Darpon eta Mugica Osakidetzako LEPean legez kanpo elkartzea egotzita inputatzea errefusatu du epaileak

Jon Darpon Osasun sailburu ohia eta Maria Jesus Mugica Euskal Osasun Zerbitzuko zuzendari nagusi ohia inputatzea errefusatu du Osakidetzako 2016-1017ko lan-eskaintza publikoan egindako azterketen ustezko filtrazioa ikertzen ari den epaileak.

Epaileak errefusatu egin du, irailaren 1ean kaleratutako auto batean, LAB sindikatuak egindako eskaera, Darpon, Mugica eta Osakidetzako eta Herri Arduralaritzaren Euskal Erakundeko (IVAP) beste kargudun batzuk inputatzea eskatu baitzuen. Sindikatuak helegitea aurkeztuko duten aztertzen ari dira.

Instrukzio-egilearen ustez, "akusazioak adierazitako pertsonak ez dira ezein elkartetako kide, salbu eta Eusko Jaurlaritza, Osakidetza edo IVAP elkartetzat hartu nahi badira, eta, era berean, erakunde horiek ez dituzte delituak egitea sustatzen edo erakunde-egiturak erabiliz legez kanpoko jokabideak sustatzen".

"Ez dago jasota, ezta zantzuen arabera ere, elkarte 'paralelo' bat eratu dutenik edo legez kontrako helbururen batekin bildu direnik, ezta legez kontrako jokabiderik egin edo sustatu dutenik ere. Prozedura-fase honetan ez dago zantzurik deskribatutako motako elementuetako bat ere ez dagoela ulertzeko, eta, beraz, ez da bidezkoa kontzeptu horrengatik adierazitako pertsonak ikertutzat jotzea", argudiatu du magistratuak.

"Zilegi ez den elkarteaz" gain, LABek pertsona horiek inputatzeko eskatu zuen, sekretuak ezagutaraztea, kontratazioan iruzur egitea, prebarikazioa egitea eta delituak jazartzeari uko egitea egotzita. Horiek guztiak errefusatu ditu epaileak eldiario.es-ek aurreratu eta Efek ere eskuratu duen auto batean.

Bestalde, auzi honen instrukzioa egiten ari den Gasteizko 2 zenbakiko Epaitegiko titularrak erabaki du, ESK sindikatuak eskatuta, Angiologia eta Kirurgia baskular, Urologia eta Kardiologiako probekin lotura duten bederatzi pertsona gehiago ikertutzat deitzea. Horrela, auzian inputatuak 20 dira dagoeneko.

Fiskaltzak eskatuta, halaber, espezialitate ezberdinetako bederatzi lekuko deklaratzera deitzea onartu du.

Halaber, ikerketa sei hilabetez luzatzea erabaki du epaileak. ESKrentzat erabaki hori positiboa da, "beharrezko eginbide guztiak aurrera eramateko denbora nahikoa" izan daitekeelako. Sindikatuak esan du autoa "sakon" aztertuko dutela, epaileak onartu ez dituen zenbait eskaera egon direlako, eta baliteke helegitea aurkeztea.

Sindikatuen iritzia

ESK sindikatuak "positibotzat" jo du epaileak ikerketa luzatzeko hartu duen erabakia, baina helegitea aurkezteko aukera aztertzen ari dela iragarri du, sindikatuaren eskaera gehiago onartzeko helburuarekin. Testuinguru horretann, denbora-tarte hori "egokitzat jotzen diren eginbide guztiak aurrera eramateko nahikoa" izatea espero du. Hain zuzen ere, ESK herri-akusazio gisa aurkeztu zen auzian, LAB sindikatuarekin batera.

Halaber, autoak ESK sindikatuak eskatutako neurri asko tramitera onartzen dituela nabarmendu du, besteak beste, filtrazio horietan ustez parte hartu duten bederatzi pertsona ikertu gisa deklaratzea, baina gogorarazi du 32 pertsona gehiago ikertzeko eskatu zuela.

"Osakidetzako langile guztiok aurre egiten diegunean eta sistema horretan parte hartuko ez dugula esaten dugunean amaituko da sistema klientelar hori", azpimarratu du ESK sindikatuak.

LABentzat, ordea, "albiste txarra" da epaitegiak Osakidetzaren LEPan "gertatutakoa argitzeko ezinbesteko hainbat ate itxi" nahi izatea, eta, beraz, helegitea aurkeztuko duela iragarri du.

Sindikatuaren iritziz, "Osakidetzako zuzendaritza izan dela filtrazioak bermatzeko estrategia eraginkorra diseinatu duena, baita bere inpunitatea ere. Zuzendaritza hori izan da kezko gortinak sortu dituena praktika ustel hori ezkutatzeko".

"Eremu publiko eta pribatuaren arteko desberdintasuna ezinbestekoa da. Eremu publikoko kontratazioa berdintasun, merezimendu eta gaitasun printzipioetan oinarritu behar da, eta ezein epaimahaik ez luke onartu behar irizpide edo kidetasun pertsonalen zein politikoen arabera taldeak modu irregularrean eratzea", adierazi du LABek ohar batean.

Alderdien balorazioa

Testuinguru horretan, denborak arrazoiak ematen eta kentzen dituela esan du EAJk, epaileak Darponen inputazioa errefusatu ostean. Hori dela eta, orain erantzukizunak inork hartuko ote dituen galdetu du Twitterren zabaldutako mezu batean. Alderdi jeltzaleak ohartarazi du "denak ez lukeela politikan balio behar... baina batzuetan, tamalez, denak balio du".

"Denborak, behintzat, arrazoiak ematen eta kentzen ditu", esan du EAJk, eta Darponi besarkada handi bat igorri osteaan, ondorengoa galdetu du: "Nork hartuko ote ditu orain ondokoari exijitzen dizkion erantzukizunak?".

Bestalde, Elkarrekin Podemoseko Miren Gorrotxategik azpimarratu duenez, epaileak ebatzi duenez "ez dago erantzukizun penalik", baina "ardura politikoa" egon dela uste du, "agerikoa baita kontrol neurrien utzikeria".

Bestalde, Carmelo Barrio PP+Cs taldeak Eusko Legebiltzarrean duen bozeramaileak adierazi duenez, Eusko Jaurlaritzak eta EAJk ezin dute "paparra atera" Darpon inputatu ez dutelako. Izan ere, "une honetan 20 inputaturekin zigor-arloko prozesu bat irekita badago, Osakidetzaren lan-eskaintza publikoaren antolaketa, kudeaketa eta izapidetzea gaizki diseinatuta egon ziren".

"Milaka pertsonak beren etorkizuna jokoan" zutela ohartarazi ostean, norbaitek prozesua "gaizki eta iruzurrez antolatu eta izapidetu" zuela salatu du, "meritu, gaitasun, berdintasun eta oposizioetarako lehia askearen printzipioak urratuz".