Insausti Donostialdeko udalekin bilduko da ostegunean, etxegabeen egoera aztertzeko

Jon Insausti Donostiako alkatea udalerri mugakideekin bilduko da ostegun honetan, Donostialdean etxerik gabe dauden pertsonen auziari aurre egin eta estrategia bateratuak koordinatzeko asmoz. Hitzorduan Pasaia, Oiartzun, Errenteria, Astigarraga, Hernani eta Usurbilgo udalek —guztiak EH Bilduren esku— eta Lasarte-Oriakoak —alkate sozialistarekin— hartuko dute parte.

Tokiko Gobernu Batzordearen osteko prentsaurrekoan, alkate donostiarrak adierazi du aipatutako udal guztiek ondo erantzun dutela. "Badirudi etxerik gabeko pertsonen inguruko fokua Donostian bakarrik dagoela jarrita", baina "hiri batetik harago doa” arazoa da, "globala da", adierazi du alkate jeltzaleak.

Eskualdeko zinegotziak biltzeko ekimenaren bitartez, azaldu duenez, "lobby moduko bat" osatu nahi du "errealitateen berri elkarri emateko", ekintza "koordinatuak" garatu ahal izateko eta, era berean, "beste erakunde batzuei gauzak planteatzera elkarrekin jotzeko", hala nola Gipuzkoako Foru Aldundiari eta Eusko Jaurlaritzari.

Insaustik berriz ere baztertu ditu Kaleko Afari Solidarioak (KAS) plataformaren “afari solidarioa”» debekatzeko hartutako erabakiagatik jasotako kritikak. Halaber, ukatu egin du Udaltzaingoak arratsaldero ogitartekoak banatzen dituzten boluntarioak kontrolatzen dituenik.

Ildo horretan, atzo bertan Hiritarron Harrera Sarea kolektiboak alkateari "solidaritatea kriminalizatzea" leporatu zion, eta aurten hirian etxerik gabeko zazpi pertsona hil direla adierazi zuen.