Rajoyk ukatu egin du Kitchen auziaren harira “operazio politikorik” egon izana, Barcenasi informazio konprometitua lapurtzeko xedez

Kitchen auziari buruzko epaiketa puntu gorenera iritsi da ostegun honetan. Espainiako Gobernuko presidente ohiak, Mariano Rajoyk, deklaratu du eta ukatu egin du Luis Barcenas PPren diruzain ohiari informazio konprometitua lapurtzeko “operazio politiko” bat egon izana.

Gainera, hari erreferentzia egiteko erabiltzen diren goitizenei buruz galdetuta —"M. Rajoy", “El Asturiano” edo “El Barbas”—, erantzun du: bera Mariano Rajoy dela, “denek dakiten bezala”. “Eta, gero, norberak nahi duen moduan deitzen dit; beraz, galde iezaiezue haiei”, adierazi du.

Bestalde, Rajoyk onartu du “Luis, eutsi” mezua gogoratzen duela, baina “azken 15 urteetan egunero argitaratu" izan delako.

Lekuko gisa

Mariano Rajoyk lekuko gisa deklaratu du Kitchen auziko epaiketaren hamargarren egunean. Prozesuak haren lehen gobernuan Barne Ministerioko goi-karguek ustez antolatutako operazio parapoliziala epaitzen du, PPren diruzain ohia zen Luis Barcenas zelatatzeko, Gürtel auzia eta alderdiaren B kutxa ikertzen ari zirenean.

Rajoyk adierazi du gertatutakoa “operazio poliziala” izan zela, eta “erabat legezkoa” zela. “Gai honetan ez da inolako operazio politikorik egon. Gero jakin genuen operazio polizial bat egon zela —hemen azaldu den bezala—, eta horren helburu nagusia Bárcenas jaunaren dirua berreskuratzea eta haren testaferroak nortzuk ziren argitzea zen", azaldu du.

Presidente ohiak defendatu duenez, ez 2013ko Barne ministroak, Jorge Fernández Díazek, ez Segurtasuneko estatu-idazkariak, Francisco Martinezek —biak auzipetuak—, ezta berak ere, “ez dute parte hartzen operazio polizialetan”. “Erabat sinetsita nago operazio hori legezkoa izan zela”, gaineratu du.

Barcenasek hari buruzko informazio konprometigarririk ote duen galdetuta, Rajoyk esan du “erabat lasai” dagoela. “Ez dut uste halakorik zuenik. Izan balu, jada publiko egingo zukeen, beste hainbat dokumenturekin egin zuen bezala”, argudiatu du.

Harreman profesionala

Rajoyk adierazi du Barcenasekin izan zuen harremana “erabat profesionala” izan zela, eta inoiz ez zela “bere konfiantzazko pertsona” izan.

Rajoyk, bestalde, esan du “erabat faltsua” dela Barcenasek gutun-azal batean B kutxako soberakina eman ziola, azken horrek astelehenean adierazi zuen bezala. Horrekin batera, adierazi du ez duela “polizia patriotiko” delakoarekin inolako loturarik.

"Luis, eutsi" mezua

Bestalde, Gobernuko presidente ohia den Mariano Rajoyk adierazi du gogoratzen duela bere diruzain ohiari, Luis Barcenasi, “Luis, eutsi” mezu ezaguna bidali ziola. Egunero argitaratzen zen, beraz hori gogoratzen dudala uste dut”.

Barcenasekin trukatu zituen gainerako mezuei dagokienez, Rajoyk adierazi du ez dituela gogoan, PSOE eta Podemos alderdien herri-akusazioei erantzunez.

Cospedalen erantzunak

Bestalde, Maria Dolores de Cospedal PPren idazkari nagusi ohiak ostegun honetan aitortu du, Audientzia Nazionaleko epaimahaiaren aurrean, akusatuen artean dagoen Jose Manuel Villarejo komisario erretiratuarekin bilerak izan zituela; hala ere, ukatu du inolako “enkargurik” egin ziola, eta esan du “galderak” egitera mugatu zela.

“Galderak egin nizkion, baina ez enkargurik. Gauza desberdinak dira”, adierazi du. Cospedal bera zein haren senar ohia, Ignacio López del Hierro enpresaria, ikertuak zituzten instrukzio fasean Kitchen auzian zerikusia izan zezaketelakoan; hala ere, haien parte-hartzearen gaineko ikerketa artxibatu zen.

PPko buruzagi ohiak azaldu du bere senar ohiak, Ignacio Lopez del Hierro enpresariak, aurkeztu ziola Villarejo, “hark ezagutzeko interesa” zuelako. “Niri ondo iruditu zitzaidan hura ezagutzea, eta ezagutu nuen”, adierazi du.
“Bazirudien bere kidegoan, Polizian, oso ondo baloratzen zutela. Gero begiratuta, aldatu egiten da kontua”, deitoratu du.