Azpiazu: "Euskadik ziurgabetasun ekonomikoari zuhurtziaz eta arretaz egingo dio aurre, egoera sendo batetik"

Pedro Azpiazu Ekonomia eta Ogasuneko sailburuak, Euskal Ekonomiaren 2021 Urteko Txostenaren aurkezpenean, aurreratu du Euskadik ekonomia "sendoa" duela eta, horri esker, inflazioari aurre egiteko gai izango dela.

"Euskadik ziurgabetasunari aurre egingo dio, zuhurtziaz eta arretaz, eta inflazioak herritarrengan dituen eraginak aritzen saiatuko da, betiere egoera ekonomiko sendo batetik", adierazi du sailburuak joan den astean Euskadiko ekonomiaren inguruko datu "positiboak" zerrendatu eta azaldu ondoren.

Azpiazuk onartu du ziurgabetasun handia dagoela, are gehiago Errusiak gasaren Europarako hornidura eten dezakeela kontutan izanik. Hala ere, azpimarratu du Eusko Jaurlaritza beharrezko neurriak hartzen ari dela hori gertatuko balitz ahalik eta baldintzarik onenetan egoteko. "Euskadik garrantzi handiko azpiegitura bat du, Bahía de Bizkaia Gas, munduko edozein lekutatik gasa inportatzeko aukera ematen duena. Horrek malgutasun handia ematen digu; Errusiako gasarekiko mendekotasuna oso txikia da, edo beste edozein herrialdetatik datorren gasarekin ordezka daiteke. Horrek gas-hornidura bermatzea ahalbidetzen digu", adierazi du.

Punturik kezkagarriena, baina, inflazioa dela azpimarratu du, gizarteak aurrean duen arazo handiena baita. Azken datuek Euskadiko Barne Produktu Gordinaren Indizea % 9,6an kokatzen dute, Espainiakoa, gaur ezagututako datua, uztailean % 10,8an eta Eurogunekoa % 8,6an. "Oso ehuneko handiak dira eta ez dago argi sabaia jo duten", gaineratu du.

Azaldu du gorako joera horretan prezioen igoera eragin zuten indarrek (lehengaiek eta energiak) hilabete batzuk daramatzatela merkatzen, eta hori gainerako produktuetara hedatuko dela, "baina ez da prozesu azkarra izango".

Azpiazuren agerraldiaren ondoren, Iñaki Barredo sailburuordeak hartu du hitza, eta adierazi du epe ertainera Euskadik erronka jakin batzuei aurre egin beharko diela, hala nola energia-erronka ekologikoari, erronka teknologiko digitalari eta erronka demografiko sozialari.