Ibilaldiak milaka euskaltzaleren erdigune bihurtu du Bilbo

Bilboko Txurdinaga auzoan Bizkaiko ikastolen jai erraldoia den Ibilaldia ospatu dute gaur, igandea, Kirikiño Ikastolak antolatuta. Eguraldia lagun, goizean goizetik milaka eta milaka euskaltzale ibili dira bertan, euskara, hezkuntza eta euskal kultura uztartzen dituen jai bereziaz gozatzeko. Egitarau zabala antolatu dute horretarako, kultura, musika eta aisialdirako jarduera ugari eskainiz.

Amaia Usandizaga eta Ainhize Vega ikasle ohiek aurkeztutako hasiera ekitaldian, agintari ugari izan dira: Juan Mari Aburto Bilboko alkatea, Elixabete Etxanobe Bizkaiko ahaldun nagusia, Begoña Pedrosa Hezkuntza sailburua eta Ibone Bengoetxea lehendakariorde eta Kultura eta Hizkuntza Politikako sailburua, besteak beste.

Pedrosaren esanetan, euskara "elkarbizitzarako eta kohesio sozialerako hizkuntza" da, bereziki gero eta anitzagoa den gizartean. Ikasgeletan istorio, hizkuntza eta ibilbide desberdinak dituzten haurrak eta familiak bizi dira. Horregatik, Pedrosaren arabera, erronka ez da euskara irakastea bakarrik, baizik eta hizkuntza naturaltasunez erabiltzen duten guneak sortzea eta pertsona gehiagori komunitatearen parte sentitzen laguntzea. 

Halaber, euskararen biziberritzea guztion ardura dela azpimarratu du, erakunde, gizarte eragile, ikastetxe, familia eta herritarrak interpelatuta.

Txalapartaren doinuek lagunduta, bertan bildutako euskaltzaleei ongietorria egiteko aurreskua egin dute hasiera ekitaldian. Erraldoien parte-hartzeak eta ikastolako ikasleek bereziki prestatutako HIRI KIRIBILI BIL! kantaren koreografiak borobildu dute aurkezpena.

"Gaurko hasiera ekitaldi honetako kultur adierazpen guztiak (abesbatza, dantzariak, musikariak eta bertsolariak) gure ikastolako kideek eskaini dituzte, hori baita gure benetako altxorra: Txurdinagan, Santutxun, Otxarkoagan, Begoñan, Boluetan eta Bilbo osoan hezkuntza, euskara eta euskal kulturaren aldeko familiak izatea", adierazi du Haizea Etxebeste Kirikiño Ikastolako zuzendariak.

Kirikiño Ikastolako komunitateak hainbat hilabetetan auzolanean egindako lan fina borobildu du gaurkoan, hiriburuan euskararen transmisioa ziurtatzeko duen hamarkada askotako ibilbide oparoa agerian utzirik.

Bestalde, Josu Telleria Ibilaldia Kultur Elkarteko lehendakariak, Kirikiño ez ezik, Harrobia, Urretxindorra eta Abusu ikastolen lana ere goraipatu du. "Lau ikastola, lau birika, hiri honi euskaraz arnasteko aukera ematen diotenak", esan du.

Bilboko Kirikiño Ikastolako arduradunek Santurtziko Bihotz Gaztea Ikastolari eman diote lekukoa, horrek izango baitu Bizkaiko ikastolen aldeko festaren hurrengo edizioa antolatzeko ardura.

Hiru gunetan banatu dira ekintzak: Txurdinagako kiroldegia musika- eta abentura-proposamenen agertoki bihurtu da; Europa Parkeak familia ugari bildu ditu, haurrentzako jarduerei esker; eta Kirikiño Ikastolak, besteak beste, tailerrak, jolasak, emanaldiak eta karaoke-saioak hartu ditu. Kaleak alaitzen Samasiku fanfarria, erraldoiak eta txistulariak ibili dira, Bilbo osoari gure hizkuntza eta kulturaren poza zabalduz

Egun osoan zehar, umeentzako hamaika jarduera egon dira gune guztietan, tartean EITBko MAKUSIren gunea, publiko gaztearentzat, Kirikiño Ikastolan egon den Umeen Hirian. Abenturazaleentzat, berriz, kiroldegian, EITBko Conquis Dorrearen erronkari aurre egiteko aukera izan dute ausartenek.