81 biktima politiko gehiago aitortu ditu Nafarroak

Funtzionario publikoen eta eskuin muturreko taldeen motibazio politikoko ekintza bortitzen biktima izan diren 81 pertsonari errekonozimendua eta erreparazioa adierazteko ekitaldia egin dute asteazken honetan Iruñeko Baluarte jauregian. Ana Ollo Nafarroako Gobernuko bigarren presidenteorde eta Memoria eta Bizikidetza, Kanpo Ekintza eta Euskara kontseilariaren hitzetan, "duela hamar urte pentsaezina zen" horrelako ekitaldi bat egitea.

Ekitaldian 57 gizon eta 24 emakumeren kasuak aintzatetsi dira. Azken horietako batzuek, gainera, genero arrazoiengatik larriagotutako egoerak jasan zituzten. 60ko hamarkadatik hasi eta XXI. mendera bitarteko gertakariak dira gogoan izan dituztenak: 15 kasu XX. mendeko 60ko eta 70eko hamarkadetan gertatu ziren; 26 kasu, 80ko hamarkadan; 15 kasu, 90ekoan, eta 25 kasu, 2000tik aurrera. 

Mota horretako hirugarren ekitaldia izan da. Guztira, orain arte, 122 pertsona aintzatetsi ditu Foru Gobernuak. Nolanahi ere, prozesuak irekita jarraitzen du, eta ehun eskaera inguru izapidetze-fase desberdinetan daude. 

Baluarten bildu dira Foru Gobernuko eta Parlamentuko ordezkariak, eskaerak aztertzen ari diren Errekonozimendu eta Erreparazio Batzordeko kideak eta biktimak, senitartekoekin eta haien ingurukoekin batera. Azken horien izenean, Txaro Etxetxipiak adierazi du "bidea, osatu gabe badago ere" merezi duela egitea", eta "egiarako bide kolektiboan" aurrera egiten jarraitzeko beharra defendatu du, eta oraindik urratsa egin ez dutenei euren testigantzak aurkezteko deia egin.

Ana Ollo kontseilariak, bere aldetik, gizarte zibilaren eta erakundeen elkarlana goraipatu du, "duela hamar urte pentsaezina" zela esan du. Zailtasunik izan izan dela ukatu ez badu ere, azaldu du Nafarroa "auzolan demokratikoan" diharduela, indibitualetik kolektibora doan “prozesu sendatzaile” baten bidez.

Ollok biktimei esan die "prozesua oso luzea" izan dela, "oztopoz betea, eta, neurri batean, osatu gabea" horietako askorentzat. Hala ere, haren hitzetan, "prozesu sendagarria izaten ari da urte askotan gertatutakoa ezkutatu zuen gizartearentzat. Neurri batean, justifikatu ere egin zen. Izan ere, gure lurraldean desoroimen lan aktiboa egin da, oso handia".

Horren aurrean, presidenteordeak giza eskubideen errespetuaren eta defentsaren alde egin du. Olloren ustez, "zoru etikoa" indarkeria deslegitimatzean eta giza eskubideak defendatzean dago. "Une, leku eta testuinguru biktimologiko guztietarako balio du. Diluziorik eta parekatzerik gabe", esan du; eta gaineratu du "egiarik, justiziarik eta ordainik gabe" ezin dela "eraiki eta gorde datozkion erronka guztiak gainditzeko gai den demokrazia".

Bestalde, Memoria eta Bizikidetzako zuzendari nagusi Martin Zabalzak, Batzordearen presidente gisa Parlamentuari urtero ematen dion txostenaren edukia berresteaz gain, erakunde horren lana azpimarratu du hitzaldian. "Adituen zorroztasuna nahitaez konplexua den froga-testuingurura egokitzen" duela azpimarratu du.