Urumearen inguruko herriak alertan, uholde arriskuagatik
Azken egunetako euri-jausiek eta mendietan pilatutako elurra urtzeak uholdeen mamua ekarri dute berriz ere Euskal Herrira. Goizean egoera "kezkagarria" izan bada ere, arratsaldean okerrera egin du.
Egoera horren aurrean, uholdeei aurre egiteko plana, alerta mailan, abiarazi zuen asteartean Eusko Jaurlaritzako Segurtasun Sailak Euskal Autonomia Erkidegoan (EAE). Hain justu, egoera aztertzeko bilera egin du Krisi Mahaiak 16:30ean hasita. Nafarroako Foru Erkidegoan, Uholde Arriskurako Plan Berezian jasotako 1. egoera indarrean jarri du Gobernuak (0-3 bitarteko lau maila ditu). Iparraldean ere, alerta laranja ezarri dute eurite eta uholdeengatik.
Gipuzkoan bota du, dena den, euri gehien. Ostegunera arte alerta laranjan dago lurraldea, 24 ordutan metro koadroko 80 litro pila daitezkeela eta. Hala, Gipuzkoako Foru Aldundiak Larrialdi Plana abiarazi zuen asteartean.
Ibaien egoera
Bizkaian, Kadagua ibaia ubidetik atera zen bart Gueñes parean, eta Asua ibaiak gainezka egin du BI-735 errepidean, Erandioko Lutxana auzoan. Dena dela, asteazkeneko lehen orduetarako bi ibaien egoera ohikoa zen. Bilbon, Bolueta auzoan, gainezka egin du ibaiak.
Araban, Gasteizko Udalak Udal Larrialdi Plan abian jarri du, larrialdi aurreko fasean, Abetxukon (Gasteiz) Zadorrak maila laranja gainditu eta gero. Ulibarriko urtegitik 45 metro kubiko askatuta, ibaiaren egoera egonkortu nahi izan dute.
Uholdeak izan dira Mendozan (Gasteiz) eta Iruña Okan (Billoda eta Tresponde herrietan) Zadorra ubidetik irten eta gero. Hain justu, azken udalerri horretan gizon bat erreskatatu behar izan dute, uhaldiak ibilgailu barruan harrapatu baitu.
Euriteek arazo handiak eragin dituzte Gipuzkoan, eta Astigarragan eta Hernanin errumaniar taldeek dituzten kanpalekuak jendez hustu dituzte, eta GI-3410 errepidea, Hernani Goizuetarekin lotzen duena, itxi egin behar izan dute, ibaiak gainezka egin duelako.
Añarbeko Urek jakinarazi dutenez, larunbatetik gaurko 14:30 arte, 350 litro ur jaso dituzte metro koadroko.
Hilabetea amaitzeko hiru egun falta direnean, azken 44 urteetako (datuak jasotzen hasi zirenetik) bigarren otsailik euritsuena da aurtengoa. Gainera, batez beste otsailean egiten duen euriaren bikoitza egin du dagoeneko.
Bestalde, Donostiako Martutene auzoko herritarrak prest daude uholdeengatik etxetik alde egin behar izateko, Urumea ibaia larrialdi egoeran baitago puntu horretan. Gipuzkoako hiriburuko udaletik jakinarazi duenez, 4,4 metroko altuera du Urumeak Martutene parean, eta goranzko joerarekin. Horregatik, "arreta handia" eskatu die bizilagunei, ebakuaziorako prest egon daitezen.
Astigarragan eta Hernanin Urumea ibaiaren ertzean dauden kanpamentuak jendez hustu dituzte Urumeak gainezka egin ondoren, Eusko Jaurlaritzako Segurtasun Sailak berri eman duenez. Astigarragan ebakuatu dituzten 34 pertsonak Santiagomendi aterpetxera eraman dituzte eta Hernanin kanpamentuetatik aterarazi dituzten 20 lagunak, berriz, Gabriel Celaya ikastetxera.
Urumea ertzeko Astigarragako kanpamentuak jendez hustu dituzte. Argazkia: @elviragdl
Jaurlaritzak alerta laranja ezarri du Oria ibaian, Alegia parean, arratsaldeko ordubietatik aurrera, eta Oria ibaia gainezka egiteko zorian dago Andoainen. Halaber, Urola ibaiaren egoerak ere kezka eragiten du.
Oria ibaia Andoian parean. Argazkia: Imanol Fernandez
Nafarroan, hiru ibai dira kezka iturri: Ebro, Ega eta Arga. Lehenengoa alerta egoeran dago Mendabian eta Castejonen; bigarrena, Andosilla eta Lizarra parean eta hirugarrena, Arazurin eta Iruñan. Gainera, Baztan ibaia bere bidetik atera da Arraiozen.
Gizonezko bat hil da arratsalde honetan Arakil ibaira erorita, Arruazun (Nafarroa).
Ezbeharra 18:20 inguruan jazo da. Biktima ibai ertzetik oinez zihoan eta uretara erori da. Bizilagun batek erreskatatzea lortu du, baina Altsasutik bertaratutako mediku taldeak ezin izan du haren bizitza salbatu, erreanimatzen saiatu diren arren.
Iruñeko Udaleko Herritarren Segurtasunerako alorrak alerta egoera ezarri du Arga ibaiak gainezka egin dezakeela eta. 12:00etan segundoko 207 metro kubiko ur zeramatzan eta ur maila igotzen ari zen.
Arga ibaia Iruñeko Klub Nautiko parean. Argazkia: EFE
Klub Nautikoan dagoen oinezkoen pasabidea itxi du Udalak, eta beste hainbat eremutan hesiak ipini ditu, urpean geratu daitezkeelakoan, hala nola, Burlata eta Kaparroso bideetan. Sarbide hauek ez daude itxita, baina ez erabiltzeko gomendioa eman dute.
Iparraldean, Errobi ibaiak gainezka egin du Uztaritzen eta Ortzaizen eta errepideetan zailtasun txikiak eragin ditu, hala nola, Donostiri eta Armendaritze artean eta Isturitze eta Aiherra artean.
Lur-jausia Donostian
Azken orduetako euri-jausien ondorioz, lur-jausiak izan dira nonahi, eta zenbait kasutan, bigarren mailako errepideak itxi behar izan dituzte.
Donostian, Easo kalea zirkulaziora itxita dago San Bartolome mendiaren hegala jausi dela eta. Luizia 02:00etan jazo da, Larramendi kaleko bidegurutzetik gertu.
Luizia izan den gunea. Argazkia: donostia.org
Ezbeharrean ez da inor zauritu, baina zirkulazio arazo dezente eragin ditu, itxita baitago kalea. Hala, Dbuseko zenbait autobus zerbitzu desbideratu dituzte, eta ohi baino arazo gehiago izan dira Donostia inguruko errepideetan. Udal langileak kalea garbitzen ari dira eta datozen orduetan zabaltzea espero dute.
GI-3151 errepidean ere, Ataun parean, lur-jausia izan zen 20:00etan, baina gaurko 08:20rako zabaldu dute
Horrez gain, BI-3497 errepidea, Aulestin (Bizkaia) ur-putzu handia izan da eta itxita egon da 07:00ak arte.
Nafarroan, N-113 errepideko (Iruña eta Madril batzen dituena) 75. kilometroa itxita dago, baita NA-30eko (Iruñeko ingurabidea) 0,2 kilometroa (Landabengo sarbidea) ere, biak uholdeengatik. Horrez gain, suhiltzaileek lagun bat erreskatatu behar izan dute Zangozan, urak hartutako gune batean harrapatuta geratu delako.
Bestalde, Ultzama ibaiak gainezka egin du Atarrabia parean eta, ondorioz, zirkulazioan arazoak izaten ari dira. Atarrabiako Udaltzaingoak berri eman duenez, Atarrabia eta Uharte lotzen dituen errepideko errail bat itxita dago. Eragozpen hori dela eta, arratsaldeko hiruraz geroztik L4H autobus lineak bere ibilbidea aldatu du eta autobusa ez da San Andreseko eta Martiketeko geltokietan geldituko.
Zure interesekoa izan daiteke
Migrazioa delinkuentziarekin eta zerbitzu-abusuarekin lotzen dutenen kopurua jaitsi da
Ikuspegi Immigrazioaren Euskal Behatokiak egindako azterlan baten arabera, euskal herritarren % 10ek baino gutxiagok aipatzen du immigrazioa herrialdeko arazo nagusietako gisa, eta % 2,7k baino ez dio modu pertsonalean eragiten diola.
Gipuzkoako Auzitegiak absolbitu egin ditu haurra hiltzen saiatzeagatik akusatu zituzten gurasoak
Gipuzkoako Probintzia Auzitegiak absolbitu egin ditu gurasoak, haurra hiltzen saiatzeagatik akusatu ostean; ondorioztatu du ezin izan dela frogatu, neskatoaren lesioek jatorri traumatikoa zutenik edo kolpe baten ondorio zirenik.
3I/ATLAS kometa Lurrera ahalik eta gehien hurbildu da, eta ezustekorik gabe urruntzen ari da
Zientzialari errusiarrek baztertu egin dituzte, berriro ere, estralurtarren ustezko ontzi bat zela zioten teoriak.
Etxebizitzak gero eta gehiago kezkatzen du euskal gizartea, eta Osakidetzarekiko eta Ertzaintzarekiko konfiantza hobetzen ari da
Etxebizitza eskuratzea da euskal gizartearen arazo nagusia, azken Deustobarometroaren arabera; bitartean, osasunaren, segurtasunaren eta migrazioaren inguruko kezkak behera egin du, eta zerbitzu publikoekiko konfiantza berreskuratu da.
Guardia Zibilak erietxera eraman ditu Beloradotik joandakoekin Urduñan bizi ziren mojetako bost, osasun-baldintza kaxkarretan zeudelakoan
Ostegun honetan Santa Klarako monastegitik 87 eta 101 urte arteko bost moja atera dituzte eta Basurtuko erietxera eraman dituzte azterketa egitera, epailearen aginduz. Guardia Zibilak jakitera eman duenez, emakumeak osasun-baldintza txarretan bizi zirela egiaztatu ahala izan dute. Adierazpen horiek gezurtatzeko helburuz, etxeko mojetako batek sareetan zabaldu ditu eraikin barruko irudiak.
Fiskalak erretiratu egin ditu Zestoako akusatu nagusiaren aurkako akusazio guztiak, eta gainerako bostentzat isuna eskatu du
Salatzailearen bikotekide ohiaren deklarazioa entzun ostean, fiskalak frogatutzat jo du gizonarekiko beldur gaindiezina izan zuela eta zigor eskaerak aldatu ditu. Absoluzioa eskatu du akusatu nagusiarentzat eta gainerakoentzat, berriz, espetxe zigorra beharrean isunak eskatu ditu hertsatze delituagatik.
Moto gidari bat zauritu da Donostian, GI-20an hainbat ibilgailuren artean izandako istripuan
08:00ak aurretik izan da ezbeharra eta errepidea itxita gelditu da momentuan, auto ilara luzeak eraginez. Geroxeago zabaldu ahal izan dute erreietako bat.
Gabonak, inoiz baino garestiago: trikimailuak eta alternatibak, gure menua merkatzeko
Arkumea, bisigua, turroia, ostrak, anana... Gabonetan pairatzen dugun prezioen gorakadaren ondorioz, produktu batzuk gure mahain izatea ia ezinezkoa izaten da. Baina ez etsi, alternatiba goxoak egon badaude gure Gabonetako menua hain garestia ez izateko.
Elkartasun uholde bati esker, EITB Maratoiak 361.665 euro batu ditu zahartze osasuntsuaren aldeko ikerketarako
Beste urte batez, ehunka pertsonak eta erakundek euren onena eman dute zahartze osasungarria ikertzeko dirua biltzeko. Guztira, egun osoan zehar, EITB Maratoiak 361.665 euro batzea lortu du, eta kopuru horrek hazten jarraituko du datozen egunetako dohaintzei esker.
BiomaGUNEk ohartarazi du aspartamoa "kaltegarria" izan daitekeela bihotzerako eta garunerako
Aspartamoa pisua galtzen lagun dezakeen edulkoratzaile artifiziala da, baina azukrea baino 200 aldiz gozoagoa da.