Hithium enpresa txinatarrak Euskadi aukeratu du Europa hegoaldean energia-biltegiratzeko prozesua gidatzeko

Eusko Jaurlaritzak eta Hithium enpresa txinatarrak akordio estrategikoa sinatu dute, Europa hegoaldean energia biltegiratzeko industria gidatzeko.

Hala iragarri du Mikel Jauregi Industria, Trantsizio Energetiko eta Jasangarritasun sailburuak, Gasteizko Ganberako kontrolerako osoko bilkuran Alvaro Gotxi PPko parlamentariak egindako galdera bati erantzunez.

Sailburuak azaldu duenez, energia berriztagarriek "eragozpen" bat badute, lurrunkortasuna, eta, beraz, horiek biltegiratzea lehentasunezkoa eta osagarri ezin hobea da energia mota hori garatzeko.

Horrela, Municheko "The Smarter E Europe" azokaren barruan, Eusko Jaurlaritzak Elkar Ulertzeko Memoranduma (MoU) sinatu du Hithium enpresarekin, energia biltegiratzeko sistema estazionarioen alorrean munduko enpresa handienetako bat denarekin. Akordio hori funtsezko mugarria da Euskadi industria horretan Europako erreferente izateko.

Hitzarmena bi aldeen arteko elkarlan estuaren emaitza da, eta hiru ardatz estrategiko ditu: lankidetza teknologikoa, Euskal Autonomia Erkidegoko enpresek proiektuaren garapenean parte-hartze aktiboa izatea eta fabrikazioan zirkulartasuna bultzatzea. Biltegiratze sistemak Euskadin fabrikatzea ahalbidetuko duen soluzio integrala garatzeko helburua partekatzen dugu, betiere erreferentziazko bazkide industrial batekin elkarlanean eta Euskal Autonomia Erkidegoko zentro teknologikoen babesarekin.

Itun hori urrats erabakigarria da Europan ekoizpen- eta berrikuntza-gaitasuna lokalizatzeko estrategian, eta Euskadi, puntu komertziala izateaz haratago, Hithium enpresak kontinentearen hegoaldean izango duen fabrikazio eta operazioetarako base bihurtzen du. Horri esker, Euskaditik koordinatu ahal izango dira ekoizpena eta Europako beste merkatu batzuetarako banaketa, eta, hala, Europarako gune estrategiko gisa betetzen duen eginkizuna finkatuko da.

Energia eolikoak eta eguzki-energiak Europan hedapen handiagoa izan ahala, gero eta handiagoa izaten ari da energia biltegiratzeko soluzio aurreratuen premia, malgutasuna eskainiko duten eta sarearen egonkortasuna bermatuko duten soluzioen premia. Testuinguru horretan, Eusko Jaurlaritzak estrategikotzat jotzen du trantsizio energetikoaren industrializazioa sustatzea eta emisioak murrizten laguntzea, betiere biltegiratze-teknologia efiziente eta jasangarrien bidez. Bateria estazionarioak Teknologia Garbien Euskal Zerrendan jasota daude, eta, beraz, % 35eko kenkari fiskala dute.

Horrela, Eusko Jaurlaritzak trantsizio energetiko jasangarriaren aldeko konpromisoa berresten du, eta emisio txikiagokoa industria lehiakorragoa eta efizienteagoa garatzea sustatzen du. Hithium enpresarekin hitzartutako lankidetza horrek islatzen du Euskadik industria efizienteagoaren eta jasangarriagoaren alde egin duen apustua, "industria gehiago, industria hobea, emisio txikiagoak" lelopean.