Euskal alderdiek ez dute ilara egin beharko hauteskunde zerrendetako buru izateko

Eusko Legebiltzarrak lege-aldaketa bat onartu du hauteskunde-hitzordu bakoitzean ohikoa den irudiari amaiera emateko: ordezkari politikoak, ilaran, goizaldetik, inor baino lehenago erregistratzeko.

Hautagai-zerrenden argitalpen-ordenaren buru izateko ilara egin behar zen orain arte, eta hori amaitu da gaurko erabakiarekin. Beraz, entregatzeko garaiak ez du zehaztuko zerrenda ofizialetan zein posizio duten ordezkariek.

Hemendik aurrera, barruti bakoitzean azken hauteskundeetan lortutako emaitzen arabera ezarriko da argitaratzeko ordena, eta alderdi bozkatuenak jarriko dira lehen postuan.

EAJk, EH Bilduk eta PSE-EEk bultzatu dute erreforma, eta PPren babesa ere izan du; Sumarrek eta Voxek, berriz, kontra bozkatu dute.

Aldaketa horrek Eusko Legebiltzarrerako eta Arabako, Bizkaiko eta Gipuzkoako batzar nagusietarako hauteskundeak arautzen dituzten legeei eragiten die, eta hurrengo hauteskunde autonomikoetan eta foru-hauteskundeetan aplikatuko da, baina ez udal-hauteskundeetan, azken horiek Estatuko araudiak arautzen baititu.

Aldaketa bultzatu duten taldeen arabera, helburua da sistemari segurtasun juridiko handiagoa ematea eta praktika sinbolikoak saihestea, hala nola erregistro-ilarak.k. Sumarrek ordena zozkatzearen alde egin du, sistema berriak alderdi handienei mesede egiten diela iritzita.