Leon XIV.a aita santuak migratzaileei babesa, harrera eta integraziorako benetako aukerak ematea eskatu du

Leon XIV.a aita santuak giza duintasuna erdigunean jartzea aldarrikatu du Espainiako Kongresuan astelehen honetan egin duen hitzaldian, eta migrazioaren krisiaren aurrean migratzaileei babesa, harrera eta integraziorako benetako aukerak ematea. 

Benedikto XVI.a aita santuak 2011n Alemaniako Parlamentuan esandakoa bere egin du Leon XIV.ak, eta klase politikoari gogorarazi dio bizi-baldintza duinak bermatu egin behar dira, eta hori ezin dela unean uneko egoera politikoaren araberakoa izan.

Eutanasia eta abortua zuzenean aipatu gabe, baina bizitzaren aldeko defentsa irmoa egin du aita santuak. Horren esanetan, bizitza defendatzea zibilizazioaren beraren helburu bat da, eta horregatik giza bizitza oro aitortu eta zaintzeko deia egin du, sorkuntzatik gainbehera naturala gertatzen den arte. 

"Bizitzak oinarrizko balio izateari uzten badio zer etorkizun izango dute gure gizarteek?", galdetu du aita santuak.

Ameriketako Estatu Batuetako lehen pontifizeak kritikatu egin du nazioarteko egoera hauskorraren aurrean estatuak berrarmatzea izatea Europaren eta nazioartearen zati baten erantzuna. 

Aita santuaren arabera, bakeak ausardia eta erantzukizun etikoa ez ezik, herri bakoitzaren nortasuna eta nazioarteko zuzenbidea errespetatzea eskatzen du. 

Halaber, armekin benetako bake iraunkorra eraikitzea ezinezkoa dela esan du. 

Horrez gain, benetako segurtasuna lortzeko oinarriak justizia, elkarrizketa, nazioarteko zuzenbidea eta herriak errespetatzea direla nabarmendu du. 

Aita santuak adierazi duenez, aniztasun politikoak ez du ekarri behar aurkaria deskalifikatzea. Ildo horretan, hizkera zaintzea eskatu du, beti ere, inor lotsarazi gabe eta pertsona ororen duintasuna errespetatuz.

Gainera, "arlo juridikoa eta morala nahastu gabe", botere publikoaren eremua mugarritzearen eta muga moralak jartzearen alde hitz egin du.

Aita santuak Kongresuan egindako hitzaldiak talde parlamentario gehienen oniritzia jaso du, baina gai batzuetan izan dira kritikak. EAJk "herrien aniztasunaren eta migrazio dramaren gainean" egindako aipamenak eta "legeak errespetutik egiteko" haren irakaspenak azpimarratu ditu. "Har ditzala apunteak behar dituenak", azpimarratu du Maribel Vaquero jeltzaleen Kongresuko bozeramaileak.

Mertxe Aizpurua EH Bilduk Kongresuan duen bozeramaileak adierazi duenez, bere taldea bat dator Leon XIV.ak Kongresuan emandako hitzaldiarekin, bereziki nazioarteko zuzenbidearen errespetuari, bakerako deiari eta migratzaileen duintasunaren defentsari buruz egin dituen adierazpenekin, nahiz eta abortuaren eta eutanasiaren aurkako aipamenak ez dituen babestu.

Bide beretik mintzatu da Patxi Lopez PSOEk Kongresuan duen bozeramailea. Hitzaldia txalotu du, bizikidetzaren eta adiskidetasunaren alde esandakoak, batik bat, baina onartu du alderdi "laiko" gisa ez datorrela bat abortuari eta eutanasiari buruz esan duenarekin.

Alberto Nuñez Feijoo PPren buruak, bere aldetik, erabat babestu ditu aita santuaren hitzak. Gainera, Feijook egungo politikaren printzipio falta deitoratu du, eta espainiar gehienek haren mezuarekin bat egiten dutela ziurtatu du, sinesmenak alde batera utzita.