Gordillo: 'Ez dakit ministroa mozkortuta dagoen edo ergela den'

Manuel Sanchez Gordillo Marinaledako (Sevilla) alkatea Barne ministroaren aurka azaldu da azken honek Andaluziako Langileen Sindikatuak Kordobako lur-sail bat hartzea "handikeria" izan dela esan ostean. "Ez dakit ministroa mozkortuta zegoen edo ergela den", adierazi du.

Bestalde, Sevillako Fiskaltzak IU alderdiko diputatua auzipetzea eskatu du supermerkatuen lapurretan "beharrezko laguntzaile eta eragile" gisa jokatzeagatik.

Jorge Fernandez Diaz ministroak Andaluziako Langileen Sindikatuak Kordobako lur-sail bat hartzea "handikeria" izan dela esan eta Juan Manuel Sanchez Gordillo IULV-CA-ko diputatuak barregarritzat jo du ministroa.

Andaluziako Langileen hirugarren martxa aurkezteko egin duten prentsaurrekoan, "Lepeko txiste txar bat" dela esan du Sanchez Gordillok, eta ministroari "joateko" eskatu dio.

Halaber, lur-sailaren jabeari "salaketa jartzeko" eskatzea "izugarria" dela uste du, eta ildo honetan, "frankismoa eta berpiztutako Gestapoa" dela adierazi du.

Bestalde, Diego Cañamero Andaluziako Langileen Sindikatuko bozeramileak atzerrian ematen ari diren itxuraz hitz egin du. "Itxura txarra ez dugu guk ematen, Gürtel auziak, Andaluziako lan erregulazioko txostenak, murrizketek eta arrisku sariak ematen dute", adierazi du. Sanchez Gordillok "Iñaki Urdangarin bezalako pertsonek eta Emilio Botinek ematen dute itxura txarra" gaineratu du, "dirua paradisu fiskaletan duela konprobatu baita; segituan Manoleteren heriotza leporatuko digute", adierazi du.

Barne ministroari " lapurrak langileen artean beharrean, banketxe gizonen artean bilatzeko" eskatu diote, eta "ez gaituzte fusilatzen, dagoeneko modan ez dagoelako", gaineratu dute.

Bestalde, Sevillako Fiskaltzak supermerkatuen lapurreten auzian Sanchez Gordillo auzipetzea eskatu du, izan ere, "laguntzaile" gisa jokatu zuela uste du, eta ondorioz, "lapurreta egin zutenen zigor bera" ezartzeko eskatu du.