Haur bat hil da Malagan, Erregeen kabalgatako karrozak harrapatuta

Sei urteko haur bat Malagan hil da Erregeen kabalgatako karroza batek harrapatuta. Ezbeharra Torrijos plazatik gertu gertatu da.

Osasun langileen arabera, Zaintza Berezietako Unitate mobila iritsi denean, haurra hilda zegoen eta alferrik aritu dira suspertu nahian.

Haurra harrapatu duen karroza Errege Magoen laguntzaileetako bat zen, eta istripua gertatu denean, Erregeen karrozek ez zuten oraindik euren ibilbidea hasi.

Lekukoek adierazi dutenez, haurra gozoki bat hartzera zihoan karrozaren azpian harrapatuta geratu denean.

Udalak Twitter bidez aditzera emandakoaren arabera, karrozak beharrezko segurtasun neurriak betetzen zituen eta 15 pertsona zeuden hura zaintzen, horietako 12 akreditazioarekin, beste bi herritarren segurtasunekoak, eta, azkena, udaltzaina.

Hildakoaren aita auzitegi-medikua da Malagako epaitegietan.

Bi dolu-egun

Malagako Udalak bi dolu-egun ezarri ditu eta, segurtasunagatik, kabalgata bertan behera ez uztea erabaki du.

Bi dolu-egunak igandea eta astelehena izango dira. Horrez gain, kabalgataren amaieran egin behar zuten lore-eskaintza bertan behera uztea erabaki dute.

Beste hildako bat, duela 23 urte

1990. urtean beste hildako bat izan zen Erregeen kabalgatan. 7 urteko Isidro Sanchez Martin haurra Riber del Fresnoko kabalgatan (Badajoz) hil zen, gozoki bat hartzera zihoazenean, kabalgata batek harrapatu ostean.