Euskadi egunero eraiki eta defendatzeko konpromisoa hartu du EAJk

EAJk ekitaldi politiko jendetsua egin du igande goizean Durangon, Landako Gunean. Bertan, Aitor Esteban EBBko presidenteak, Imanol Pradales lehendakariak eta Bizkai, Gipuzkoa, Araba eta Nafarroako lurralde presidenteek parte hartu dute.

Hurrengo udal eta foru hauteskundeetarako urtebete falta denean izan dute hitzordua, eta alderdi jeltzaleak “aurrera egiten jarraitzeko indar gisa" eta “Euskadi eraikitzen jarraitzeko tresnarik onena bezala” duen zeregina aldarrikatu du.

Bertan egindako hitzaldian, “konfrontazioa etengabe bilatzea” leporatu die sozialistei EBBko presidenteak, eta ohartarazi du “Euskadi ezin dela kanpoko eztabaiden oihartzun iraunkor bihurtu”. Horren iritziz, “batzuek euren profil politikoa agerian uzteko eta hedabideetan egoteko beharra dute etengabe, askotan daturik gabe hitz eginez". 

"Ibaia gainezka jartzen dute, gerora esateko ura bere bidera itzuli dela, baina egunen baten ez da bueltatuko", ohartarazi du.

EH Bildu hizpide hartuta, publikoki akordio zabalak eta herrialdearen ikuspegi estrategikoa eskatzen dutenak kritikatu ditu, baina, salatu duenez, kudeatzea egokitzen zaien bakoitzean kale egiten dute, ezintasunagatik edo erabakien ondorio politikoei aurre egiteko beldurragatik. “Esan dezagun gauzak diren bezala. Oroimena dugu! Lotsa pixka bat gehiago. Euskadik memoria du!”, esan du.

Halaber, Estebanek adierazi du etxebizitza dela euskal gizartearen kezka nagusietako bat, eta lezioak eman nahi izatea aurpegiratu dio EH Bilduri, azken 7 urteetan gobernatu dituen udalerrietan etxebizitza publikorik sustatu ez  badu ere. Era berean, koherentzia falta leporatu die; izan ere, “hemen modu batean jokatzen dute, guztiari ‘ezetz' esanez, eta Madrilen beste batean, guztiari ‘baietz' esanez”, eta “egun batean instituzionaltasunez janzten dira eta hurrengoan iraindu egiten dute”.

PPri dagokionez, “lekuz kanpo” jarraitzen duela esan du, "galduta", ez baitute "herrialdea ulertzen". “Konfrontazio eta liskar ereduak ekarri nahi dituzte hona, baina hori ez dator bat gure izateko eta egiteko moduarekin. Euskadik ez du aurrera egiten lubakietatik; bizikidetzatik, zentraltasunetik eta aniztasunarekiko errespetutik egiten du aurrera”, azpimarratu du Estebanek.

Autogobernua indartzeko konpromisoa hartu du Pradalesek

Bestalde, lehendakariak autogobernua indartzen jarraitzearen alde egin du, euskal herritar guztien “eskubide historikoak” gogoratuz eta haien balioa azpimarratuz. Testuinguru horretan, enegarren aldiz eskatu du Gernikako Estatutua osorik betetzeko.

“Autogobernua eguneratzeak gaitasun eta berme politiko berriak lortu behar ditu (...) Asko doakigu horretan, herri gisa izango dugun etorkizunak herri demokratiko, justu eta aurreratu bat eraikitzea ahalbidetu diguten balioak indartzea eskatzen baitu”, adierazi du Pradalesek.

Gainera, "Espainiako Osasun Ministerioak eragindako medikuen greba" hartu du mintzagai. Egoera horren aurrean, Monica Garcia Osasun ministroari eskatu dio utz dezala arazoa Eusko Jaurlaritzaren esku, "aurki konponduko dugu-eta zuek sortutako gatazka".

Euskadik dituen "erronka handiak" ere jorratu ditu lehendakariak. Etxebizitza, euskara, ongizate emozionala, migrazioa eta autogobernua ardatz hartuta, "askatasunerako bidean urratsak ematen jarraitzeko" apustua egin du.

Bizkai Buru Batzarreko presidente Iñigo Ansolak, bere aldetik, berretsi du EAJk "gure gizartea lideratzeko" konpromisoa duela, "justizia eta askatasunerako bidean".

Gipuzko Buru Batzarreko presidente Maria Eugenia Arrizabalagak ere hartu du hitza, eta honakoa esan du: "Euzko Alderdi Jeltzalea gara. Alderdi Abertzalea. Arazoak konpontzeko gaude, handiak zein txikiak, baina ez gaude interes pertsonalen zerbitzura. Gure helburu nagusia da herri honen nahia zuzentzea, euskal nazioa egituratzea eta garatzea". Ildo horretan, nabarmendu du "Euskadiren Estatus Politikoaren etorkizunari buruzko erabaki demokratikoak" errespetatu egin behar direla.

Agerraldian, Araba Buru Batzarreko presidente Jone Berriozabalek ziurtatu du EAJ "euskal gizartearen zerbitzura" dagoela. "Badakigu zer nahi dugun gure herriarentzat, eta horren bila goaz", erantsi du.

Azkenik, Napar Buru Batzarreko presidente Unai Hualdek azpimarratu du EAJ beharrezkoa dela Nafarroan "gobernu pluralak eratzeko". Bestalde, ohartarazi du beti erantzungo duela "irmo euskara, kultura eta autogobernua jokoan daudenean, sinesten dugun horretan esku hartzeko beldurrik gabe".

Landako Gunea, berezia EAJrentzat

"Aurrera Diharduen Indarra. ADI 26/27" lelopean, jeltzaleek toki berezi batean egin dute ekitaldia; izan ere, Landako Gunean abiatzen dute hauteskunde kanpaina aspalditik, eta bertan aurkeztu zuten Imanol Pradales lehendakarigai gisa.

Ekitaldian, buruzagi jeltzaleek EAJk hurrengo erronka politikoei aurre egiteko dituen batasuna eta indarra goraipatu dituzte, alkate, zinegotzi eta batzar nagusietako eta aldundietako ordezkarien lana eta alderdiko militante eta jarraitzaileen inplikazioa nabarmenduz.