Espainiako Gobernuak gaitzetsi egin du martxoaren 3an, Gasteizen, Poliziak izandako "neurriz kanpoko jokabidea"

Espainiako Gobernuak gaitzetsi egin du 1976ko martxoaren 3an, Gasteizen, Poliziak "neurriz kanpo" jokatu izana. Halaber, hildakoei eta haien senitartekoei adierazi die "aitortzen eta ohoratzen" dituela. 

Ministroen Kontseiluaren osteko prentsaurrekoan Elma Saiz Espainiako Gobernuaren bozeramaileak esan du martxoaren 3an Gasteizen izandako sarraskiaren biktimak aitortzeko adierazpen instituzionala onartu dutela gaurko Ministroen Kontseiluan.

Adierazpenak “polizia armatuaren neurriz kanpoko jarduera gaitzesten du, eta memoria demokratikoarekiko, egiarekiko, justiziarekiko eta erreparazioarekiko konpromisoa berresten du”, adierazi du bozeramaileak. Era berean “garai hartako langile mugimenduaren garrantzia” azpimarratu du.  

Ildo horretan, Saizek gogorarazi du joan den otsailean Lurralde Politikako eta Memoria Demokratikoko Ministerioak Memoria Demokratikoaren gune izendatu zuela Gasteizko Asisko San Frantzisko eliza, 1976ko martxoaren 3ko "gertaera eta hilketa izugarrien erreferente" delako.

Erreakzioak

Albistea zabaldu orduko, bata bestearen atzetik heldu dira erreakzioak. Martxoak 3 elkartearen izenean, Nerea Martinezek adierazi du "informazio osoa" izan arte, ez dutela baloraziorik egingo. Esan duenez, "beti bezala, prentsaren bidez" jaso dute berria. "Ez dugu inolako jakinarazpen ofizialik jaso", esan du. 

Azaldu du "hurrengo astean" elkartuko direla elkarteko kideak, eta "asanblean" erabakiko dutela "balorazioa". Nolanahi ere, argi utzi du Espainiako Gobernuak gertakarien erantzukizuna bere gain hartzen ez badu, emandako urratsa ez dela nahikoa izango biktimentzat. 

Bere aldetik, Aitor Esteban EAJko EBBren presidentea "etsita" agertu da akordioaren aurrean, eta Espainiako Gobernuari eskatu dio aitor dezala "Estatuak izan duen papera".

Hain zuzen ere, Estebanek eskatu du martxoaren 3ko sarraskiari buruzko dokumentu ofizialak erabat desklasifikatu ditzaten, eta ez "hautaturikoa bakarrik", hori baita biktimak “aitortzeko” eta “benen ohoratzeko” modu bakarra.

Horren aurrean,  Javier Hurtado Arabako PSE-EEren idazkari nagusiak akordioa “erabat babesten” duela adierazi du, eta Espainiako Gobernuak "memoria demokratikoarekin" duen konpromisoa nabarmendu du: "memoria demokratikoaren alde borrokatu duen gobernu bat badago, hori Gobernu sozialista da", esan du.

1976ko martxoaren 3an, Gasteizko langileek bat egin zuten borrokan ari ziren enpresak ordezkatzen zituzten batzordeek deitutako greba orokorrarekin. Langileek 40 orduko lan-astea eta soldata hobeak izatea eskatzen zuten, eta Zaramagako San Frantzisko Asiskoaren elizan bildu ziren, Gasteizen, batzarra egiteko, eliza leku segurua zelakoan. 

Baina Polizia Armatuak ke-poteak jaurti zituen eraikinean bertan, eta ihes egiten ari zirenen aurka tiroka hasi ziren. Bost langile hil zituzten sarraski hartan.