Ikuskizunetako teknikariek hiru greba egun deitu dituzte EAEko hiru hiriburuetako jaietan

Ikuskizunetako teknikariek ordezkatzen dituzten sindikatuek grebak deitu dituzte abuztuaren 5, 14 eta 26rako, hiru hiriburuetako jaiekin batera. Gasteizko Txosna Batzordearen, Donostiako Piraten eta Bilboko Konpartsen babesa dute.

Ikuskizun eta ekitaldien hitzarmena negoziatzen ari diren Teknikariok erakundeak eta ESK, LAB, UGT, CCOO, ELA eta CNT sindikatuek jakinarazi dutenez, sektoreko lan-baldintzak hobetzeko "aurrerapausorik ez" dagoela salatzeko deitu dituzte lanuzteak.

EUKI patronalak negoziazioan darabilen "utzikeria" salatu dute sindikatuek, eta gatazkan langileek duten "indarrarekin eta batasunarekin talka" egiten du.

Horregatik, lehenengo lanuztea abuztuaren 5ean egingo dute Gasteizko jaietan; bigarrena, abuztuaren 14an, Donostiako Aste Nagusian; eta hirugarrena 26an, Bilbokoan.

Euren borrokak "babesak batzen" jarraitzen duela ziurtatu dute, eta, zehazki, Bilboko Konpartsen, Donostiako Piraten eta Gasteizko Txosna Batzordearen babesa, "sektorearen problematika eta prekarietatea bertatik bertara ezagutzen dutelako".

"Babes horrek erakusten du jai duinak defendatzeko ezinbestekoa dela langileen eskubideak defendatzea. Kultura ezin delako esplotazioaren sinonimo izan", hausnartu dute.

Gainera, borroka horri eutsiko diotela ohartarazi dute, "enpresek, ordea, ez dute zentzuz jokatzen eta langileei baldintza duinak bermatzeko elkarrizketei berriro ekitea saihesten dute".