Anestesiak Alzheimerra izateko arriskua areagotzen du

Espainiako zientzialariek burututako ikerketa baten arabera, isofluranoa (harnastutako modalitatean oso ohikoa den osagaia) duen anestesia behin eta berriz erabiltzeak Alzheimerra garatzeko arriskua areagotu dezake, genetikoki joera hori duten pertsonengan, Efek jakinarazi duenez.

Journal of Alzheimer's Disease egunkarian argitaratuko lana aurrerapauso handia izan daiteke Alzheimerraren gaixoentzat. Izan ere, "proba genetiko erraz batzuk" eginez, joera genetikoa dagoen ala ez jakingo litzateke eta horrela, gaixoaren arriskua gutxituko lukeen anestesia egokia erabiliko litzateke.

Saguak erabili dituzte ikerketan. Sagu osasuntsuei eta Alzheimerra eragiten dituzten mutazioak zituztenei anestesia eman diete astean birritan eta hiru hilabetez.

Mutazioak zituztenen heriotza-tasa gora egiten zuela ondorioztatu zuen azterketak. Horrez gain, anestesiaren ondoren bere onera etortzen denbora gehiago behar zuten horiek eta beraien portaeran arazo iraunkorrak eragiten zituen.

400.000 pertsona inguruk Alzheimerra dute Espainian. Proba bidez diagnostikatu ezin daitekeen burmuineko endekapenezko patologia bada ere, euren sintomak hobetzeko zenbait tratamendu eraginkor daude.