Gorenak probatzat hartu ditu sexu-erasotzaile baten Whatsappeko mezuak

Auzitegi Gorenak onartu egin ditu proba gisa Eneko B. zigortuak mehatxu egiteko Iraia E. biktimari bidalitako mezuak, Whatsapp programaren bidez, eta, gainera, 10 urteko kartzela-zigorra eta 30.000 euroko kalte-ordaina berretsi du.

Whatsappei dagokienez, “Legearen arabera eskuratutako eta auzira zuzen egokitutako materiala da; zigortuak berak onartu du egiazkoak direla”, esan du Gorenak.

Zigortutako mutilak neska konbentzitu zuen bere etxera joateko, modelo gisa argazkiak egiteko aitzakiarekin, eta sexu-harremanak izatera behartu zuen, Bizkaiko Lurralde Auzitegiak emandako eta, orain, Auzitegi Gorenak berretsitako epaiaren arabera.

Ondoren, sexu-harremanak izaten jarraitu zuen bikoteak, neskaren oniritzia izan gabe eta 16 urte zituela (10 bat alditan elkartu ziren bi hilabetean).

Zigortutako mutilak xantaia egiten zion Iraiari; sexu-harremanak izan ezean, bikotekideari eta familiari harremanaren berri emango ziela esaten zion, aipatutako sare sozialeko mezuek baieztatu bezala.

Eneko B. zigortuak helegitea aurkeztu zuen Gorenean Bizkaiko Lurralde Auzitegiak emandako epaiaren kontra, ustezko errugabetasuna urratu ziotelakoan, gertatutakoaren bertsio ezberdinak eman baitzituzten biek.

Une horretan, Gorenak bidalitako mezuei proba maila eman zien, larderia izan dela baieztatzen baitute.

Hala, Enekok Iraia erabili zuen, “oso beldurtuta zegoenean, nahi sexualak asetzeko objektu gisa”, epaiaren arabera.

Iraiak mezuetan hauxe esan zuen: “Ez dut nahi, ez dut nahi zuk hau egitea”; “gorriak pasatzen ari naiz egin nahi ez dudana egiten, egunero negar egiten”; “orain egin nahi ez dudana egin beharko dut, nire bikotekideak ezer jakin ez dezan eta bizitza izorra ez diezadazun?”.

“Bi aukera duzu”, erantzun zion Enekok, aurretik eskatutako sexu-harremanei aipamena eginda, eta ulertaraziz onartu ezean, gertatutakoa zabalduko zuela.

“Mehatxu honen larderiazko izaera zalantzarik gabekoa da”, dio, azkenik, Gorenak.