Jaurlaritza: 'Lehentasuna babes sozialaren euskal ereduari eustea da'
Ricardo Gatzagaetxebarria Ogasun eta Finantza sailburuak ETBko elkarrizketa batean berretsi duenez, "lehentasuna babes sozialaren euskal ereduari eustea da", jarduera ekonomikoaren hazkuntzarekin eta enplegua sortzearekin batera. Azken hauek, dagozkien neurri eta planak izango dituztela azaldu du.
"Diru-sarrerak 1.200 milioi euro jaitsiko direla kontuan hartuta, gobernatzea lehentasunak jartzea da", adierazi du. "Lehentasuna, Osasunean, Hezkuntzan eta gizarte-bazterkeriaren aurkako borrokan egituratutako babes sozialaren euskal ereduari eustea da", nabarmendu du.
Kulturan Hezkuntzan baino gehiago jaitsiko da aurrekontua
Ogasun eta Finantza sailburuak adierazi du Kultura Sailerako gastua Hezkuntzakoa baino gehiago murriztuko dela, azken hori "lehentasunezkoa baita".
EiTB Kulturaren baitan dago, baina ez du zehaztu bertan zenbat jaitsiko den aurrekontua. Cristina Uriartek zuzentzen duen Hezkuntza, Kultura eta Hizkuntza Politika Saila horretan lanean ari dela esan du. "Hezkuntza ahalik eta gutxien murrizteko lanetan ari da sailburua, baina beste bi arloetan jaitsiera handiagoa izango da", azaldu du.
Akordioak
Ricardo Gatzagaetxebarriak ez du inorekin akordioetara iristea baztertzen eta "ardura gehiena EAJk duen arren, beste alderdiek ere badute euren ardura", zehaztu du. Ildo honetan, "Euskadirentzat luzapen bat baino, hobea da aurrekontuak edukitzea", adierazi du.
Ogasun eta Finantza sailburuak asteazkenean hasiko du bilera-sorta beste alderdiekin, Jaurlaritzak 2013rako aurreikusi dituen aurrekontuen ildo nagusiak zehazteko. "Ikusiko dugu alderdi bakoitzak egiten dituen hausnarketak zeintzuk diren eta egun dugun egoera ekonomikoaren aurrean, euren estrategia politikoak non kokatzen diren".
Azkenik, beste alderdiek zer egingo duten ez dakiela zehaztu du, baina ez duela inorekin akordioetara iristea baztertzen esan du.
Patxi Lopezen legegintzaldian, EAJk ez zuela osoko zuzenketarik aurkeztu eta bozketan abstenitu egin zirela ekarri du gogora.
Gasteizko inbertsioetara bideratuko den bost milioi euroko partidaren inguruan, "Gasteizek dituen ezaugarriengatik eta horretarako dagoen adostasun politikoagatik" aurreko Jaurlaritzak 2012an harturiko konpromisoa dela nabarmendu du. Hala ere, ukatu egin du horrek PPk aurrekontuak babesteko erabakiarekin harreman zuzena duenik.
Bestalde, zerga arloan alderdien artean ireki den eztabaidan "oinarrizko adostasunak" lortzea espero du, PFEZaren eta Sozietateen Zergak aldatzeko. Horren harira, aldi baterako errekargua eratzea baztertu du, eta "zerga erreforma sakona, orekatua eta adostua" bilatzearen alde egin du.
Zure interesekoa izan daiteke
Ikuskizunetako teknikarien grebaren deitzaileak pozik agertu dira lanuzteak izan duen jarraipenarekin
Teknikariok, ESK, LAB, UGT, CCOO, ELA eta CNT Euskal Autonomia Erkidegoko ikuskizunen lehen hitzarmena negoziatzen ari dira, eta patronalari eskatu diote elkarrizketei berriro ekiteko, urtebete baitaramate blokeatuta. Aldi baterako kontratuak, lanaldi oso luzeak, legez ezarritako atsedenaldiak ez errespetatzea, jaiegunetan zein gaueko ordutegian plusik ez jasotzea eta lana eta bizitza pertsonala uztartzeko zailtasunak dituztela salatzen dute.
Langabeziak gora egin du uztailean Euskadin eta Nafarroan: 1.378 eta 534 langabe gehiago dago, hurrenez hurren
Euskadin uztailean 105.590 enplegu-eskatzaile egon dira, ekainean baino 1.378 gehiago. Nafarroan, berriz, 534 langabe gehiago izan dira, 28.843. Eusko Jaurlaritzaren arabera, datu hori hainbat langile lan-merkatuan sartzearekin lotuta dago.
Bizkaiko Golkoa eta Frantzia lotuko dituen goi tentsioko linearako kablea jartzen hasi dira, Lemoiz parean
Bizkaiko Golkoaren eta Frantziaren arteko interkonexio elektrikoa gertuago dago. Goi tentsioko linea honek Gatika eta Bordeletik gertu dagoen Cubnezais batuko ditu eta 276 kilometroko tartea egingo du ur azpian. Ekosistemari kalterik egingo ez zaiola ziurtatzeko, Aztik gainbegiratuko ditu lanak.
Ikuskizunetako teknikariek "enpatia" eskatu diete artistei hiriburuetako jaietan deitutako greban
EAEko lehen lan-hitzarmena negoziatzen ari diren sindikatuek lanuzteak deitu dituzte abuztuaren 5, 14 eta 26rako, lan-hobekuntzak eskatzeko eta patronalari negoziazioei berriro ekiteko eskatzeko.
Euriborrak % 2,855ean itxi du uztaila, mailarik altuena 2024ko irailetik
Ekainarekin alderatuta, tasa oinarrizko 6 puntu igo da.
Euroguneko inflazioa % 2,9an kokatu da uztailean, hamarren bat igota
Eurostatek argitaratu berri duen urte arteko tasa % 3,8koa da Espainian, ekainekoa baino bi hamarren handiagoa, eta % 2,4koa Frantzian, joan den hilean baino lau hamarren handiagoa. Energiaren esparruan igo da gehien inflazioa.
Gipuzkoako Moeve gasolindegietako langileek greba ziklo bati ekin diote, lan-baldintzak hobetzeko asmoz
Lehenengo lanuztea ostegunean hasi zen, 22:00etan, eta igandean amaituko da. Mobilizazioen artean, gaur elkarretaratzea egin dute AP-8 autobidearen Oiartzungo gasolindegian.
Gasolina eta gasolioa 6 zentimo baino gehiago garestitu dira litroko, Hidrokarburoen Zerga Bereziaren igoeraren ondorioz
Batez beste, gasolina depositua betetzeak duela urtebete baino 8,5 euro gehiago balio du, eta gasolio deposituak ia 16 euro gehiago, abuztuko irteera-operazio betean.
38 urteko langile bat oso larri zauritu da Alesbeseko kontserba-enpresa batean izandako istripuan
Foru Gobernuak zabaldutako oharraren arabera, langileari ur irakina erori zaio gainera, eta erredurak ditu gorputzaren % 80an.
Bazka erosketa bateratua aztertuko du Euskadik, lehorteak eragindako larre-eskasia dela eta
ENBA sindikatuaren eta UAGA Arabako nekazarien elkartearen ordezkariak Eusko Jaurlaritzarekin bildu dira Lakuan, beroak eta euri faltak lehen sektorean eragindako kalteak aztertzeko.