Eusko Jaurlaritzak Berrikuntzaren Itsasargiak abiatu ditu, Euskadi abangoardia zientifiko eta sozialeko Europako polo gisa sendotzeko

Eusko Jaurlaritzak Berrikuntzaren Itsasargiak aurkeztu ditu gaur, berrikuntzan baliabide ekonomikoak eta giza kapitala lehentasunez bideratzeko diseinatutako tresna estrategiko berria. Ekimen honek koherentzia eman nahi die Jaurlaritzaren berrikuntza-politika guztiei, eta Euskadi goi-mailako berrikuntza alorrean Europako polo gisa finkatzea du helburu.

Getxon egin duten aurkezpen ekitaldian, Imanol Pradales lehendakaria, Juan Ignacio Perez Iglesias Zientzia, Unibertsitate eta Berrikuntza sailburua, Noël D 'Anjou Ogasun eta Finantza sailburua eta Mikel Jauregi Industria, Trantsizio Energetiko eta Lehiakortasun sailburua izan dira.

Estrategia berriak hiru trantsizio nagusi bultzatuko ditu: trantsizio digitala, energia eta ingurumen trantsizioa, eta trantsizio demografikoa, osagungintzari lotuta. Trantsizio bakoitzari lotuta, hiruna itsasargi zehaztu dituzte, horiei lotutako ikerketa, enpresa proiektu eta abar bultzatzeko.

Itsasargien helburu orokorra goi-mailako ezagutza sortzea da, gizartean inpaktua izateko helburu esplizituarekin. Itsasargi hauek gida izango dira berrikuntza disruptiboak aurkitzea eta garatzea sustatzen duten ikerketak eta jarduketak garatzeko, berrikuntza abangoardiako ezagutzaren sorkuntza gisa ulertuta, epe labur eta ertainean inpaktu ekonomikoa edo soziala sortzeko xedearekin.

Imanol Pradales lehendakariak Eusko Jaurlaritzaren apustua nabarmendu du bere hitzaldian. “Aukeratzen eta arriskatzen ari gara, onak garen horretan indartsu jartzen, Euskadirako arlo estrategikoak fokalizatzen”, esan du. 

Zientzia, Unibertsitate eta Berrikuntzako sailburu Juan Ignacio Perez Iglesiasek azaldu duenez, “berrikuntza-itsasargiak pentsatuta daude hiru trantsizioek planteatzen dizkiguten erronkei erantzuteko eta erronka horiei soluzio egokiak aurkitzeko”. “Horietako bakoitzak biltzen dituen itsasargiak eta ikerketa- eta berrikuntza-ildoak aukeratzeko, oso kontuan hartu ditugu zientzian eta berrikuntzan ditugun ahalmenak. Halaber, beste instituzio batzuek arlo horretan egiten dituzten ahaleginen gidari izan nahi dute, eta institutu ekonomiko eta soziala izan”, gaineratu du.

Estrategia berria Berrikuntza Funtsaren baliabideekin finantzatuko da, eta beste jatorri batzuetako funtsen ekarpena sustatzen du. Datozen urteetarako aurrekontu-aurreikuspena Jaurlaritzaren aurrekontuetan esleitutako zenbatekoetan oinarrituta dago. Berrikuntza Funtsak 81 milioi euro izango ditu 2026an, eta % 6 handituko da urtero, 2030ean 103 milioi eurotik gorakoa izateko.