Accionaren bidez lortutako esleipenen % 2 jasotzen zuen Cerdanekin lotutako Servinabar enpresak, eskupekotan

'Koldo auzia' delakoa ikertzen ari den Guardia Zibilaren Unitate Zentral Operatiboak (UCO, gaztelaniaz) bere azken txostenean jasotako hainbat informazio ezagutu dira gaur. Horien arabera, Servinabar enpresaren diru-iturri nagusia Accionaren bidez lortutako esleipen publikoak ziren: esleipen bakoitzaren truke jasotako diru kopuruaren % 2 bideratzen zen Sevinabarrera. Azken enpresa horren akzioen ia erdia,  % 45,  Santos Cerdan egun espetxean dagoen PSOEko Antolakuntza idazkari ohiarenak ziren. 

Guardia Zibilaren arabera, Sevinabarrek jasotako ordainketen % 75,33 Accionaren bidez lortutako obretatik zetozen. Zehazki, hiru obra aipatzen dituzte ikertzaileek: 'Logroño', 'Sevilla' eta 'Sant Feliu de Llobregat'. Izenburu horrekin izenpetutako hiru proiektuen esleipenetan, lan-prozedura bera atzeman dute; hau da, lehendabizi, Accionak eta Servinabarrek "elkar-ulertze memorandum bat" izenpetzen zuten, lanen esleipen espediente bati bide emango ziona. 

Ondoren, behin lanak Accionari esleituta zeudenean, beste kontratu bat sinatzen zuten bi enpresok, batak besteari zerbitzuak emateko. Modu horretan bereganatzen zuen Servinabarrek esleipenaren kopuru osoaren % 2, eskupekotan.

Hala dago jasota, Cerdanen ondasunen inguruan Guardia Zibilak egindako txostenean. Informazio horrekin lotuta agindu zituen joan den asteko miaketak auzia ikertzen ari den Leopoldo Puente Auzitegi Goreneko epaileak; Accionaren Bilboko, Madrilgo eta Sevillako egoitzak miatu zituzten. 

Ikertzaileek uste dute Accionak eta Sevinavarrek, hainbat pertsonaren laguntzarekin, esleipen publikoak legez kanpo lortzeko sare bat osatu zutela. Cerdanek, Joseba Antxon Alonso Servinabarreko bazkideak eta Justo Vicente Pelegrini Accionako goi-kargudunak osatuko lukete sarea harilkatuko lukeen hirukoa. 

Nominak eta alokairuak

Halaber, UCO unitatearen azken txostenak dio, baita ere, Cerdanen familiako hainbat kideri ordainketak egin zizkiola Sevinabarrek, nominen, etxebizitzen alokairuen edota kreditu-txartelen bidez. Besteak beste, Cerdanen emazte Francisca Muñozen izena aipatzen da. Alonsok eta Koldo Garciak 2015ean sortutako Noran kooperatibak kontratua egin zion Cerdanen bikotekideari, eta 9.500 euro jaso zituen trukean. Sevinabar zen kooperatibaren diru-iturri nagusia. 

Bide beretik, Cerdanen arrebak ere, Belen Cerdanek, 22.324,51 euro jaso zituen Servinabarren bidez, 2020an. Ondoren, Erkolan kooperatibak egin zion kontratua, eta 2025eko maiatzera arteko nominak handik jaso zituen; denera, 367.290,43 euro. 

Antonio Muñoz PSOEko Antolakuntza idazkari izandakoaren koinatuak, berriz, 53.130,30 euro jaso zituen 2019 eta 2022 artean, Servinabarrek egindako kontratu bati esker. 

Horrez gain, poliziaren txostenak dio Cerdanek Madril erdigunean erabiltzen zuen etxebizitza baten alokairua ere ordaindu zuela Servinabarrek, 2017an, 2018an eta 2019an. 44.645,26 euro bideratu zituen alokairura. 

EAJk, hiru izendapen eskari

Txostenean agertzen diren informazioen artean EAJ alderdia ageri da. Ikerketaren arabera, EAJk hiru kargu publiko izendatzea eskatu zion Santos Cerdan PSOEko Antolakuntza idazkari izandakoari, Pedro Sanchez Espainiako Gobernuaren presidente izatea ahalbidetu zuen zentsura-mozioa babestu eta gero. 

Cerdanek, 2018ko ekainaren 7an, Jose Guillerno Berlanga PSOEko kideari igorritako mezu elektroniko batean legoke jasota EAJren eskaria. Hiru artxibo zituen atxikita mezuak, eta horiek inprimatzeko eta Koldo Garcia Garraio Ministerioko aholkulari ohiari eskura emateko eskatzen zion, azken horrek Jose Luis Abalos Garraio ministro izandakoaren esku utzi zitzan. 

Hiru artxibo horietako batek "Izendapen eskariak" goiburua zuen eta UCOk ondorioztatu du EAJk Cerdani hiru kargu publiko izendatzea eskatu ziola, 2018ko zentsura-mozioari babesa azaldu ondoren. Javier Cachonen izena bakarrik jakinarazi da, usteko izendapen eskari horien artean. Hain zuzen, Cachon Ingurumen Ministerioan mantentzea eskatzen zen. 

Bestetik, "Adifen postu bat" eta "INIn edo SEPIn postu garrantzitsu bat" ere aipatzen ziren. Azken horien inguruan, mezuak honakoa zioen, betiere, ikertzaileek zabaldutakoaren arabera: "Astelehenean esango dizkidate izenak. EAJkoak etorriko dira astelehen arratsaldean, esatera eta azaltzera". 

Cachon Ingurumen ministerioan izendatzeko ustez egindako eskarian jarri dute azpimarra berezia ikertzaileek. Bera izan zen Zangozako Muga meategiaren aldeko ingurumen baimena izenpetu zuena eta hor ikusi dute ikertzen ari diren ustelkeria sarearekin lotura: Accionak eta Servinabarrek 2015en elkarrekin eratutako aldi baterako enpresa-elkarteari esleitutako lehen obra publikoa Muga meategia ustiatzeko lanak izan ziren. 

Joan den astean, Accionaren egoitzetan egindako miaketen emaitzak dira gaur jakinarazi diren informazioak. Guardia Zibilaren azken txostenak dio Accionaren bidez lortutako esleipenen % 2 jasotzen zuela Cerdanekin lotutako Servinabar enpresak. 

Belateko lanak

Bestalde, ikerketaren arduradunek epaileari eskatu diot Belateko tunelen esleipenen inguruko auzia 'Koldo auzia'-ren ikerketara batu dezala. Txostenak dio Belateko lanen esleipena 2023ko abenduan egin bazen ere, lau urte lehenago hasi zirela hori kudeatzen.  Acciona, Oses eta Sernivar enpresek osatutako aldi baterako elkarteari esleitu zizkioten lanak.

Zabaldutako informazioaren arabera,  Belateko tunelen inguruko bilera bat egin zen 2019an Garraio Ministerioaren egoitzan eta Cerdan bertan egon zen.