Bi orduko atzerapenez hasi da Ministro Kontseilua, Sumarreko ministroak alokairuaren luzapena dekretutik kanpo uztearen aurka agertu direlako

Irango gerrak sortutako krisiari aurre egiteko dekretua jorratzeko ezohiko Ministroen Kontseilua atzeratu egin da, Sumarreko kideek uko egin baitiote bilera-gelan sartzeari, alokairu kontratuen luzapena eta enpresen marjinak kontrolatzeko neurriak dekretutik kanpo uzten diren bitartean. 

Ministroen Kontseilua 09:30ean zen hastekoa, baina bi ordu pasako atzerapenarekin hasi da azkenean. Tarte horretan, aurrez aurre aritu dira negoziatzen Pedro Sanchez Espainiako gobernuko presidentea eta Yolanda Diaz Sumarreko buru eta bigarren presidenteordea. Antza, elkarrizketa horiekin lortu dute azken orduetan tenkatutako negoziazioetan aurrera egitea. 

Diazen alderdiko iturriek azaldu dutenez, aurrerapenak egon diren arren, "oraindik badir lotu beharreko kontuak", baina horiek jada Ministroen Kontseiluan eztabaidatuko dira. 

Bilera amaitutakoan, Pedro Sanchezek agerraldia egitea espero da.

Bilerak emango duenaren zain eta Sumarren eskaerak aintzat zein neurritan hartuko diren ezagutu zain, Ser irrati kateak aurreratu eta testuaren edukia ezagutzen duten iturriek berri agentziei baieztatu dietenez, Ministroen Kontseilu bereziak onartuko duen lege dekretuak neurri fiskal sorta bat izango du ardatz. 

Horren arabera, Ekialde Hurbileko gerraren ondorioak arintzeko neurrien sortak automobilgintzako erregaien, elektrizitatearen eta gas naturalaren BEZa jaitsiko du, eta tasa orokorretik (% 21) murriztura (% 10) igaroko da.

Erregaien garestitzeari aurre egiteko, BEZa jaisteaz gain, hidrokarburoen zerga bereziaren tasa ere murriztuko du Gobernuak: gaur egun 0,379 eurokoa da diesel litroko eta 0,47269 eurokoa gasolina litroko.

Horrela, espero zen bezala, Gobernuak behin betiko egingo dio uko Ukrainako gerraren inflazio krisian aplikatu zen 20 zentimoko hobariari, izan ere, Gobernuko hainbat kidek egunotan adierazi dutenez, ondorio distortsionatzaileak eragin zituen neurriak.

Gainera, Sanchezen gobernuak argindarra sortzeko zerga kenduko du (% 7koa da eta konpainiek ordaintzen dute), eta elektrizitatearen zerga berezia murriztuko du (% 5,11koa da eta kontsumitzaileek ordaintzen dute).

Ezkutu soziala indartzeko, dekretuak bonu sozial elektrikoa hobetzen du (ERCren arabera, deskontua % 42,5ekoa izango litzateke kontsumitzaile kalteberentzat eta % 57,5ekoa muturreko kalteberentzat), eta uraren eta energiaren hornidura bermatuko luke. 

Era berean, ibilgailu elektrikoak erostean PFEZaren % 15eko kenkaria ere sartuko lukete, omnibus dekretua onartu gabe geratu zenean ez baitzuen aurrera egin. 

Litroko 20 zentimoko deskontua garraiolarientzat

ERCko iturriek adierazi dutenez, gasolio profesionala itzultzeko eskubidea duten garraiolarientzako hidrokarburoen zerga berezian diesel litro bakoitzeko 20 zentimoko deskontua aplikatuko da.

Horrez gain, nekazaritzan erabiltzeko gasolio litro bakoitzeko 20 zentimoko laguntza ere jasotzen du testuak, bai eta itzulketaren onuradun ez diren garraiolarientzako ibilgailu bakoitzeko aparteko eta aldi baterako laguntza bat ere.

Gainera, alderdi independentistaren arabera, Merkatuen eta Lehiaren Batzorde Nazionalari (CNMC) ahalmena emango zaio erregai-banatzaileen informazioa biltzeko, prezioak zaintzeko helburuarekin.

Gobernuaren neurri sortan sartuko litzatekeen beste neurrietako bat, ERCko iturrien arabera, etxebizitzen eraginkortasun energetikoa hobetzeko obrengatiko PFEZaren kenkaria da, baita laguntza publikoen onuradun diren enpresek kaleratzeak egiteko debekua ere. 

Berriztagarrietarako administrazio prozedurak sinplifikatzeko eta bizkortzeko, biltegiratzeko instalazioen hedapena errazteko eta auzo, udalerri eta industrialdeetan autokontsumo partekatua sinplifikatzeko neurriak ere sartu dira.

Iturri berberek zehaztu dutenez, energia kooperatibentzako laguntza tekniko eta administratiboko programa bat sartu da, eta berriztagarrien enkanteetako edukieraren zati bat udal  edo komunitate proiektuetarako erreserbatzeko aukera aurreikusi da.