Zapatero: "Ez nuen inorekin hitz egin Plus Ultraren erreskateaz, ez SEPIrekin, ezta Gobernuarekin ere"

Jose Luis Rodriguez Zapatero Espainiako Gobernuko presidente ohiak erabat ukatu du eraginik izan zuela Gobernuak Plus Ultra aire konpainia erreskatatzeko prozesuan. Era berean, defendatu du aholkulari gisa egindako jarduera profesional guztia "legea errespetatuz" egin duela.

"Inork ezin du esan inolako eraginik izan nuenik. Ezta Plus Ultraren erreskateaz inorekin hitz egin nuenik ere, ez SEPIrekin, ez Gobernuarekin. Hori hala da, eta frogatu egingo da", adierazi du TVEko Mañaneros 360 saioan egindako elkarrizketan.

Zapaterok ez du ezer esan Julio Martinez Martinez enpresaburuaren defentsa estrategiari buruz, hark Auzitegi Nazionaleko epailearen aurrean deklaratu ostean. Horretan, presidente ohia eta Plus Ultra erreskatatzeko 53 milioi euroko mailegua elkarrekin lotuta zeudela adierazi zuen.

Gobernuak erreskatea onartu behar zuela eta Martinezi abisatu zionik ere ez du onartu. "Ez nekien SEPIren Kontseiluak zer egingo zuen (...) Ez nuen tramitazioan esku hartu. Ez nuen ezer jakin", esan du.

Era berean, Gobernuko presidente ohiak adierazi du bere bulegoko kutxa gotor batean aurkitutako bitxiak duela urte asko Gobernu batek emandako "kortesiazko opari pertsonala" direla. Herrialdearen izena ez du esan.

"Aspaldikoa da, kortesiazko opari pertsonala", adierazi du. Era berean, gaineratu du "inoiz ez" dela bitxi denda batean sartu.

Kazetariak beste galdera bat egin dio afera honetaz: "Bitxiak onartzea hanka sartzea izan al zen?". "Agian bai", erantzun du. 

Zapaterok azpimarratu du, halaber, haren alaben Whathefav enpresak "bere lana egin" zuela Analisis Relevanterentzat, eta erabat ukatu du legez kanpoko helburuekin erabili dituela.

"Nire alabak testaferro izaten saiatu izana leporatzea. Hori besterik ez zen falta. Mesedez", adierazi du, irmo, buruzagi sozialista ohiak.

Nabarmendu du alabek "beren lana egin" zutela, eta "inola ere ez" duela Analisis Relevante sozietatea erabili dirua haiei desbideratzeko. "Nire alabek beren lana egin dute. Hori guztia frogatu egingo da, eta, oro har, zuhurtziaz jokatu beharko genuke, ezta?", amaitu du.

Espainiako Gobernuko parte sozialistak eta PSOE alderdiak Jose Luis Rodriguez Zapatero presidente ohiari babesa ematen jarraitzen dutela ziurtatu, honek TVEn egindako elkarrizketaren ostean, eta prozedura judiziala eta errugabetasun-presuntzioa errespetatzeko eskatu dute.

Gobernuko iturriek adierazi dutenez, presidente ohiarengan konfiantza izaten jarraitzen dute eta babesa mantentzen dute. Elma Saiz bozeramailearen hitzetan, Zapateroren errugabetasunean sinesten jarraitzen du Gobernuak. 

Zentzu berean hitz egin du PSOE alderdiak ere. Elkarrizketa amaitu eta gutxira hedabideei bidali dien ohar batean, PSOEk nabarmendu du Zapaterok publikoki hitz egiteko hartu duen erabakia babesten duela, eta "instrukzio epailearen aurrean eman duen azalpen zehatza osatu" duela uste du.

Sozialisten arabera, alderdiak "lehen egunetik duen jarrera" mantentzen du: "Erabateko errespetua prozedura judizialaren aurrean eta errugabetasun-presuntzioaren defentsa".

Inbestiduran Sanchezen alde agertu ziren bazkideak bat datoz Rodriguez Zapaterok eskaini duen elkarrizketan emandako azalpenak eskasak izan direla esatean.

PSOEren Gobernuko kide Sumarren ustez, presidente ohiak emandako azalpenak "ez dira nahikoak". Koalizioko iturrien arabera, "delitua egon ala ez, herritarrak desengainatzen jarraitzen du eta ez dago herritar aurrerakoiek espero duenaren mailan".

Bide horretan, Alberto Ibañez Kongresuko bozeramaile albokoak eta Compromis alderdiko diputatuak esan du "ez duela konbentzitzen" eta "zalantza asko" daudela oraindik. "Bitxiek erabilera eta helburua dutela uste dut, eta zein diren argitu beharko du", gaineratu du.

Bestalde, ERCk, Gabriel Rufian Kongresuko bozeramailearen bidez, adierazi du Zapaterok "azalpen gutxi edo bat ere ez" dituela eman hainbat gairi buruz. 

Mezu berbera eman du Maribel Vaquero EAJk Diputatuen Kongresuan duen bozeramaileak ere. Bere hitzetan, presidente ohiak "ez du ekarpenik egin", eta datu gehiago jakiteko epaiketaren zain egon beharko dela gaineratu du. "Atzo genekien gauza bera dakigu", laburbildu du.

Ione Belarra Podemoseko idazkari nagusiaren aburuz ere, "zalantzak eta susmoak ez dira desagertu", eta, elkarrizketaren ostean, "berberak izaten jarraitzen dute". Kongresuko diputatuak deitoratu egin du "Espainiako herritarrengan" eragiten ari den "desafekzioa".

PPko presidente Alberto Nuñez Feijook adierazi duenez, Rodriguez Zapaterok "ez dio ezerri erantzun" telebistan egindako adierazpenetan, eta "ez ditu bere alabak defendatu ere egin". Bere ustez, agerian gelditu da Pedro Sanchezen "jarraibideak" jarraitu dituela, eta iritzi publikoak "arreta galdu dezan" erabili duela gaineratu du, "denbora gehiago" behar duelako.

Ester Muñoz PPk Kongresuan duen bozeramailea gogorrago aritu da eta espainiarrei "adarra jotzea" leporatu dio presidente ohiari, bitxien jatorriari buruzko eta Plus Ultraren erreskateari buruzko "zalantzak" ez dituela argitu leporatuta. Bere burua eta Pedro Sanchez presidentea "defendatzea" izan da elkarrizketaren helburua, "bien etorkizunak lotuta daudelako".

Azkenik, Voxek "makrotrama ustel" gisa definitu du Zapateroren kasua. Pepa Rodriguez de Millan Kongresuko bozeramaileak esan duenez, presidente ohiak "oraindik ez du azaldu zein izan zen bere papera Plus Ultraren erreskatean, bitxien jatorria eta bere alaben papera", eta "platoetan izar bat izango balitz bezala ibiltzea" kritikatu du.