Euskadiko argindar autokontsumoaren egungo potentzia duela bost urtekoa halako 27 da

Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak nabarmendu du Euskadin instalatutako autokontsumo-potentzia 186 megawatt (MW) handitu dela azken bost urteetan, 7 MW-tik 193 MW-ra igaro baita.

Hazkunde horren helburua da bertako energia berriztagarria ekoiztea eta inportatutako erregai fosilekiko mendekotasuna gutxitzea.

Beirazko ontziak ekoizten dituen Vidrala enpresak Laudion duen autokontsumo fotovoltaikoko planta inauguratu dute astearte honetan Mikel Jauregi Industria sailburuak eta Irantzu Allende Trantsizio Energetikoko sailburuordeak.

Azpiegitura berria Euskadiko autokontsumo fotovoltaikoko industria-instalaziorik handienetakoa da: 7 megawatteko potentzia du eta 30.000 metro koadroko industria-estalkia hartzen du. Inbertsioa 3,2 milioi eurora iritsi da, eta % 25eko dirulaguntza jaso du Eusko Jaurlaritzaren autokontsumorako laguntza-programatik, Energiaren Euskal Erakundearen (EEE) bitartez.

Plantari esker, energia berriztagarriaren erabilera handitu egingo da, urtero 500 milioi beirazko ontzi baino gehiago ekoizten dituen Arabako fabrikaren ekoizpen-prozesuan. Urtean 1.909 tona CO2 isurtzea saihestuko da.

Bisitan, sailburuak azpimarratu du Euskadin "autonomia energetikoan aurrera egin" behar dela "bertako elektrizitate berriztagarria sortzeko gaitasuna garatzeko, inportatutako erregai fosilekiko mendekotasuna murrizteko".

Ildo horretan, Eusko Jaurlaritzak abian jarritako autokontsumo-programa nabarmendu du; izan ere, horri esker Euskadik potentzia instalatua 186 MW handitu da azken bost urteetan (7 MW-tik 193 MW-ra igaro baita). Horrez gain, gogorarazi du berriki onartu direla 72,5 MW batzeko autokontsumo-proiektuak, tartean Labrazako bi parke eolikoak.

"Autokontsumo elektrikoaren potentzia berrien ia % 60 industria-pabiloietako instalazio fotovoltaikoei dagozkie. Alde horretatik, Vidrala energia-trantsizioaren aldeko apustua egiten duen industriaren adibide garbia da, Euskadiko autokontsumo industrialeko plantarik handiena jarri baitu martxan. Vidralak kostuak murrizten ditu, jasangarritasunean irabazten du eta lehiakortasuna handitzen du", nabarmendu du Jauregik.