal nagusiari. Hala adierazi du, bere abokatuak fiskalari egindako akordioari buruzko informazioa argitaratu ondoren, "Espainiako Erresumako gaizkile aitortua" bihurtu dela salatuz.

Auzitegi Gorenak fiskal nagusiaren aurka egiten ari den epaiketan lekuko gisa egin duen adierazpenean, enpresaburuak salatu du "Fiskaltzaren aldetik delitugile aitortua" izaten jarraitzen duela, eta horrek "herritar arrunt" izateari utzi diola.

“Ahozko epaiketa batera bidali naute, eta bertan zigortuko naute; ez dut zalantzarik”, adierazi du Gonzalez Amadorrek, Ogasunari ustez faktura faltsuen bidez 350.951 euroko iruzurra egiteagatik auzipetuta dagoenak. Iruzur hori 2022an Zerga Agentziak egindako ikuskapen baten ondorioz azaleratu zen.

Enpresariak susmoa agertu du ikuskapen hura Diaz Ayusorekin duen harremanaren ondorio izan ote zen, eta salatu du 2024ko martxoaren 14an Fiskaltzak igorritako prentsa-oharrarekin eta bere abokatuaren mezu elektroniko baten filtrazioarekin bere errugabetasun-presuntzioa hautsi zela. 

Prentsa-ohar horrek gertatutakoa argitu nahi izan zuen, egun bat lehenago, martxoaren 13an, zabaldutako informazio kontraesankorren ostean. Iturri batzuen arabera, Fiskaltzak eskaini omen zion akordioa Gonzalez Amadorren abokatuari, baina egiaz, alderantziz izan zen, eta akordioa “goiko aginduengatik” bertan behera gelditu zen.

Miguel Angel Rodriguez, Ayusoren kabineteburua, izan da arratsaldean deklaratu duenetako bat. Epailearen aurrean esan duenez, "bere burua behartuta" ikusi zuen Gonzalez Amadorren defentsa eta Fiskaltza akordioa negoziatzen ari zirela filtratzera. Halaber, azaldu du, filtrazioaren ondoren, kazetarien artean zabaldu zuela "goikoen agindua" zegoela, akordio hori erretiratzeko. Azken hori, berak ateratako ondorioa izan omen zen, Gonzalez Amadorrek esan baitzion akordioa bere horretan mantentzen zela. 

Galdeketan, Maria Angeles Sanchez Conde teniente fiskalak behin eta berriz galdetu dio zergatik zabaldu zuen "goikoen agindua" egon zelaren informazioa, inork akordioa erretiratzeko agindua eman izanaren baieztapenik ez bazuen ere. "Ondorio logikoa izan zen", erantzun du. 

"Ayusok susmoaren harra elikatu zuen"

Goizeko saioan, Mar Hedo Fiskaltza Nagusiko komunikazio burua deklatu du. Bere hitzetan, Ayuso presidentea eta horren kabineteburua Fiskaltzaren gainean "susmoaren harra elikatzen" saiatu ziren, Alberto Gonzalez Amador Ayusoren bikotekidearen aurka "konfabulazio moduko bat" zegoela iradokita.

Hedok lekuko gisa deklaratu du astearte honetan Alvaro Garcia Ortiz Estatuko fiskal nagusiaren aurkako epaiketan. Lekukotzan nabarmendu duenez, 2024ko martxoaren 12ak inlfexio puntua ezarri zuen, eldiario.esek Fiskaltzak Gonzalez Amadorren aurka jarritako salaketaren berria argitaratu ondoren. Azaldu duenez, egun hartan "Madrilgo presidenteak hedabideei egindako adierazpen batzuetan, iradoki zuen haren bikotekideari kalte egiteko Estatuko botereen artean konfabulazioa" dagoela eta, ondoren, esan du Ayusok mezu bat argitaratu zuela Twitterren, Pilar Rodriguez Madrilgo fiskal probintziala "zuzenean seinalatzeko".

Hilaren 13an, Ayuso "bereari eutsiz, bikotekideari kalte egiteko Estatuko botereak ados jarri izanaz" aritu zela azaldu du, eta Madrilgo Erkidegoko presidenteak esan zuela "dena lokaztuta" dagoela; beraz, Fiskalaren gaineko "susmoaren harra elikatzen jarraitu zuen", Hedoren hitzetan eta "hedabideak izugarri nahasita" zeudela. 

Kontatu duenez, arratsalde hartan kazetari baten deia jaso zuen, esanez Miguel Angel Rodriguez kabinetearen burua kazetariei mezu bat bidaltzen ari zitzaiela. Mezu horretan, goikoen aginduz geldiarazi omen zen Fiskaltzaren paktu-asmo baten berri ematen zuen. "Kazetariak goiko hori fiskal nagusia zela ulertu zuen" eta baieztapen bila zebilen, Hedoren hitzetan. 

Informazio horrek "asko aztoratu" zuela esan du Hedok, kabinete burua bera baitzen susmo zabaltzen ari zena, "zeina iradokitzen ari baitzen Fiskaltzak tranpa jarri nahi izan ziola Gonzalez Amadorri, errugabe izatetik errudun izatera pasa zedin". 

Une horretan, azaldu duenez, ulertu zuen egoera aldatu egin zela, eta, Fiskaltza osoari kalte egingo ziola ikusirik, Garcia Ortizi deitu zion, "iturria hain potoloa izanik, informazio hori publikatu" egingo zela ohartaraztzeko. Eta horrelaxe izan zen, 21:29an El Mundo egunkariak argitaratu zuen berria, eta mezuaren zati bat zekarren.

Hori dela eta, fiskal nagusiak Hedori esan zionez, Almudena Lastra Madilgo Erkidegoko fiskal nagusiarekin hitzartu zuen ohar bat atera behar zela, "egiazko informazioarekin", eta "Estatuko fiskal nagusiaren kezka" jasotzeko eta "argi utziz" Madrilgo fiskaltzaren jardunbidea "akasgabea" izan zela. 

Hedoren arabera, "hedabideetan izugarria zen nahasmena", El Mundoren albistearen ostean beste bat argitaratu baitzen La Sextan, kontrakoa esanez. 

Nabarmendu duenez, "gaiak Madrilgo Fiskaltzaren eremua gainditzen zuen eta Fiskaltza Nagusiaren gainean jartzen zuen fokua"; horregatik idatzi zuen Hedok berak prentsa-oharra, fiskal nagusiak eman zizkion xehetasunekin. Dena dela, hurrengo goizean Madrilgo Fiskaltzako komunikazio-buruari igorri ziola argitu du, han ari baitziren Gonzalez Amadorren inguruko ikerketa egiten. 

Lekukoak azpimarratu du ikerketagai den filtrazioaren aurretik, El Mundok gauean emandako informazioan jada jaso zela abokatuaren eta fiskalaren arteko mezuen inguruko informazioa; eta martxoaren 12an, El Paiseko kazetari batek bazekiela paktua erdiesteko negozioazioak martxan zeudela. 

"Bat-batean, mezuak merkatuan zeuden, kazetari-esapidea erabiltzerik badut", azaldu du Hedok, eta ziurtatu du berak ez zuela mezuak eskuragarri izan eta fiskal nagusiak eman zizkiola xehetasunak.