Arrasate, Pasaia eta Zestoa etxebizitzako gune tentsionatu direla argitaratu du Espainiako Aldizkari Ofizialak

Espainiako Etxebizitza eta Hiri Agenda Ministerioak astelehen honetan argitaratu du Estatuko Aldizkari Ofizialean (BOE) Arrasate, Pasaia eta Zestoa  (Gipuzkoa) etxebizitza merkatuko gune tentsionatuak direla, eta horri esker, udal horiek alokairuaren prezioak mugatu ahal izango dituzte.

EAEko 40 udalerri baino gehiago aitortu dira etxebizitzako gune tentsionatu gisa, tartean Bilbo, Donostia eta Gasteiz hiriburuak, eta Getxo, Basauri, Ermua, Zarautz, Hernani eta Zumaia, besteak beste.

Astelehen honetan BOEn argitaratutako ebazpenak bihartik, apirilaren 28tik, aurrera izango du eragina, eta hiru urtez egongo da indarrean.

Etxebizitza Legearen 18. artikuluan jasota dago eremu bat gune tentsionatu gisa deklaratzeko aukera, eta horrek ahalbidetzen du alokairuaren prezioari muga batzuk jartzea.

Eremu tentsionatu izendatzeko, etxebizitza-eskubidearen legeak ezartzen dituen bi irizpideetako bat bete behar da, gutxienez. Batetik, hipotekaren edo alokairuaren kostua, gehi oinarrizko gastu eta hornidurak, orotara, batez beste, diru-sarreren % 30 baino gehiago izatea.

Bestetik, inguruko etxebizitzen prezioak aurreko bost urteetan autonomia-erkidego horretan erregistratutako KPIa baino % 3 gehiago hazi izana.

Eremu tentsionatu izendatzeak etxebizitza eskuratzen laguntzeko hainbat neurri baliatzeko aukera ematen du. Azpimarragarriena da alokairuen prezioei Etxebizitza Ministerioak eremu bakoitzera egokitutako erreferentzia-indize baten arabera ezarritako prezio-tartearen arabera mugatzeko aukera da.

Errenta muga hori merkatura ateratzen diren eta azken bost urteetan errentan egon ez diren pisu guztiei aplikatuko zaie, bai eta edukitzaile handien kontratu guztiei ere, hau da, bost etxebizitza edo gehiago jabetzan dituztenei.

Eremu tentsionatu izendatu izanak, halaber, aukera ematen du iraungita dauden kontratuetan urtebeteko hiru ezohiko luzapen ezartzeko, betiere zenbait baldintza betetzen badira.