Gipuzkoako adinekoen egoitzetan beste lau greba egun deitu dituzte ELAk eta LABek
ELA eta LAB sindikatuek beste lau greba egun deitu dituzte ekainerako eta uztailerako Gipuzkoako adinekoen egoitzetan, langileen egoera "jasanezina" dela eta negoziazioa "blokeatuta" dagoela eta. Sektoreko 6.000 beharginei, gehienak emakumeak, ekainaren 30erako eta uztailaren 1erako, 14rako eta 15erako deituta dauden lanuzteetan bat egiteko deia egin diete sindikatuok.
Ohar banatan, gatazka konpontzeko patronalak duen "borondate falta" salatu dute bi sindikatuek, eta Gipuzkoako Foru Aldundiaren jarrera ere kritikatu dute; zehaztu dutenez, foru erakundeak zerbitzuaren % 90 finantzatzen du.
ELAren arabera, langileek mobilizazioak indartzearen alde egin dute asanblean, patronalek "negoziazio bidea zapuztu ostean" eta Aldundia bilerara agertu ere ez zela ikusita. Patronalek, sindikatuak argitu duenez, ELAren proposamenetik bi puntu kentzeko eskatu zuten (sektoreko hitzarmena enpresetara pasatzea eta aurreko urteetako atzerapenak eskatzea).
Bost urteko negoziazioen ondoren, "argi dago Aldundiak eta patronalek ez dutela borondaterik sektore horretako egoera larria hobetzeko", deitoratu du sindikatuak, eta ohartarazi du "pausorik eman gabe jarraitzen badute, greba eta mobilizazioak areagotuko" dituztela.
ELAk gogorarazi duenez, pandemia garaian langile horiek lehen lerroan egon ziren, eta "orain egoera ez da hobetu, kontrakoa baizik. Lan kargak pandemiaren aurretik baino handiagoak dira, lanpostu asko ez dira bete, lan erreformak eragindako prekarietatea handitzen ari da eta langileek ez dute erreparazio emozional kolektiborik jaso. Horietako asko erresidentziak uzten ari dira, haien lan baldintzak jasanezinak direlako. Egoera horrek ondorio larriak ditu lan baldintzetan eta herritarrei eskaintzen zaien zerbitzuan", esan du.
Bestalde, LABek egoera "jasanezina" dela adierazi du. Pandemiak "jadanik larria zen egoera" larriagotu du, eta, horren ustez, "urgentziazkoa da irtenbide duin bat erdiestea: egoerak eskatzen duelako eta sektoreko langile zein egoilarrek merezi dutelako".
Sindikatu horren iritzian, egoera "zerbitzu publikoen pribatizazioaren, lan prekarietatearen eta sektore feminizatuek duten errekonozimendu sozial eta ekonomiko ezaren ondorio" da. Gainera, gogorarazi duenez, honakoa ez da "lan gatazka soil bat; gipuzkoar guztioi eragiten digun auzi soziala baizik".
LABek salatu duenez, patronalak "negoziazio mahaia gatazka betikotzeko erabili nahi du", eta hori "onartezina" da, horren aburuz. Era berean, Gipuzkoako Foru Aldundiaren "erantzukizuna" ere azpimarratu du sindikatuak: "Haiei dagokie orain mahaia desblokeatzeko pausoak eman eta irtenbidea erdiesteko proposamenak mahai gainean jartzea".
Bi greba egun Bizkaiko erresidentzietan
Hain justu, ELA sindikatuak greba deituta dauka Bizkaiko adinekoen egoitzetan bihar, ekainaren 23an, eta etzi, hilaren 24an. Aurtengo seigarren eta zazpigarren lanuzteak izango dira.
Beste ohar batean azaldu duenez, bihar goizean manifestazioa egingo dute Bilboko kaleetatik, eta, hura bukatuta, Bizkaiko Ongizate Sozial Departamentuaren egoitzan akelarre bat irudikatuko dute. "Bizkaiko egoitzetako sorginak sutara botatzeko, beren lan-baldintzak hobetu eta zainketa-eredua benetan alda dezaten", nabarmendu dute.
Biharamunean, beste martxa bat egingo dute Arriagatik Cebek Bizkaiko patronalaren egoitzaraino.
Albiste gehiago ekonomia
Red Electricak "premiazko neurriak" eskatu ditu, beste itzalaldi bat eragin dezaketen tentsio aldaketak atzemanda
Azken bi asteotan, sare-elektrikoan hainbat gorabehera atzeman dituzte, tartean, "tentsioaren bat bateko aldaketak". Horrek, "argindar eskariaren edota eskaintzaren deskonexioa" eragin dezake, eta sare-elektriko osoa desegonkortu.
Garraio Ministerioak Bilboko aireportua handitzea onartu du
Planak aireontziak aparkatzeko plataforma eta aparkaleku publikoen eremua handitzea jasotzen du, baita karga-eremua berrantolatzea ere.
Ternua taldeak Gipuzkoako Borobitex enpresari saldu dio Loreak Mendian marka
Joan den ekainetik, borondatezko hartzekodunen konkurtsoan sartua da Arrasateko ehungintza enpresa ospetsua. Hainbat inbertitzailerekin negoziatzen ibili da hilabeteotan enpresa zatika saldu eta zorra kitatzeko.
Bruselak altzairuaren gaineko muga-zergak bikoiztea proposatu du, Txinaren esportazioetatik babesteko
Proposamena Europako Parlamentuak eta estatu-kideek onartu beharko dute, aurrera egiteko.
Eusko Jaurlaritzak bi milioi euro gehiago jarriko ditu emisio gutxiagoko ibilgailuak erosteko dirulaguntza-programan
Emisio gutxiagoko autoak erosteko dirulaguntza-programaren hasierako aurrekontua —5 milioi euro— agortu da, eta dagoen eskariari erantzuteko erabaki du zenbatekoa handitzea.
Soldata-arrakala % 9koa da EAEn
Gogorarazi beharra dago, halaber, Estatistikako Espainiako Institutuaren arabera, 2023an, gizonen eta emakumeen arteko soldata-arrakala % 12,81ekoa zela.
"Bi aldeak ahaleginduko gara akordio-proposamena adosten"
Gasteizko Udalak azpikontratatutako Enviser enpresak eta hango langileen ordezkariek (LAB, ELA eta ESK) aurreakordioa lortu dute. Proposamenak sei hilabete baino gehiago iraun duen gatazkari amaiera eman diezaioke. Bi aldeek bilera egin dute gaur, Precon, eta aurreko bileran ereindako haziak aurreakordioa eman du.
Akordioa egin dute Gasteizko lorezainek eta enpresak
Ados jarri dira Precoren egoitzan egin duten bederatzigarren bileran. Orain, azpikontratatutako 80 langileek erabakiko dute oniritzia eman ala ez, astearte honetan egingo duten bozketaren bidez.
Aurre-akordioa Iruñerriko hiri-garraioaren hitzarmenean
Moventis TCCk eta enpresa-batzordeak aurre-akordio bat lortu dute, eta, horri esker, langileek hitzarmen-proposamen bat bozkatu ahal izango dute. Kontsulta egin arte lanuzteak amaitzeko konpromisoa hartu dute, halaber.
Imsersoko bidaiak astelehen honetatik aurrera izango dira eskuragarri
Hainbat berritasun dakar aurtengo uztak, besteak beste, hotel jakin batzuetan animaliekin bidaiatzeko aukera egongo da, penintsulako kostaldera eta uharteetara egiten diren bidaietan. Lekuen % 2 gordeko dira horretarako.