Munduan 25 milioi gaixo daude Alzheimerrak jota

Alzheimerraren Nazioarteko Eguna da gaur. Mundu osoan 25 milioi pertsona daude gaitzak jota; milioi erdi inguru, Espainiako Estatuan.

Alois Alzheimer neurologo alemaniarrak diagnostikatu zuen lehenengo aldiz gaixotasuna 1906an, baina 80ko hamarkada arte ez zen alarma piztu. Izan ere, orduan milaka ziren gaixoak; ospetsuen artean, Ronald Reagen AEBetako presidentearen eta Rita Hayworth aktorearen kasuak izan ziren sonatuenak.

Zazpi segundoan behin gaitzaren kasu berri bat atzematen da munduan, hau da, urteko 4,6 milioi kasu berri, eta kopuru hori hazten joango dela aurreikusi dute.

Gaixotasun neurodegeneratiboa da, baina urte asko igaro ondoren iristen da heriotza. Memoria, orientazioa, hizkuntza eta mugikortasuna galtzea dira horren sintoma nagusiak.

Diagnostikatzeko zaila da, eta 65 urtetik gorako pertsonei eragiten die batez ere. Gainera, oraindik ez dute lortu gaixotasunari aurre egiteko metodo eraginkorrik.

Zaintzaileek ere pairatzen dituzte gaixotasun horren ondorioak, eta senideak izaten dira gehienetan maite duten horren gainbeheraren lekuko.